އެމެރިކާގެ މަޝްހޫރު ލަވަކިޔުންތެރިޔާ ޓެއިލާ ސުވިފްޓްގެ ދެ ލަވައެއް، ރައީސް ޑޮނަލްޑް ޓްރަމްޕްގެ ކެމްޕޭން ޓީމާއި ވައިޓް ހައުސް އިން ވޭތުވެދިޔަ ހަފުތާގައި ސޯޝަލް މީޑިއާގައި އާންމުކުރި ވީޑިއޯތަކެއްގައި ބޭނުންކުރުމަށް ފަހު، އެ ވީޑިއޯތަކުން ލަވަތައް އުނިކޮށްފި އެވެ.
ޓްރަމްޕާ ބެހޭ ގޮތުން ސުވިފްޓް ފަހަކަށް އައިސް އެއްވެސް ވާހަކައެއް ދައްކާފައި ނުވި ނަމަވެސް، 2024 ވަނަ އަހަރުގެ ރިޔާސީ އިންތިހާބުގައި އޭނާ ތާއީދުކުރީ ޓްރަމްޕްގެ ވާދަވެރިޔާ، އޭރުގެ ނައިބު ރައީސް ކަމަލާ ހެރިސް އަށެވެ. އަދި 2020 ވަނަ އަހަރުގެ ކެމްޕޭން ދުވަސްވަރު ސުވިފްޓް ސޯޝަލް މީޑިއާގައި ބުނެފައިވަނީ، އޭނާ ރައީސްކަމަށް އަންނަން އެމެރިކާގެ ރައްޔިތުން ބޭނުންނުވާކަން ޓްރަމްޕަށް ވަރަށް ރަނގަޅަށް އެނގިވަޑައިގަންނަވާނެ ކަމަށެވެ.
ޓްރަމްޕް ވަނީ ތަކުރާރުކޮށް ސުވިފްޓަށް ފާޑުވިދާޅުވެފަ އެވެ. ސުވިފްޓް، ކަމަލާ ހެރިސްއަށް ތާއީދުކުރި ފަހުން ޓްރަމްޕް ސޯޝަލް މީޑިއާގައި ބުނެފައިވަނީ އޭނާ "ޓެއިލާ ސުވިފްޓް ދެކެ އިންތިހާއަށް ފޫހިވާ" ކަމަށެވެ. އަދި މިދިޔަ އަހަރު ޓްރަމްޕް ލިޔުއްވާފައިވަނީ، އޭނާ ސުވިފްޓް ދެކެ ފޫހިވާ ކަމަށް ބުނި ފަހުން، ސުވިފްޓްގެ މަގުބޫލުކަން ގެއްލިފައިވާކަން އެއްވެސް މީހަކަށް ފާހަގަކުރެވޭތޯ އެވެ.
ސަބްރީނާ ކާޕެންޓާ އާއި އަރިއާނާ ގްރާންޑޭ ހިމެނޭހެން ދުނިޔޭގެ މަޝްހޫރު އެތައް ފަންނާނުންނެއް ވަނީ، އެ މީހުންގެ ލަވަތައް ޓްރަމްޕްގެ ސަރުކާރުން ބޭނުން ނުކުރުމަށް އެދިފަ އެވެ.
ސޯޝަލް މީޑިއާގައި ވަރަށް ހަރަކާތްތެރިކޮށް އުޅުއްވާ ޓްރަމްޕްގެ މުވާސަލާތީ ޓީމުން ދަނީ މަޝްހޫރު އެތައް ލަވަތަކެއް ބޭނުންކޮށްގެން ވީޑިއޯތައް އާންމުކުރަމުންނެވެ. އޭގެ ތެރޭގައި އިމިގްރޭޝަން ހަރުކަށި ކުރުމާއި، އީރާނާ ދެކޮޅަށް އެމެރިކާ ސިފައިން ހިންގި އޮޕަރޭޝަންތަކާއި، ވެނެޒުއޭލާގެ ކުރީގެ ރައީސް ނިކޮލަސް މަދޫރޯ ހައްޔަރުކުރުމާ ގުޅޭ މަންޒަރުތައް ހިމެނޭ ވީޑިއޯތައް ހިމެނެ އެވެ.
