ޒިއުރިކް (އޮކްޓޫބަރު 16) - އިއްޔެ ބޭއްވި ފީފާ ކައުންސިލް ބައްދަލުވުމުގައި، ފީފާގެ ރައީސް، ޖިއާނީ އިންފަންޓީނޯ، އޭނާ އަށް ހެދުނު ގޯސްތަކަށް މައާފަށް އެދުނު ނަމަވެސް، ފީފާ ލީޑުކުރުމަށް އިންފަންޓީނޯ އަށް ތާއީދު ނެތް ކަމަށް ކައުންސިލްގެ ގިނަ މެމްބަރުން ހާމަކޮށްފި އެވެ.
ހަތަރު ވަނަ ދައުރަކަށް ފީފާގެ ރައީސްގެ މަގާމަށް ކުރިމަތިލައްވަން ނިންމާފައިވާ އިންފަންޓީނޯ ވަނީ، އިއްޔެ ތިން ގަނޑިއިރަށް ވުރެން ދިގުކޮށް ކުރިއަށްދިޔަ ފީފާ ކައުންސިލް ބައްދަލުވުމުގައި، އޭނާ އަށް މި ފަހުން ހެދުނު ގޯސްތަކާ މެދު މާޔޫސްވާ ކަމަށް ހާމަކޮށް، މެމްބަރުންގެ ކިބައިން ވަރަށް ބޮޑަށް މައާފަށް އެދިވަޑައިގެންފަ އެވެ.
އެއީ، ފީފާ ކައުންސިލްއާ ކުރަން ޖެހޭ ވަރަށް މަޝްވަރާނުކޮށް، ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި، ފީފާ ވޯލްޑް ކަޕް ވެސް ހިމެނޭހެން ފީފާ މުބާރާތުގެ ރައިޓްސް، އެމެރިކާގެ ރައީސް، ޑޮނާލްޑް ޓްރަމްޕާ އާއިލީ ގުޅުން އޮތް ކުންފުންޏަކަށް ވިއްކާލަން އުޅުނު ޑީލުގެ ކަންކަމާ މެދު އެވެ. އަދި، ފީފާ ވޯލްޑް ކަޕްގައި، އެމެރިކާ ރައީސް، ޓްރަމްޕްގެ ނުފޫޒުން އެމެރިކާގެ ފޯވާޑް، ފަލޮރިން ބަލޮގަންގެ ރަތް ކާޑުގެ ސަސްޕެންޝަނަށް ލުއިދޭން ނިންމި ނިންމުމަކީ ވެސް އިންފަންޓީނޯގެ އިތުބާރު ގެއްލިގެންދިޔަ ކަމެކެވެ.
އިންފަންޓީނޯ ވިދާޅުވީ، އެފްއެފްއީގެ ކަންކަން ކުރެވުނީ ވަރަށް ގޯސްކޮށް ކަމަށާއި އޭގެ ނަތީޖާ ވެސް ހިތި ކަމަށެވެ. އެކަމަކު، ގަބޫލުކުރަން ޖެހޭ ހަގީގަތަކީ، އެފްއެފްއީގެ ޑީލް ނުނިމުނީ ހުރިހާ ފަރާތަކުން ވެސް މީގެ ކަންބޮޑުވުން ހިއްސާކުރުމުން ކަމަށާއި މިހާރު އެކަން ހުއްޓާލާފައި އެ އޮތީ ވެސް އެ ސަބަބަށްޓަކައި ކަމަށް އިންފަންޓީނޯ ވިދާޅުވި އެވެ.
މީޑިއާ އިން ކުރި އެއްވެސް ސުވާލަކަށް ޖަވާބުދޭން ދެކޮޅު ހައްދަވައި، އިންފަންޓީނޯ ވަނީ، ލިޔުމުން ހުރިހާ ކަންބޮޑުވުންތަކެއްގެ ޖަވާބުތައް ފޯރުކޮށްދޭނެ ކަމަށެވެ.
އިނގިރޭސި އެފްއޭގެ ރައީސް، އަދި ފީފާގެ ނައިބު ރައީސެއް ކަމަށްވާ، ޑެބީ ހެވިޓް ވިދާޅުވީ، ފީފާ ކައުންސިލްގެ މި ބައްދަލުވުމުން ވެސް އަދިވެސް ވަރަށް ގިނަ ކަންކަން ސާފުނުވެ އޮތް ކަމަށާއި އެންމެ މުހިންމު ކަމަކީ، ޔުއެފާ އާއި ގިނަ ގައުމުތަކުން އެދުނު ގޮތަށް، އެފްއެފްއީގެ ހުރިހާ ލިޔެކިޔުމެއް އާންމުކުރުމަށް ފީފާ އިން އިންކާރު ކުރުން ކަމަށެވެ.
"އަހަންނަށް ހީވަނީ މިއީ ހެން ފީފާގެ އެންމެ ބޮޑު ޒިންމާ އަކަށްވާންވީ. ކަންބޮޑުވުން މި ހުރި ކަންކަމަށް ހައްލު ހޯދުން. ނޫނީ ފީފާ ރައީސަކަށް ހުންނަން އިންފަންޓީނޯ ޝަރުތު ހަމައެއް ނޫން. އެއީ، މި ކައުންސިލް ބައްދަލުވުމުގައި މެޖޯރިޓީ މެމްބަރުންގެ ކަންބޮޑުވުން އައި ގޮތަކީ،" ޑެބީ ވިދާޅުވި އެވެ.
ކައުންސިލް ބައްދަލުވުމުގައި ވެސް އިންފަންޓީނޯއާ ދެކޮޅަށް އެންމެ ބޮޑަށް އަޑުއުފުލީ ޔޫރަޕްގެ މައި ފުޓްބޯޅަ އިދާރާ، ޔުއެފާ އިންނެވެ. ޔުއެފާ އިން ވަނީ، އިންފަންޓީނޯއާ ދެކޮޅަށް އެެމެރިކާ ކޯޓުގައި މައްސަލައެއް ވެސް ފަށައިފަ އެވެ. އެއީ، އެފްއެފްއީގެ ހުރިހާ ލިޔެކިޔުންތަކެއް އާންމުކުރަން ގޮވާލާ މައްސަލަ އެވެ.
