ގާހިރާ، މިސްރު (އޮކްޓޫބަރު 20) - މި އަހަރު ކުރިއަށްދިޔަ ފީފާ ވޯލްޑް ކަޕްގެ ގަދަ 16 ބުރުގައި އާޖެންޓީނާ އިން ފަހަތުން އަރައި، 3-2 އިން މިސްރު ބަލިކުރި މެޗުގައި، ހިނގައިދިޔަ ކަންކަމާ ގުޅިގެން، ފީފާ ޑިސިޕްލިނަރީ ކޮމިޓީން މިސްރާ މެދު ފިޔަވަަޅު އަޅައިފި އެވެ.
މިސްރުން 80 ވަނަ މިނިޓާ ހަމައަށް 2-0 އިން ލީޑުކުރި މި މެޗުގައި، އާޖެންޓީނާ އިން ވަނީ ފަހަތުން އަރައި، 3-2 އިން މޮޅުވެފަ އެވެ. މި މެޗުގައި މިސްރުން ފުރަތަމަ ލީޑުނެގުމުން، އެއްވަރުކުރަން އާޖެންޓީނާ އަށް ލިބުނު ޕެނަލްޓީއެއް މެސީ އަތުން ނާކާމިޔާބުވި އެވެ. މިސްރުން ޖެހި ދެ ވަނަ ގޯލު، ވީޑިއޯ އެސިސްޓަންޓް ރެފްރީ (ވީއޭއާރް)ގެ ނިންމުމަކަށް ފަހު ބަލައިނުގަންނަން ނިންމި އެވެ. އޭގެ ފަހުން، މިސްރުން ދެ ވަަނަ ލަނޑެއް ޖެހި އެވެ.
މެސީ ދިން ބޯޅައަކުން އާޖެންޓީނާ އިން 79 ވަނަ މިނިޓްގައި ފުރަތަމަ ލަނޑު ޖެހިއިރު، އޭގެ ތިން މިނިޓް ފަހުން، އޭނާ ވަނީ ގޯލެއް ޖަހައި ނަތީޖާ ހަމަހަމަކޮށްދީފަ އެވެ. އަދި، އިތުރު ވަގުތުގެ ދެ ވަނަ މިނިޓް ތެރޭ އެންޒޯ ފެނާންޑޭސް ވަނީ ލަނޑު ޖަހައި، އާޖެންޓީނާ މޮޅުކޮށްދީފަ އެވެ.
މި މެޗުގެ ރެފްރީ ފްރަންކޮއާ ލަޓެކްސިއޭގެ ނިންމުންތަކަށް މިސްރުގެ ބެންޗުން ވަރަށް ބޮޑަށް ހިތްހަަމަނުޖެހުން ފާޅުކުރި އެވެ. އެހެންވެ، މިސްރުގެ ކޯޗު ހޮސާމް ހަސަން ހިމެނޭހެން ކުޅުންތެރިންނާއި އޮފިޝަލުންނަށް ރީނދޫ ކާޑު ދެއްކި އެވެ. މިސްރުން ވަނީ، ދެ ޕެނަލްޓީއެއް ހޯދުމަށް އެޕީލްކޮށްފަ އެވެ. އަދި، މިސްރުން ޖެހި ދެ ވަނަ ގޯލު ވީއޭއާރް އިން ބަލައިނުގަތީ ގޯސްކޮށް ނިންމި ނިންމުމަކުން ކަަމަށް ހޮސާމް ވަނީ ބުނެފަ އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ހޮސާމް ބުނީ، އާޖެންޓީނާއާ ދެކޮޅަށް މިސްރު ފެނުނީ މާ ރަނގަޅަށް ކަމަށެވެ. އެކަމަކު، މި މެޗުގެ ނަތީޖާ އަށް އަސަރުކުރީ ދަނޑު މަތިންނާއި ދަނޑު ބޭރުން ވަކި ކަންތައްތަކެއް ބޭނުންވާތީ ކަމަށް ހޮސާމް ވަނީ ތުހުމަތުކޮށްފަ އެވެ. އަދި، މި މެޗުގައި މިސްރަށް ލަނޑު ޖަހައިދިން ޒީކޯ ވެސް ވަނީ ރެފްރީންނަށް ފާޑުކިޔައިފަ އެވެ.
ފީފާ ޑިސިޕްލިނަރީ ކޮމީޓިން މި މެޗުގައި ހިނގައިދިޔަ މައްސަލަތައް ބެލުމަށް ފަހު ނިންމީ، މިސްރުގެ ކޯޗު، ހޮސާމް އާއި އޭނާގެ އެއްމާބަނޑު ބޭބެ، އިބްރާހިމް، ތިން މެޗަށް ސަސްޕެންޑް ކުރުމަށެވެ. އަދި، ފީފާ އިން ވަނީ ޒީކޯ ފަސް މެޗަށް ސަސްޕެންޑްކޮށްފަ އެވެ.
މިސްރުން އަންނަނީ މި ސަސްޕެންޝަނާ ދެކޮޅަށް އެޕީލްކުރުމަށްޓަކައި ގާނޫނީ ލަފާ ހޯދަމުންނެވެ. އަދި، އެޕީލްކުރާނީ ކާމިޔާބު ވުމުގެ ފުރުސަތު އޮތް މިންވަރަށް ބަލާފައި ކަމަށް، މިސްރުގެ ފުޓްބޯޅަ އެސޯސިއޭޝަން އޮފިޝަލަކާ ހަވާލާދީ ރިޕޯޓްކޮށްފައިވެ އެވެ.
