މި މަހުގެ ކުރީކޮޅު އައި ބޮޑު ބިންހެލުމުގައި ސަލާމަތްވި ސީރިއާ ފިރިހެން ކުއްޖެއްގެ ހުވަފެން ހަގީގަތަކަށް ވާން ގާތްވެއްޖެ އެވެ.
ސީރިއާގައި އިމާރާތުގެ ދަށުން ނަބީލް ސައީދް ސަލާމަތްކޮށްދިނީ ސައުދީ އަރަބިއްޔާގެ ރެސްކިއު ޓީމަކުންނެވެ. އެ ޓީމުގެ މެމްބަރެއް ކައިރީގައި ނަބީލް ބުނީ އެންމެ ބޮޑު ހުވަފެނަކީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ފުޓްބޯޅަ ކުޅޭ މަންޒަރު ބެލުން ކަމަށެވެ.
އަލް އަރަބިއްޔާ ނޫހުން ބުނާ ގޮތުގައި ސައުދީ އަރަބިއްޔާއިން މިހާރު ވަނީ ރޮނާލްޑޯ ކުޅޭ މަންޒަރު ބަލަން އެ ގައުމަށް ދަތުރު ކުރުމުގެ ދައުވަތު ނަބީލަށް ދީފަ އެވެ.
ރޮނާލްޑޯ ކުޅޭ މަންޒަރު ބަލަން ބޭނުންވާ ކަމަށް ބުނާ ވީޑިއޯ ޓްވިޓާގައި އާއްމުވީ ފެބްރުއަރީ 16 ވަނަ ދުވަހު އެވެ. ސައުދީގެ ޖެނެރަލް އެންޓަޓެއިންމަންޓް އޮތޯރިޓީގެ ޗެއާމަން ތުރްކީ އަލަޝިކް ވަނީ އެ ވީޑިއޯ ފެނި، ނަބީލްއާ ގުޅޭ ގޮތެއް ހޯދައިފަ އެވެ.
ނަބީލް ސައުދީ އަރަބިއްޔާއަށް ދަތުރު ކުރި މަންޒަރު ފެންނަ ވީޑިއޯއެއް ޓްވިޓާގައި އާއްމުވީ ހުކުރު ދުވަހު އެވެ.
ކްރިސްޓިއާނޯ ރޮނާލްޑޯ މިހާރު ކުޅެނީ ސައުދީގެ އަލް ނަސްރް ފުޓްބޯޅަ ކްލަބަށެވެ. އެ ކްލަބުގެ ރައީސް މުސައްލީ އަލް މުއައްމާރް ކުރި ޓްވީޓެއްގައި ވަނީ ނަބީލް އާއި އޭނާގެ އާއިލާއަށް މަރުހަބާ ކިޔައިފަ އެވެ.
މި މަހުގެ ކުރީކޮޅު ތުރުކީ އާއި ސީރިއާއަށް އައި ބިންހެލުމުގައި 47،000 އަށް ވުރެ ގިނަ މީހުން މަރުވި އެވެ.
