ޔަހޫދީ ވަޒަންވެރިން ހިސާރުކޮށްފައިވާ ހުޅަނގު އައްސޭރީގެ ފަލަސްތީނު ރައްޔިތުންގެ ގެތަކަށް ބޭނުންވާ ކާބޯތަކެއްޗާއި އެހީގެ ސާމާނު ފޯރުކޮށްދިނުމަށް އެކްޓިވިސްޓުން މަސައްކަތް ކޮށްފި އެވެ.
ޔަހޫދީން މިދިޔަ އާދީއްތަ ދުވަހުން ފެށިގެން ކުސްރާ އަވަށުގެ ދެ ގެއެއް ހިސާރުކޮށްފައިވާއިރު، އެ ގޭގޭގައި ދިރިއުޅޭ ފަލަސްތީނުގެ ދެ އާއިލާއެއް ވަނީ ތާށިވެފަ އެވެ. އެ ގޭގޭގެ ކަރަންޓާއި ފެނުގެ ހިދުމަތް ކަނޑާލާފައިވާތީ، އެކްޓިވިސްޓުންގެ ގްރޫޕުން ވަނީ އެ ސަރަހައްދަށް ގޮސް އެ ގެތަކުގެ ކައިރީގައި ފެނާއި ކާބޯތަކެތި ބަހައްޓާފަ އެވެ.
ތާށިވެފައި ތިބި ދެ މީހަކު ބުނި ގޮތުގައި، އެކްޓިވިސްޓުން ގެނައި އެހީގެ ތަކެތި ސީދާ އެމީހުންނާ ހަވާލުކުރުމަށް އިސްރާއީލުގެ ސިފައިން ވަނީ ހުރަސް އަޅާފަ އެވެ. އެހެންކަމުން އެ ތަކެތި ބަހައްޓަން ޖެހުނީ ގޭގެ ބޭރުގަ އެވެ. ނަމަވެސް އިސްރާއީލުގެ އަސްކަރިއްޔާ (އައިޑީއެފް) އިން ވަނީ އެ ތުހުމަތުތައް ދޮގުކޮށްފަ އެވެ.
މީގެ އިތުރުން، މިދިޔަ ބުރާސްފަތި ދުވަހު އެ ސަރަހައްދުން ވަޒަންވެރިން ދުރުކުރުމަށް ހިންގި އޮޕަރޭޝަނަށް ފަހު، ހުކުރު ދުވަހު އަނެއްކާވެސް ގިނަ އަދަދެއްގެ ވަޒަންވެރިން އެ ސަރަހައްދަށް އެނބުރި އައިސް ފޭލިގެއެއް ޖަހާފައިވެ އެވެ. ނަމަވެސް ފަހުން އިސްރާއީލުގެ ސިފައިން ވަނީ އެ ފޭލިގެ ނަގާފަ އެވެ.
އިސްރާއީލުގެ އަސްކަރިއްޔާއިން ބުނި ގޮތުގައި ކުސްރާ އަވަށަކީ "ބަންދުކުރެވިފައިވާ އަސްކަރީ ސަރަހައްދެއް" ކަމުން، އެކްޓިވިސްޓުންގެ ތެރޭގައި ހިމެނޭ އިސްރާއީލުގެ އާންމު ރައްޔިތުންނަށް އެ ސަރަހައްދަށް ވަނުމުގެ ހުއްދައެއް ނޯންނާނެ އެވެ.
