ދެހާސް ތޭވީސް ވަނަ އަހަރުގެ ފަހުކޮޅުން ފެށިގެން ކޮލަމްބިއާ ޔުނިވާސިޓީން ފަލަސްތީނު ދަރިވަރުންނާއި މުވައްޒަފުންނާ މެދު ތަފާތުކުރުންތައް ގެންގުޅޭ ކަމަށް ބުނެ، މިހާރުގެ އަދި ކުރީގެ ދަރިވަރުންނާއި މުވައްޒަފުން ހިމެނޭ ގްރޫޕަކުން އެ ޔުނިވާސިޓީއާ ދެކޮޅަށް ދައުވާ އުފުލައިފި އެވެ.
އެ ދައުވާގައި ބުނެފައިވަނީ، ފަލަސްތީނަށް ނިސްބަތްވާ މީހުންނަށް ކުރިމަތިވި ފުރައްސާރަތަކުން އެ މީހުން ރައްކާތެރިކޮށްދިނުމަށް ޔުނިވާސިޓީން ނުކުޅެދިފައިވާ ކަމަށެވެ. އަދި "އިންސާފެއް ނެތް، ވަކި ފަރާތަކަށް ޖެހިފައިވާ އަދަބީ ފިޔަވަޅު އެޅުމުގެ އަޑުއެހުންތަކެއްގެ" ޒަރީއާއިން އެ މީހުންނަށް އަމާޒުކޮށް ފިޔަވަޅު އަޅާފައިވާ ކަމަށް ވެސް އެ ދައުވާގައި ބަޔާންކޮށްފައިވެ އެވެ.
ކޮލަމްބިއާ ޔުނިވާސިޓީން މީގެ ކުރިން ވަނީ އެއްވެސް ބަޔަކާ މެދު ތަފާތުކުރުންތައް ގެންގުޅޭ ކަމަށް ބުނާ ވާހަކަތައް ދޮގުކޮށްފަ އެވެ. މި މައްސަލައާ ގުޅޭ ގޮތުން އެ ޔުނިވާސިޓީން އެއްޗެއް ބުނަން ބޭނުންނުވާ ކަމަށް އެ ގައުމުގެ މީޑިއާތަކުން ރިޕޯޓުކޮށްފައިވާއިރު، ރޮއިޓާސް ނިއުސް އެޖެންސީން ކުރި ސުވާލުތަކަށް ވެސް އެ ތަނުން ޖަވާބެއް ދީފައެއް ނުވެ އެވެ.
އޮކްޓޯބަރު 2023 ގައި ފަލަސްތީނުގެ ހަމާސް ޖަމާއަތުން ދިން ހަމަލާއާ ގުޅިގެން، އިޒްރޭލުން ގާޒާއަށް ދޭން ފެށި ވަރުގަދަ ހަމަލާތަކާ އެކު، ކޮލަމްބިއާ ޔުނިވާސިޓީގެ އިތުރުން އެމެރިކާގެ އެކި ކަންކޮޅުތަކުގައި ބޮޑެތި މުޒާހަރާތަކެއް ކުރިއަށްދިޔަ އެވެ.
އެ މުޒާހަރާތަކުގެ ބައިވެރިން ގޮވާލަމުންދިޔައީ އިޒްރޭލަށް އެމެރިކާއިން ދޭ އެހީތެރިކަން ހުއްޓާލުމަށާއި، އިޒްރޭލަށް ތާއީދުކުރާ ކުންފުނިތަކުގައި ޔުނިވާސިޓީތަކުން ކޮށްފައިވާ އިންވެސްޓްމަންޓްތައް އަނބުރާ ގެންދިއުމަށެވެ.
ފަލަސްތީނަށް ތާއީދުކޮށް ކުރިއަށްގެންދިޔަ މުޒާހަރާއެއްގައި ޔުނިވާސިޓީގެ މައި ލައިބްރަރީ ބަންދުކުރުމުގައި ބައިވެރިވި ކަމަށް ބުނެ، 2025 ވަނަ އަހަރުގެ މޭ މަހު ކޮލަމްބިއާ ޔުނިވާސިޓީން ވަނީ 65 އަށް ވުރެ ގިނަ ދަރިވަރުން ސަސްޕެންޑްކޮށްފަ އެވެ.
އެ މުޒާހަރާތައް ކުރިއަށްދިޔައީ، ފަލަސްތީނަށް ތާއީދުކޮށް ކުރި މުޒާހަރާތަކުގައި ޔަހޫދީންނާ ދެކޮޅު އަމަލުތަކަށް ޔުނިވާސިޓީން ފުރުސަތުދޭ ކަމަށް ތުހުމަތުކޮށް، ރައީސް ޑޮނަލްޑް ޓްރަމްޕްގެ ސަރުކާރުން ފެޑަރަލް ފަންޑު ކަނޑާލުމާ ގުޅިގެން، އެ ފައިސާ އަލުން ހޯދުމަށް ސަރުކާރާއެކު ޔުނިވާސިޓީން މަޝްވަރާ ކުރަމުންދިޔަ ދަނޑިވަޅެއްގަ އެވެ.
މުޒާހަރާގެ ބައިވެރިންނާއި ބައެއް ޔަހޫދީ ޖަމާއަތްތަކުން ބުނާ ގޮތުގައި، އިޒްރޭލުން ގާޒާއަށް ދޭ ހަމަލާތަކާއި ފަލަސްތީނުގެ ބިންތަކަށް ވެރިވެގަނެގެން އުޅޭ އުޅުމާ ދެކޮޅު ހެދުމަކީ ޔަހޫދީންނާ ދެކޮޅުވުމެއް ނޫނެވެ. އަދި ފަލަސްތީނުގެ ހައްގުތަކަށް ވަކާލާތު ކުރުމަކީ ހަރުކަށި ފިކުރަށް ތާއީދުކުރުން ކަމަށް ބަލައިގެން ނުވާނެ ކަމަށް ވެސް އެ ފަރާތްތަކުން ބުނެ އެވެ.
