ޔަމަނުގެ ހޫތީން މެދުނުކެނޑި ދެމުންދާ ހަމަލާތަކާ ގުޅިގެން ސައުދީ އަރަބިއްޔާއަށް އަސްކަރީ އެހީތެރިކަން ބޭނުންވެދާނެ ކަމަށާއި، ޕާކިސްތާނު ވެސް ހިމެނޭ ތިން ގައުމުގެ ދިފާއީ އެއްބަސްވުމުގެ ދަށުން އެހީތެރިކަން ފޯރުކޮށްދޭން ތުރުކީ އޮތީ ތައްޔާރަށް ކަމަށް އެ ގައުމުގެ ފޮރިން މިނިސްޓަރު ހާކާން ފިދާން ހޮނިހިރު ދުވަހު ވިދާޅުވެއްޖެ އެވެ.
އެންޓީވީ ބްރޯޑްކާސްޓަރަށް ދެއްވި އިންޓަވިއުއެއްގައި ފިދާން ވިދާޅުވީ، ސައުދީ އަރަބިއްޔާގެ އިސްތިގުލާލަށާއި ސަރަހައްދީ ނަޒާހަތްތެރިކަމަށް ވަރަށް ނުރައްކާތެރި ހަމަލާތަކެއް އަމާޒުވަމުންދާ ތަން ފެންނަމުންދާ ކަމަށެވެ. އަދި ތިން ގައުމުގެ މެދުގައި އޮތް އިއްތިހާދުގެ އެއްބަސްވުމުގެ ދަށުން މިކަމުގައި ސައުދީއާއެކު ސާބިތުކަމާއެކު ތުރުކީ އޮތްކަން ފާހަގަކުރައްވައި، ހާއްސަކޮށް ފަންނީ ކަންކަމުގައި ސައުދީއަށް ބޭނުންވާ އަސްކަރީ އެހީތެރިކަން ފޯރުކޮށްދިނުމުގައި އެއްވެސް މައްސަލައެއް ނެތް ކަމަށް އޭނާ ވިދާޅުވި އެވެ.
"މައްކާ ޖޮއިންޓް ޑިފެންސް އެގްރީމަންޓް" ގެ ނަމުން ނަންދީފައިވާ މި ދިފާއީ އެއްބަސްވުމުގައި މިދިޔަ މަހު ތުރުކީ، ސައުދީ އަރަބިއްޔާ އަދި ޕާކިސްތާނުން ސޮއިކޮށްފައިވާއިރު، އެ އެއްބަސްވުމުގައިވާ ގޮތުން މީގެ ތެރެއިން ކޮންމެ ގައުމަކަށް ދޭ ހަމަލާއަކީ ތިން ގައުމަށް ދޭ ހަމަލާއެއްގެ ގޮތުގައި ބެލެވޭނެ އެވެ.
ޔަމަނުގެ އެންމެ އާބާދީ ބޮޑު ސަރަހައްދުތައް ކޮންޓްރޯލް ކުރާ ހޫތީން، މިދިޔަ ޖުލައި މަހު ރިޔާދްއާ ދެކޮޅަށް ކަނޑުގެ ބްލޮކޭޑެއް އިއުލާން ކުރި ފަހުން ދަނީ ސައުދީއަށް ހަމަލާތައް ދެމުންނެވެ. މިއީ މިދިޔަ ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން އީރާނަށް ދިން ހަމަލާތަކާއެކު ފެށުނު ފުޅާ ހަނގުރާމައިގެ އާ ބައެކެވެ.
ހޫތީންގެ ހަމަލާތައް ސައުދީގެ ސިޓީތަކަށާއި، ހަކަތަ އުފައްދާ ވަސީލަތްތަކުގެ އިތުރުން މުދާ އުފުލާ ބޯޓުފަހަރަށް އަމާޒުވެފައިވާއިރު، މީގެ ސަބަބުން ދުނިޔޭގެ ތެލުގެ ސަޕްލައިއަށާއި ރަތްކަނޑުގެ މަގުން ކުރާ ވިޔަފާރިއަށް ވަނީ ނުރައްކާވެފަ އެވެ. އަދި ހޮރްމޫޒް ކަނޑުއޮޅިން ދަތުރުފަތުރު ކުރުމަށް ވެސް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
ހޫތީންނާ ދެކޮޅަށް އަސްކަރީ އެހީތެރިކަން ފޯރުކޮށްދިނުމަށް ސައުދީން އެދެމުންދިޔަ ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ އެކަމަށް އިންކާރު ކުރައްވާފަ އެވެ. ހޫތީންނާ ދެކޮޅަށް އެމެރިކާއިން ދެ މަސް ދުވަސް ވަންދެން ބޮން އެޅުމަށްފަހު، މިދިޔަ އަހަރު އެ ޖަމާއަތުން ވަނީ އެމެރިކާއާއެކު ހަމަލާ ބަދަލުކުރުން ހުއްޓާލުމުގެ އެއްބަސްވުމެއްގައި ސޮއިކޮށްފަ އެވެ.
ފިދާން ވިދާޅުވީ ސައުދީ އަރަބިއްޔާއަކީ މި ހަނގުރާމައިގައި ބައިވެރިވާން ބޭނުންވާ ގައުމަކަށް ނުވާއިރު، އެމެރިކާ އާއި އީރާނުގެ ހަނގުރާމައިގެ ބައެއްގެ ގޮތުގައި ސައުދީ ހެދުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ހަނގުރާމަ ހުއްޓާލުމަށް ހުރިހާ ފަރާތްތަކަށް ހުށަހެޅުންތަކެއް ހުށަހަޅާފައިވާ ކަމަށް ވިދާޅުވި ނަމަވެސް، އެކަމުގެ ތަފްސީލެއް އޭނާ ނުދެއްވަ އެވެ.
ނޭޓޯގެ ދެވަނައަށް އެންމެ ބޮޑު އަސްކަރިއްޔާ އޮންނަ ތުރުކީން ބުނެފައިވަނީ، ނިއުކްލިއާ ބާރެއް ކަމަށްވާ ޕާކިސްތާނާއި ތެޔޮ އެކްސްޕޯޓް ކުރާ އެންމެ ބޮޑު ގައުމު ކަމަށްވާ ސައުދީއާއެކު ވެފައިވާ މި އެއްބަސްވުމަކީ އިތުރު ގައުމުތަކަށް ވެސް ހުޅުވާލެވިފައިވާ އެއްބަސްވުމެއް ކަމަށެވެ. އަދި މިއީ މިހާރު އޮތް އެއްވެސް އިއްތިހާދެއްގެ ބަދަލުގައި އެކުލަވާލި އެއްބަސްވުމެއް ނޫން ކަމަށް ވެސް ތުރުކީން ބުނެ އެވެ.
ޕާކިސްތާނުން ބުނެފައިވަނީ ހޫތީންގެ ހަމަލާތަކާ ގުޅިގެން މައްކާ އެއްބަސްވުމުގެ ދަށުން އަސްކަރީ ފިޔަވަޅެއް އެޅުމާ މެދު އިސްލާމްއާބާދުން އަދި މަޝްވަރާ ކޮށްފައި ނުވާ ކަމަށެވެ. ނަމަވެސް "ވަގުތު ޖެހުމުން" ޕާކިސްތާނުން ފިޔަވަޅު އަޅާނެ ކަމަށް އެ ގައުމުން ބުނެފައިވެ އެވެ.
