ޑާކާ، ބަންގްލަދޭޝް (އޮކްޓޫބަރު 19) - ފީފާގެ ރައީސް ޖިއާނީ އިންފަންޓީނޯ، ނުރަސްމީ ދަތުރުފުޅެއްގައި ބަންގްލަދޭޝް އަށް ޒިޔާރަތް ކުރައްވައިފި އެވެ.
މިއީ، މޮރޮކޯ އިން ބޫޓާންގެ ތިމްޕޫ އަށް ކުރައްވާ ދަތުރުގެ ތެރެއިން، ބަންގްލަދޭޝްގައި ކުރި ޓްރާންސިޓެކެވެ. ދެ ގަޑިއިރެއްހާއިރުގެ މި ޓްރާންސިޓްގައި، ބަންގްލަދޭޝްގެ މައި އެއާޕޯޓް، ހަޒުރަތު ޝާހުޖަލާލް އިންޓަނޭޝަނަލް އެއާޕޯޓުގެ ވީއައިޕީގައި އިންފަންޓީނޯ ވަނީ ބަންގްލަދޭޝްގެ ފުޓްބޯޅަ ފެޑެރޭޝަންގެ ރައީސް، ތާބިިތު އައްވަލް އާއި ހިންގާ ކޮމިޓީއާ އެކު ބައްދަލުވުންތަކެއް ކުރިއަށްގެންދަވައިފަ އެވެ.
މި ބައްދަލުވުމުގެ ތެރޭގައި، ބަންގްލަދޭޝްގެ ފުޓްބޯޅަ ފެޑެރޭޝަންގެ ހިންގާ ކޮމިޓީ އަށް އިންފަންޓީނޯ ވަނީ ކުރިއަށް އޮތްތަނުގައި ރަސްމީ ދަތުރުފުޅެއްގައި ބައްދަލުކުރައްވާނެ ކަމުގެ ޔަގީންކަން ދެއްވައިފަ އެވެ. އަދި، ދެން، ބަންގްލަދޭޝް އަށް ވަޑައިގަންނަވާނީ އެ ގައުމުގެ ފުޓްބޯޅަ އަށް ބޮޑެތި މަސައްކަތްތަކެއް ފަހިކޮށްދޭ ޕްރޮޖެކްޓްތަކެއް ފުރިހަމަ ކުރުމަށް ފަހު ކަމަށް ވެސް އިންފަންޓީނޯ ވަނީ ވިދާޅުވެފަ އެވެ.
ބަންގްލަދޭޝްގެ ފުޓްބޯޅަ ރައީސް، ތާބިތު ވަނީ، އެ ގައުމުގެ ސަރުކާރުން ފުޓްބޯޅަ ފެޑެރޭޝަނަށް 15 އޭކަރުގެ ބިން ދިފައިވާ ކަމަށާއި އެ ތަނުގައި، ސްޓޭޑިއަމްތަކެއް އެޅުމުގެ މަސައްކަތް ފީފާއާ ގުޅިގެން ކުރާނެ ކަމަށް ވިދާޅުވެފަ އެވެ.
އިންފަންޓީނޯ ވަނީ މީގެ ހަތް އަހަރު ކުރިން، ބަންގްލަދޭޝް އަށް ރަސްމީ ދަތުރުފުޅެއް ކުރައްވައިފަ އެވެ. އެ ގޮތުން، 2019 ވަނަ އަހަރުގެ މި ދަތުރުފުޅުގައި، އޭރު ބަންގްލަދޭޝްގެ ފުޓްބޯޅަ ފެޑެރޭޝަންގެ ރައީސް، ކާޒީ ސަލާހުއްދީންއާ އެކު، ގިނަ އިވެންޓްތަކެއްގައި ބައިވެރިވެވަޑައިގެންނެވި އެވެ.
މިދިޔަ އަހަރުގެ އޮކްޓޫބަރު މަހު، އިންފަންޓީނޯ ވަނީ ރަސްމީ ދަތުރުފުޅެއްގައި ރާއްޖެ ވަޑައިގެންފަ އެވެ. އެއީ، 19 އަހަރަށް ފަހު، ފީފާގެ ރައީސަކު ރާއްޖެ އަށް ރަސްމީ ދަތުރުފުޅެއް ކުރެއްވި ފުރަތަަމަ ފަހަރެވެ.
ފީފާގެ ރައީސަކަށް ހަތަރު ވަނަ ދައުރަކަށް އަންނަ އަހަރު ވާދަކުރައްވަން އިންފަންޓީނޯ ވަނީ ކެންޑިޑެސީ އިއުލާނުކުރައްވައިފަ އެވެ. އެކަމަކު، އޭނާ މަގާމުން ދުރުކުރަން ގިނަ ކަންތައްތަކެއް އަންނަނީ ހިނގަމުންނެވެ.
އިންފަންޓީނޯ މަގާމު ދުރުކުރަން އެންމެ ބޮޑަށް މަސައްކަތްކުރަނީ، ޔޫރަޕްގެ މައި ފުޓްބޯޅަ އިދާރާ ޔުއެފާ އާއި އުތުރު/ސެންޓްރަލް/ކެރީބިއަން އައިލެންޑްގެ ފުޓްބޯޅަ ފެޑެރޭޝަން، ކޮންކަކަފް އިންނެވެ.
ޔުއެފާ އާއި ކޮންކަކަޕް އިން އިންފަންޓީނޯއާ ދެކޮޅަށް އެންމެ ބޮޑަށް މަސައްކަތް ފެށީ، ފީފާ ވޯލްޑް ކަޕް ހިމެނޭހެން ފީފާގެ މުބާރާތްތަކުގެ ރައިޓްސް، ޕްރައިވެޓް އިންވެސްޓަރުންނަށް ވިއްކާލާ ޑީލް، ފީފާ ފޯވާޑް އެންޓަޕްރައިސް (އެފްއެފްއީ)ގެ ސަބަބުންނެވެ. އެފްއެފްއީ އަކީ އެމެރިކާގެ ރައީސް ޑޮނާލްޑް ޓްރަމްޕްގެ އާއިލީ ގުޅުން އޮންނަ ކުންފުންޏަކާ އެކު ފީފާ އިން ކުރިއަށްގެންދަން އުޅުނު ޑީލެކެވެ. ފަހުން ޕްރެޝަރުތަކާ އެކު އެ ޑީލް ވަނީ ނިމުމަކަށް އަތުވެފަ އެވެ. އެ ޑީލްގެ ލިޔެކިޔުންތައް ހޯދަން، ޔުއެފާ އިން ވަނީ އެމެރިކާގެ ކޯޓަކަށް މައްސަލަ ވެސް ހުށަހަޅައިފަ އެވެ.
ދާދި ފަހުން، ކުރިއަށްދިޔަ ފީފާ ކައުންސިލް ބައްދަލުވުމުގައި، އިންފަންޓީނޯ ވަނީ ކުރިން ވެދިޔަ ކަންތައްތަކަށް މައާފަށް އެދިވަޑައިގެންފަ އެވެ. އެކަމަކު، ގިނަ މެމްބަރު އެސޯސިއޭޝަންތަކުން ކުރިމަތިކުރުވާ ސުވާލުތަކަށް އިންފަންޓީނޯ އަށް ޖަވާބެއް ނުދެވުނެވެ.
