ކޮލަމްބިއާގެ އާ ރައީސްގެ ގޮތުގައި ކަނާތު ފިޔައިގެ ޕޮޕިއުލިސްޓް ލީޑަރު އަބެލާޑޯ ޑި ލާ އެސްޕްރިއެއްލާ މަގާމުގެ ހުވާކުރެއްވިތާ މަދު ގަޑިއިރުތަކެއްގެ ތެރޭގައި، އެމެރިކާ އިން އެ ގައުމަށް އެއް ބިލިއަން ޑޮލަރުގެ އެހީއެއް ދިނުމަށް ވައުދުވެއްޖެ އެވެ.
އެމެރިކާގެ ރައީސް ޑޮނަލްޑް ޓްރަމްޕަށް ވަރަށް ބޮޑަށް ތާއީދުކުރައްވާ އަދި ކެމްޕޭން ތެރޭގައި ޓްރަމްޕްގެ ސިޔާސަތުތަކާ އެއްގޮތަށް ވާހަކަދެއްކެވި އެސްޕްރިއެއްލާ، ރައީސްކަމުގެ ފުރަތަމަ ތަގުރީރުގައި ވަނީ މަސްތުވާތަކެތީގެ ކާޓެލްތަކާ ދެކޮޅަށް "ވަރުގަދަ ހަނގުރާމައެއް" ކުރައްވާނެ ކަމަށް ވައުދުވެވަޑައިގެންފަ އެވެ.
އެމެރިކާގެ ސްޓޭޓް ޑިޕާޓްމަންޓުން ބުނި ގޮތުގައި، މި "ސެކިއުރިޓީ ޕެކޭޖް" ނުވަތަ ސަލާމަތީ އެހީގެ ސަބަބުން، އިންތިޒާމުވެގެން ހިންގާ ކުށްތަކާއި ގަވާއިދާ ހިލާފަށް ހިޖުރަކުރުން ހުއްޓުވުމަށް ދެ ގައުމުން ގެންގުޅޭ "އެއްގޮތް އަމާޒުތަކަށް" ވާސިލްވުމަށް އެހީތެރިވެދޭނެ އެވެ. މީގެ ކުރިން ކޮލަމްބިއާގައި އޮތް ވައަތު ފިޔަހުގެ ސަރުކާރުން މި ކަންކަމުގައި ގެންގުޅުނު ސިޔާސަތުތަކަށް ޓްރަމްޕް ވަނީ ތަކުރާރުކޮށް ފާޑުވިދާޅުވެފަ އެވެ.
ޓްރަމްޕްގެ ދެވަނަ ދައުރުގައި ލެޓިން އެމެރިކާގެ ގައުމުތަކަށް ދޭ ސަމާލުކަން ވަނީ އިތުރުކޮށްފަ އެވެ. އެގޮތުން އޭނާގެ ސިޔާސަތުތަކަށް ތާއީދުކުރާ ލީޑަރުންނާ ގާތް ގުޅުމެއް ބާއްވަމުންދާއިރު، ހިޔާލު ތަފާތުވާ ލީޑަރުންނާ އޭނާ ގެންދަވަނީ ދުރުހެލިވަމުންނެވެ.
މިދިޔަ ޖޫން މަހު ބޭއްވި އިންތިހާބުގެ ކުރިން ޓްރަމްޕް ވިދާޅުވެފައިވަނީ، އެސްޕްރިއެއްލާއަށް އެމެރިކާގެ ފުރިހަމަ ތާއީދާއި ބާރު އޮންނާނެ ކަމަށެވެ. އަދި އޭނާ އިންތިހާބުވުމުން ކޮލަމްބިއާ އާއި އެމެރިކާއާ ދެމެދު އޮންނަ ގުޅުން މިހާރަށް ވުރެ ބޮޑަށް ރަނގަޅުވާނެ ކަމަށް ޓްރަމްޕް ލަފާކުރެއްވި އެވެ.
