ބެންކޮކް، ތައިލެންޑް (ނޮވެމްބަރު 19) - ފީފާ އިން މަހެއްހާ ދުވަސް ތެރޭގައި ނޭޕާލް ފުޓްބޯލް ފެޑެރޭޝަން (އަންފާ) އަށް ދީފައިވާ ސަސްޕެންޝަން އުވާލާނެ ކަމަށް ބުނެފި އެވެ.
މިދިޔަ ޖޫން މަހުގެ 24 ވަނަ ދުވަހު، ފީފާ އިން ނޭޕާލް ސަސްޕެންޑްކުރީ، އޭގެ ކުރިން ހިނގައިދިޔަ ހަމަ މަހުގެ ތެރޭގައި، އެ ގަައުމުގެ ފުޓްބޯޅަ ފެޑެރޭޝަން، އަންފާގައި ހުރި މައްސަލަތައް ނޭޕާލް ސަރުކާރާ ގުޅިގެން ހައްލުކުރަން ދިން އެއްވެސް ފުރުސަތެއްގައި ފީފާގެ އެންގުންތަކަށް ފުރިހަމަ އަށް ބޯލަނބާފައިނުވާތީ އެވެ. ސަސްޕެންޝަނުގެ ސަބަބުން މި މަހު ކުރިއަށްދިޔަ ސާފް ޗެމްޕިއަންޝިޕްގައި ނޭޕާލަށް ނުކުޅެވުނެވެ. މިއީ، ނޭޕާލަށް ސާފް ޗެމްޕިއަންޝިޕަކުން ފުރުސަތު ގެއްލުނު ފުރަތަމަ ފަހަރެވެ.
ސަސްޕެންޝަންގެ ހާލަތުން ނޭޕާލް ސަލާމަތްކުރުމުގެ ގޮތުން، ނޭޕާލް ސަރުކާރުގެ ފަރާތުން ސްޕޯޓްސް މިނިސްޓަރު، ސަސްމިތު ޕޮކަރެލް އާއި ސްޕޯޓްސް ކައުންސިލްގެ ނައިބު ރައީސް ސިއްދީ ބިޔާންޖަންކަރު ހިމެނޭ ގޮތަށް ވަފުދެއް ވަނީ އޭއެފްސީ އެވޯޑް ހަފްލާގެ ހަވާސާގައި ފީފާ އާއި އޭއެފްސީގެ މަންދޫބުންނާ އެކު ބައްދަލުވުމެއް ބާއްވައިފަ އެވެ.
އެ ބައްދަލުވުމާ ގުޅޭގޮތުން، ބިޔާންޖަންކަރު ވިދާޅުވީ، ވަރަށް ފުޅާދާއިރާއެއްގައި ފީފާ އާއި އޭއެފްސީއާ އެކު މަޝްވަރާތައް ކުރެވުނު ކަމަށާއި މަހެއްހާ ދުވަސް ތެރޭ ސަސްޕެންޝަންގެ ހާލަތުން ސަލާމަތްވެވޭނެ ކަމަށެވެ.
ނޭޕާލުގެ ސްޕޯޓްސް ކައުންސިލުން ވަނީ އަންފާ އަށް ދީފައިވާ ސަސްޕެންޝަން އުވާލައިފަ އެވެ. އަދި، އަންފާ އަށް ސަރުކާރުން ދެމުން އައި އެއްބާރުލުން ހުއްޓާލަން ނިންމާފައިވާ ނިންމުން ވެސް އަނބުރާ ގެނެސްފަ އެވެ. ނޭޕާލް ސަރުކާރުން އަންފާއާ މެދު ހިތްހަމަނުޖެހުންތައް ބޮޑުވީ، އަންފާގެ ވެރިންނާ މެދު ކުރެވޭ ކޮރަޕްޝަންގެ ތުހުމަތުތަކެއް އޮއްވައި، އިންތިހާބެއް ބާއްވަން މަސައްކަތް ކުރާތީ އެވެ.
އެކަމަކު، ފީފާ އިން ނޭޕާލްގެ ސަސްޕެންޝަން އުވާލާނީ މިހާރު އޮތް ލީޑަޝިޕްގެ ދަށުން އާ އިންތިހާބެއް ބާއްވައިގެންނެވެ.
ފީފާ ވޯލްޑް ކަޕް/ އޭޝިއަން ކަޕް ކޮލިފައިން ފެށުމުގެ ކުރިން ސަސްޕެންޝަން ހާލަތުން ސަލާމަތްވާން ނޭޕާލުން އަންނަނީ އެކި ގޮތްގޮތުން މަސައްކަތް ކުރަމުންނެވެ.







