މިދިޔަ މަހު ތުރުކީގައި ބޭއްވި ނޭޓޯ ސަމިޓް ނިންމަވާލެއްވުމަށް ފަހު އެނބުރި ވަޑައިގަންނަވަނިކޮށް، އީރާނުން ދީފާނެ ހަމަލާއަކުން ރައްކާތެރިވުމަށްޓަކައި އެމެރިކާގެ ރައީސް ޑޮނަލްޑް ޓްރަމްޕް ސިއްރިއްޔާތުގައި ބޯޓު ބަދަލުކުރައްވާފައިވާ ކަމަށް އެމެރިކާގެ މީޑިއާތަކުން ރިޕޯޓްކޮށްފި އެވެ.
ވޮޝިންޓަން ޕޯސްޓުން ރިޕޯޓްކޮށްފައިވާ ގޮތުގައި، ޓީވީ ކެމެރާތަކަށް ފެންނާނެހެން ރައީސް ޓްރަމްޕް އެއާ ފޯސް ވަން އަށް އަރާވަޑައިގަތުމަށް ފަހު، ކޭޓަރިން ޓްރަކެއްގެ އެހީގައި ސިއްރިއްޔާތުގައި އަސްކަރީ މަތިންދާބޯޓަކަށް ވަނީ ބަދަލުކޮށްފަ އެވެ. އެ ބޯޓުގައި ތިބި ނޫސްވެރިންނާއި ވައިޓް ހައުސްގެ ބައެއް މުވައްޒަފުންނަށް ވެސް ރައީސް ބޯޓުން ބޭލިކަމެއް ނޭނގެ އެވެ.
ސީބީއެސް ނިއުސްއަށް އޮފިޝަލުން މައުލޫމާތު ދެއްވި ގޮތުގައި، ރައީސްގެ ބޯޓަށް މިސައިލް ހަމަލާއެއް ދިނުމަށް އީރާނުން ރާވަމުންދާ ކަމުގެ އިތުބާރު ހުރި މައުލޫމާތު އެމެރިކާއަށް ވަނީ ލިބިފަ އެވެ. ނަމަވެސް، ސިއްރިއްޔާތުގައި ބޯޓު ބަދަލުކުރި ކަމަށް ބުނާ ވާހަކަ ވައިޓް ހައުސްއިން އަދި ކަށަވަރުކޮށްދީފައެއް ނުވެ އެވެ.
އަންކާރާގައި ބޭއްވި ސަމިޓުގެ ތެރޭގައި ޓްރަމްޕް ކުރިން ވިދާޅުވެފައިވަނީ އޭނާއަކީ އީރާނުގެ "އެންމެ ބޮޑު އަމާޒު" ކަމަށެވެ.
މި ސިއްރު އޮޕަރޭޝަން ހިންގާފައިވަނީ، ވޮޝިންޓަނާއި ތެހެރާނާ ދެމެދު ހަނގުރާމަ ހުއްޓާލުމަށް ކުރަމުންދިޔަ މަޝްވަރާތައް ނާކާމިޔާބުވެ، އެމެރިކާއިން އަލުން އީރާނަށް އަސްކަރީ ހަމަލާތައް ދޭން ފެށިތާ އެއް ދުވަސް ފަހުންނެވެ.
ޓްރަމްޕް އެމެރިކާއަށް ވަޑައިގަތުމުގެ މަގުމަތީގައި އިނގިރޭސިވިލާތަށް މަޑުކުރެއްވި އެވެ. އެތަނުން އޭނާ އަލުން ކުރީގެ އެއާ ފޯސް ވަން ބޯޓަށް އަރާވަޑައިގަތް ކަމަށް ބެލެވެ އެވެ. ސަބަބަކީ އާރްއޭއެފް މިލްޑަންހޯލް އެއާޕޯޓަށް އެ ބޯޓު ޖެއްސުމަށް ފަހު ޓްރަމްޕް ބޯޓުން ފައިބާވަޑައިގަންނަވަނިކޮށް ފެނިފައިވާތީ އެވެ. ނަމަވެސް، ސީ-32އޭ ބޯޓުން އަލުން ކުރީގެ ޖެޓަށް އޭނާ ބަދަލުވި ގޮތެއް ސާފެއް ނުވެ އެވެ.
އެއަށްފަހު، ރައީސް ވޮޝިންޓަނަށް ވަޑައިގަތީ ގަތަރުން ހަދިޔާކުރި އާ އެއާ ފޯސް ވަން ބޯޓުގަ އެވެ.
އެ ދަތުރުމަތީގައި ބޯޓުގައި ތިބި ނޫސްވެރިންނާ ވާހަކަދައްކަވަމުން ޓްރަމްޕް ވަނީ އީރާނުގެ ފަރާތުން އޮތް ނުރައްކަލާ ބެހޭގޮތުން ވާހަކަދައްކަވާފަ އެވެ. ނަމަވެސް، ބޯޓު ބަދަލުކުރި ވާހަކައެއް ވިދާޅެއް ނުވެ އެވެ.
ވައިޓް ހައުސްގެ ކޮމިއުނިކޭޝަންސް ޑައިރެކްޓަރު ސްޓީވަން ޗަންގް މި ރިޕޯޓްތައް ސީދާ ދޮގެއް ނުކުރައްވަ އެވެ. ނަމަވެސް އޭނާ ވިދާޅުވީ އާ އެއާ ފޯސް ވަން އަކީ ރައީސާއި މުވައްޒަފުންގެ ރައްކާތެރިކަމަށްޓަކައި އެންމެ ޒަމާނީ ސަލާމަތީ ވަސީލަތްތައް ހަރުކޮށްފައިވާ ބޯޓެއް ކަމަށެވެ.
ސީބީއެސް ނިއުސްއިން މީގެ ކުރިން ރިޕޯޓްކޮށްފައިވާ ގޮތުގައި، ޓްރަމްޕަށް ނުވަތަ އޭނާގެ ބޯޓަށް ހަމަލާއެއް ދީފާނެ ކަމުގެ އިންޒާރު އެމެރިކާގެ އިންޓެލިޖެންސް އިދާރާތަކުން ކުރިން ވެސް އޮތީ ދީފަ އެވެ.
ނިއުޔޯކް ޓައިމްސްއިން މީގެ ކުރިން ރިޕޯޓްކޮށްފައިވާ ގޮތުގައި، ގަތަރުން ހަދިޔާކުރި ބޯޓުގެ ސަލާމަތީ ކަންކަމާ މެދު ކަންބޮޑުވުންތަކެއް ހުއްޓެވެ. އަދި ނޭޓޯ ސަމިޓުން އެނބުރި ވަޑައިގަންނަވާއިރު ބޯޓު ބަދަލުކުރުމަށް ސީކްރެޓް ސާވިސްއިން ޓްރަމްޕަށް ލަފާދީފައިވާ ކަމަށް ވެސް އެ ނޫހުން ބުނެފައިވެ އެވެ.
މި މައުލޫމާތުތައް ލީކުވުމާ ގުޅިގެން އެ ނޫހުގެ ބައެއް ނޫސްވެރިން ވަނީ ހެކިބަސް ދިނުމަށް ހާޒިރުކޮށްފަ އެވެ. އަދި މި މައުލޫމާތުތައް ގާނޫނާ ހިލާފަށް ލީކުވި ގޮތް ތަހުގީގު ކުރަމުންދާ ކަމަށް ޖަސްޓިސް ޑިޕާޓްމަންޓުން ވަނީ ކަށަވަރުކޮށްދީފަ އެވެ.
އެމެރިކާ ސަރުކާރުން ވަނީ 400 މިލިއަން ޑޮލަރުގެ ބޯއިންގް 747-8 މަރުކާގެ ބޯޓު ރައީސްގެ ބޭނުންތަކަށް ތައްޔާރުކުރުމަށް މަސްތަކެއް ހޭދަކޮށްފަ އެވެ. ސީބީއެސް ނިއުސްއަށް މައުލޫމާތު ލިބިފައިވާ ގޮތުގައި، ކުރީގެ އެއާ ފޯސް ވަން ބޯޓުތަކުގައި މިސައިލް ހަމަލާތަކުން ރައްކާތެރިވުމަށް ލޭޒާ ޓެކްނޮލޮޖީ ހުރެ އެވެ. ނަމަވެސް ގަތަރުން ދިން ބޯޓުގައި ހުރީ ކޮން ކަހަލަ ސިސްޓަމްތަކެއް ކަމެއް ސާފެއް ނޫނެވެ.
