އީރާނު ހަނގުރާމަ ނިމުމަކަށް އައުމުގެ އުންމީދު ކުޑަވެފައިވާ ދަނޑިވަޅެއްގައި، އަންގާރަ ދުވަހު ކަނޑުދަތުރުފަތުރު ކުރާ އުޅަނދުތަކަށް ވަކިވަކިން ހަމަލާތަކެއް ދީފައިވާ ކަމަށް އެމެރިކާ އާއި ޔަމަނުގެ ހޫތީން ރިޕޯޓްކޮށްފި އެވެ.
އީރާނުން ބުނެފައިވަނީ އެމެރިކާއިން އެ ގައުމުގެ ޝަރުތުތައް ގަބޫލުނުކުރާހާ ހިނދަކު ހޯރްމޫޒް ކަނޑުއޮޅި ބަންދުކޮށްފައި ބާއްވާނެ ކަމަށެވެ.
ދުނިޔޭގެ ތެލުގެ ސަޕްލައިގައި މުހިންމު ދައުރެއް އަދާކުރާ ހޯރްމޫޒް ކަނޑުއޮޅިއަށް ވަދެވެން އޮންނަ އޮމާން ކަނޑާއި ރަތް ކަނޑުގެ ދޮރާށީގައި ދިން މި ހަމަލާތައް އައިސްފައިވަނީ، އެމެރިކާގެ ރައީސް ޑޮނަލްޑް ޓްރަމްޕް އެއްބަސްވުމަކާ ގާތްވެފައިވާ ކަމަށް ތަކުރާރުކޮށް ވިދާޅުވަމުން ގެންދެވި ނަމަވެސް، ހަނގުރާމަ ހުއްޓޭނެ ކަމުގެ އެއްވެސް ނިޝާނެއް ނުފެންނަ ދަނޑިވަޅެއްގަ އެވެ.
މި ހަނގުރާމަ އަވަހަށް ނިމޭނެ ކަމުގެ އުންމީދު ކުޑަވުމާ ގުޅިގެން، ތެލުގެ އަގު އުފުލި ދުނިޔޭގެ ހިއްސާގެ ބާޒާރުތައް ވަނީ ދަށަށް ގޮސްފަ އެވެ. ބްރެންޓް ކްރޫޑްގެ އަގު 1.4 އިންސައްތަ މަތިވެ ފީފާއެއްގެ އަގު 88.91 ޑޮލަރަށް އެރިއިރު، އެމެރިކާގެ ސާފުނުކުރާ ތެލުގެ އަގު 1.3 އިންސައްތަ މަތިވެ ފީފާއެއްގެ އަގު ވަނީ 83.20 ޑޮލަރަށް އުފުލިފަ އެވެ.
ރަތް ކަނޑުގެ ދެކުނު ސަރަހައްދުގައި އޮންނަ ބާބުލް މަންދަބް ކަނޑުއޮޅިން ދަތުރުކުރި ކުޑަ މުދާ އުފުލާ ބޯޓަކަށް އަންގާރަ ދުވަހު ހޫތީން ދިން ކަމަށް ބެލެވޭ ހަމަލާއެއްގައި ފަޅުވެރިންގެ ހަތަރު މީހަކު މަރުވެފައިވާ ކަމަށް ޔަމަނުގެ ޓްރާންސްޕޯޓް މިނިސްޓްރީން ވަނީ ބުނެފަ އެވެ. މީގެ އިތުރުން، ހޫތީންނާ ދެކޮޅު އަސްކަރީ ގްރޫޕަކަށް ނިސްބަތްވާ ޔަމަނުގެ ދެ ރެސްކިއު މަސައްކަތްތެރިން ވެސް މަރުވެފައިވާ ކަމަށް އެ ގައުމުގެ ކޯސްޓްގާޑުން ބުނެ އެވެ.
މިސްރުގެ ކުންފުންޏަކަށް ނިސްބަތްވާ "ތިހާމާ" ނަމަކަށް ކިޔާ މި ބޯޓުގައި މަރުވި މީހުންނަކީ، އީރާނު ހަނގުރާމަ ފެށުނު ފަހުން އީރާނަށް ތާއީދުކުރާ ޔަމަނުގެ ހޫތީން ކަނޑުދަތުރުފަތުރު ކުރާ އުޅަނދަކަށް ދިން ހަމަލާއެއްގައި މީހުން މަރުވި ފުރަތަމަ ފަހަރެވެ.
