ވެންކޫވާ، ކެނަޑާ (އޮގަސްޓް 3) - ނޯތު/ސެންޓްރަލް އެމެރިކާ އަދި ކެރީބިއަން ފުޓްބޯލް އެސޯސިއޭޝަން ތަމްސީލްކުރާ ފެޑެރޭޝަން ކޮންކަކަފްގެ ރައީސް، މޮންޓަގްލިއާނީ، އަންނަ އަހަރުގެ މާޗް މަހު ބާއްވާ ފީފާގެ އިންތިހާބުގައި އެ ފެޑެރޭޝަންގެ ރައީސްގެ މަގާމަށް ކުރިމަތިލުމުގެ ފުރުސަތު ބޮޑު ކަމަށް ރިޕޯޓްތައް ބުނެފި އެވެ.
ފީފާގެ ރައީސްގެ މަގާމުގައި ތިން ވަނަ ދައުރެއް މިހާރު ފުރިހަމަަ ކުރައްވަމުން އަންނަ ޖިއާނީ އިންފަންޓީނޯ އަށް އޮތް އިތުބާރު ގިނަ ގައުމުތަކަކަށް ވަނީ ގެއްލިފަ އެވެ. އެ ގޮތުން، ދެން އޮތް ފީފާގެ އިންތިހާބީ ކޮންގްރެސްގައި، އިންފަންޓީނޯއާ ދެކޮޅަށް އެހެން ކެންޑިޑޭޓަކު، ނެރުމަށްޓަކައި، އެންމެ ބާރު އަޅަމުން އަންނަނީ ޔޫރަޕްގެ މައި ފުޓްބޯޅަ އިދާރާ ޔުއެފާ އިންނެވެ.
ޔުއެފާ އިން އެންމެ ފުރަތަމަ ނެރެން މަސައްކަތްކުރީ، ޔޫރަޕިއަން ކްލަބް އެސޯސިއޭޝަން (އީސީއޭ) އަދި ފްރާންސްގެ ޕީއެސްޖީގެ ރައީސް، ގަތަރުގެ ނާސިރު އަލް ހެލައިފީ އެވެ. އެކަމަކު، އޭނާގެ ތަރުޖަމާނަކު މީޑިއާގައި ހާމަކުރީ ހެލައިފީގެ އެ ފަދަ އެއްވެސް ޝައުގުވެރިކަމެއް ނެތް ކަމަށެވެ.
އޭގެ ފަހުން، ޔުއެފާ އިން އެެހެން ކެންޑިޑޭޓަކު ނެރުމަށް ކުރި މަޝްވަރާތަކުގައި ގިނަ ގައުމުތަކެއްގެ އޮފިޝަލުންނަށް އިއްތިފާގުވެވުނު އެއް ނަމަކީ، ފީފާގެ ކައުންސިލްގެ ނައިބު ރައީސަކަށް މަސައްކަތް ކުރައްވަމުން އަންނަ މޮންޓަގްލިއާނީ އެވެ. މީގެ ކުރިން، ކޮރަޕްޝަންގެ ގިނަ ތުހުމަތުތަކެއް އަމާޒުވެފައިވާ މޮންޓަގްލިއާނީ އަށް ޔުއެފާގެ ތާއީދު ލިބުނު ކަމުގައި ވިޔަސް ހަމައެކަނި އެ ބައްރުން އޭނާ އަށް ފީފާގެ ރައީސްގެ މަގާމަށް ނާދެވޭނެ އެވެ.
ފީފާގެ ރައީސްކަން 2016 ވަނަ އަހަރުން ފެށިގެން ކުރަމުން އަންނަ އިންފަންްޓީނޯ އަށް އިތުބާރު ގެއްލެން ދިމާވި އެންމެ ބޮޑު ސަބަބަކީ، މި ފަހުން، އޭނާ ގެންނަން މަސައްކަތް ކުރި، ފީފާ ފޯވާޑް އެންޓަޕްރައިޒަސް (އެފްއެފްއީ)ގައި ހިމަނާފައިވާ ކަންކަމުގެ ސަބަބުންނެވެ.
އަމިއްލަ އިންވެސްޓަރުންނަށް ފީފާގެ މުބާރާތްތަކުގެ ކޮންޓްރޯލް ލިބޭ ގޮތަށް، ފީފާ ވޯލްޑް ކަޕްގެ ހިއްސާއެއް ވެސް ވިއްކާލެވޭ ގޮތަށް ފަށަން ފީފާ އިން މަސައްކަތް ކުރަމުން އައި، ފީފާ ފޯވާޑް އެންޓަޕްރައިސް (އެފްއެފްއީ)ގެ މަސައްކަތް ގޮތް ހުސްވެގެން ހުއްޓާލަން ފީފާ އިން ވަނީ ނިންމައިފަ އެވެ. އެ ނިންމުމާ ދެކޮޅަށް އެންމެ ފުރަތަމަ އަޑުއުފުލި، ފެޑެރެޝަނަކީ ޔުއެފާ އެވެ. ޔުއެފާ އިން ނިންމީ އެ ގޮތަށް ފީފާ އިން ނިންމައިފިނަމަ، ވޯލްޑް ކަޕް ބޮައިކޮޓް ކުރާށެވެ.
ޔުއެފާ އާއި ކޮންކަކަފްގެ އިތުރުން، އޭއެފްސީން ކެނޑިނޭޅި ކުރި ޕްރެޝަރާ އެކު، ފީފާ އިން އެފްއެފްއީ ހުއްޓާލަން ނިންމި ނިންމުމަށް މަރުހަބާ ކިޔުމަށް ޔުއެފާ އިން ނެރުނު ބަޔާނުގައި ވަނީ އިންފަންޓީނޯ އަށް ފާޑުކިޔައިފަ އެވެ. އެ ގޮތުން، ޔުއެފާ އިން ބުނެފައިވަނީ، ފީފާގެ މި ނިންމުމަކީ، މުޅި ފުޓްބޯޅަ އަށް ލިބުނު ކާމިޔާބެއް ކަމަށެވެ.
ފީފާ އަށް ނާކާމިޔާބުވި، ޖުމްލަ އެކު، 20 ބިލިއަން ޑޮލަރުގެ އެފްއެފްއީ އިންވެސްޓްމަންޓް ޕްލޭނަކީ، އިންފަންޓީނޯ އާއި، އެެމެރިކާގެ ރައީސް ޑޮނާލްޑް ޓްރަމްޕްގެ ބައިވެރިވުން އޮތް ކަމެއް ކަމަށް ފުޓްބޯޅައިގެ ތަޖުރިބާކާރުން ތުހުމަތުކުރެ އެވެ. އެއީ، ފީފާގެ ވިސްނުން ހުރީ، އެފްއެފްއީގެ މައިގަނޑު ހިއްސާދާރެއްގެ ގޮތުގައި، ޓްރަމްޕާ ގުޅުން އޮތް ކުންފުންޏެއް ކަމަށްވާ ތުރައިވް އެޓާނަލް އަށް ދޭ ގޮތަށެވެ. މިއީ، އިންފަންޓީނޯ އަށް ވެސް ކޮންމެ މަހަކު، އެތައް މިލިއަން ޑޮލަރު ފައިދާއެއް ވާނެ ޑީލެއް ކަމަށް ރިޕޯޓްތައް ބުނެ އެވެ.
ޔުއެފާ އިން ވަނީ، އެފްއެފްއީގެ ކަންކަން ބެލުމުގެ މަސައްކަތް ފަށައިފަ އެވެ. އެ ގޮތުން، މި މަހު އެއް ވަނަ ދުވަހު ޔުއެފާ އިން ނެރުނު ބަޔާނެއްގައި ބުނެފައިވަނީ، އެފްއެފްއީއާ ގުޅޭ ހުރިހާ މައުލޫމާތުތަކެއް އެއްކޮށް، އެ އަށް ރައްކާތެރިވެ، އެ މައުލޫމާތުތައް ބޭނުންވާ ހުރިހާ ފަރާތަކަށް ދެއްކުމަށްޓަކައި، ފީފާ އިން ތައްޔާރުވާން ޖެހޭ ކަމަށެވެ. އަދި، އެފްއެފްއީއާ ގުޅޭ އެއްވެސް މުހިންމު މައުލޫމާތުތަކެއް ހިމެނޭ ލިޔެކިޔުމެއް ގެއްލިއްޖެނަމަ، ޔުއެފާ އިން ފީފާއާ ދެކޮޅަށް ގާނޫނީ ފިޔަވަޅު އެޅުމަށްޓަކައި ކުރަން ޖެހޭ ހުރިހާ ކަމެއް ކުރާނެ ކަމަށް ވެސް ޔުއެފާ އިން ވަނީ އަންގައިފަ އެވެ.
