ނާކާމިޔާބީ ގަބޫލުކުރުމަށް އިރާނުން އެމެރިކާއަށް ގޮވާލާފައިވާއިރު، ރައީސް ޑޮނަލްޑް ޓްރަމްޕް ވަނީ ތެހެރާނަކީ "ވަރަށް ނުބައި" ގައުމެއްގެ ގޮތުގައި ސިފަކުރައްވައި، ހަނގުރާމައިގެ ސަބަބުން އުފެދިފައިވާ ތެލުގެ ބޮޑު އަގު ބަލައިގަތުމަށް އެމެރިކާގެ ރައްޔިތުންނަށް އިލްތިމާސްކުރައްވާފަ އެވެ.
ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން ފެށި މި ހަނގުރާމަ ހުއްޓާލުމުގެ އެއްވެސް ނިޝާނެއް ފެންނަން ނެތްއިރު، ސުލްހައިގެ ވާހަކަތަކާއި ސްޓްރެޓީޖިކް ކަނޑުއޮޅިއެއް ކަމަށްވާ ސްޓްރެއިޓް އޮފް ހޯމޫޒް މެދުވެރިކޮށް ތެޔޮ އުފުލާ ބޯޓުފަހަރު ދަތުރުކުރުން ވަނީ ހުއްޓިފަ އެވެ.
އިރާނުގެ ޑެޕިއުޓީ ފޮރިން މިނިސްޓަރު ކާޒިމް ޣަރީބްއާބާދީ ހޮނިހިރު ދުވަހުގެ ހެނދުނު އެކްސްގައި ކުރެއްވި ޕޯސްޓެއްގައި ވިދާޅުވީ، އެ ކަނޑުއޮޅި ހުޅުވުމާއި ބަންދުކުރުން އޮންނާނީ ހަމައެކަނި އިރާނުގެ ބާރުގެ ދަށުގައި ކަމަށެވެ. އަދި އެމެރިކާއިން ނާކާމިޔާބީގެ ހަގީގަތް ގަބޫލުކޮށް، ހިޔާލީ ދުނިޔެއަކުން ބޭރުނުވާހާ ހިނދަކު، އިރާނުން އެ ސަރަހައްދު ބަންދުކޮށްފައި ބާއްވާނެ ކަމަށް އޭނާ ވިދާޅުވި އެވެ.
ފޮރިން މިނިސްޓަރު އައްބާސް އަރާގްޗީ ވިދާޅުވީ އެމެރިކާއާއެކު އަލުން މަޝްވަރާތައް ފެށުމަށް އިރާނުން އަދި ނިންމާފައި ނުވާ ކަމަށެވެ. ހޮނިހިރު ދުވަހު ޝަހްރާރާ ނިއުސްއަށް ދެއްވި އިންޓަވިއުއެއްގައި އޭނާ ވިދާޅުވީ، ހަނގުރާމައިގެ ކުރިން ދުނިޔޭގެ ތެލުގެ ފަސްބައިކުޅަ އެއްބައި އުފުލި އެ ކަނޑުއޮޅިން އަލުން ދަތުރުފަތުރު ފެށޭނީ، އެމެރިކާއިން އިރާނުގެ ޝަރުތުތައް ފުރިހަމަކުރުމުން ކަމަށެވެ.
އިރާނާއެކު ހަނގުރާމަ ކުރިއަށްދާއިރު، ޕެޓްރޯލްގެ އަގު ކުޑަކޮށް އުފުލުން ގަބޫލުކުރުމަށް ރައީސް ޓްރަމްޕް ވަނީ އެމެރިކާގެ ރައްޔިތުންނަށް ބާރުއަޅުއްވައިފަ އެވެ.
ހުކުރު ދުވަހު ނިއުޔޯކްގެ ގާޑަން ސިޓީގައި ބޭއްވި ސިޔާސީ އެއްވުމެއްގައި ވާހަކަދައްކަވަމުން ޓްރަމްޕް ވިދާޅުވީ، ޕެޓްރޯލަށް "ކުޑަ މިންވަރެއް އިތުރަށް ހޭދަކުރުމަކީ" "ވަރަށް ނުބައި ގައުމަކަށް" ނިއުކްލިއާ ހަތިޔާރު ހޯދުމުގެ ފުރުސަތު ނުދިނުމަށްޓަކައި ކުރަންޖެހޭ މުހިންމު ހޭދައެއް ކަމަށެވެ.
