ލިޒްބަން, ޕޯޗުގަލް (ސެޕްޓެމްބަރު 24) - އެމެރިކާ، މެކްސިކޯ އަދި ކެނަޑާގައި މިދިޔަ ޖޫން/ޖުލައި މަހު ކުރިއަށްދިޔަ ފީފާ ވޯލްޑް ކަޕަށް ފަހު ޕޯޗުގަލްގެ ގައުމީ ފުޓްބޯޅަ ޓީމުން ރިޓަޔާކުރަން ވިސްނި ކަމަށް އެ ޓީމުގެ ކެޕްޓަން، ކްރިސްޓިއާނޯ ރޮނާލްޑޯ ބުނެފި އެވެ.
ޕޯޗުގަލް، ވޯލްޑް ކަޕުން ކެޓީ ގަދަ 16 ބުރުގައި ސްޕެއިން އަތުން ބަލިވެގެންނެވެ. މުބާރާތުގެ ޗެމްޕިއަންކަން ހޯދީ ވެސް ސްޕެއިނުންނެވެ.
އުމުރުން 41 އަހަރުގެ ރޮނާލްޑޯ ވަނީ، ޕޯޗުގަލްގެ އާ ކޯޗު، ޖޯޖް ޖީސޫސް ނެގި ފުރަތަމަ ސްކޮޑުގައި ހިމެނިފަ އެވެ. ރިޕޯޓްތައް ބުނާގޮތުން ރޮނާލްޑޯ، ފުޓްބޯޅަ ކެރިއަރު ކުރިއަށްގެންދިއުން ގުޅިފައި އޮތީ 1000 ގޯލު ހަމަކުރުމާ އެވެ. އެ އަދަދު ހަމަކުރަން މިހާރު ރޮނާލްޑޯ އަށް ބޭނުންވަނީ 21 ގޯލެވެ.
މި ފަހަރުގެ ނޭޝަންސް ލީގުގައި ޕޯޗުގަލް ކުޅޭ ފުރަތަމަ މެޗުތަކުގެ ކުރިން ރޮނާލްޑޯ ގާތުގައި ނޫސްވެރިއަކު އެހީ ވޯލްޑް ކަޕަށް ފަހު ރިޓަޔާކުރުމާ މެދު ވިސްނިންތޯ އެވެ.
"އަހަރެން ވިސްނިން (ރިޓަޔާކުރަން). އަބަދުވެސް އަހަރެން މި ދަނީ އަމިއްލަ ނިންމުންތަކާ މެދު ވިސްނަމުން. މުސްތަގުބަލާ މެދު ވެސް ވިސްނަމުން. އަދި، މި ހިނގަމުންދާ ވަގުތުގެ ކަންކަމާ މެދު ވެސް ވިސްނަމުން. އަހަންނަކީ ވަރަށް ބޮޑަށް ކަންކަމާ ވިސްނާ މީހެއް،" ރޮނާލްޑޯ ބުންޏެވެ.
ޕޯޗުގަލްގެ އާ ކޯޗު ޖީސޫސް ނެގި ފުރަތަމަ ސްކޮޑުގައި ރޮނާލްޑޯ ހިމަނައިފި
ޕޯޗުގަލްގެ އާ ކޯޗު ޖޯޖް ޖީސޫސް އެކުލަވާލި ފުރަތަމަ ސްކޮޑުގައި، އުމުރުން 41 އަހަރުގެ ކްރިސްޓިއާނޯ ރޮނާލްޑޯ ހިމަނައިފި. ކުރިއަށް އޮތް ނޭޝަންސް ލީގުގެ މެޗުތަކަށް ރޮނާލްޑޯ ނެގިއިރު، މިއީ އޭނާގެ ކެރިއަރުގެ ފަހު އަހަރަށް ވުން އެކަށީގެންވާ ކަމަށް އޭނާ ވަނީ މީގެ ކުރިން ބުނެފައި
ގައުމީ ޓީމާ އެކު ކުރިއަށްދާން ނިންމި އެންމެ ބޮޑު ސަބަބަކީ ޕޯޗުގަލްގެ ފުޓްބޯޅަ ފެޑެރޭޝަންގެ ރައީސް އާއި އާ ކޯޗު ޖީސޫސްގެ ފަރާތުން ލިބުނު އިތުބާރާއި އަމިއްލަ ނަފްސާ މެދު އޮތް ޔަގީންކަމެއްގެ ބޮޑު ކަމުން ކަމަށެވެ. ޖީސޫސް އަކީ ރޮނާލްޑޯއާ އެކު، މިދިޔަ ސީޒަނުގައި ސައުދީ ޕްރޮފެޝަނަލް ލީގުގެ އަލް ނަސްރުގައި މަސައްކަތްކުރި ކޯޗެކެވެ.
"އަދިވެސް އަހަންނަށް ގައުމީ ޓީމަށް ފައިދާ ހުރި އެތައް ކަމެއް ކޮށްދެވިދާެނެ ކަމަށް ގަބޫލުކުރަން،" ޕޯޗުގަލްއާ އެކު، ޔޫރޯ އާއި ދެ ނޭޝަންސް ލީގު ކާމިޔާބުކުރި ރޮނާލްޑޯ ބުންޏެވެ.
"އަހަރެން ގައުމީ ޓީމުގައި މި ހުރީ ޕޯޗުގަލް އިން އަހަންނަށް ބަރޯސާވާތީވެ. އަހަންނަށް ބަރޯސާނުވާނަމަ، މިއަދު ވެސް ޓީމުން ދާން ތައްޔާރު، އެކަމަކު، މި ވަގުތު އެ މީހުންނަށް އަހަރެން ބޭނުންވޭ،"
އެންމެ ފަހުން ނޭޝަންސް ލީގު ކާމިޔާބުކުރި ޓީމުގެ ހައިސިއްޔަތުން މި ފަހަރުގެ މުބާރާތާ ކުރިމަތިލާއިރު، އަނެއްކާ ވެސް ތަށި ހޯދުމަކީ އަޒުމެއް ކަމަށް ކަނޑައެޅުން މުހިންމު ކަމަށް ރޮނާލްޑޯ ވަނީ ބުނެފަ އެވެ.
މީގެ 22 އަހަރު ކުރިން ޕޯޗުގަލް އަށް ކުޅެން ފެށި ރޮނާލްޑޯ އަކީ ބައިނަލްއަގުވާމީ ފުޓްބޯޅައިގައި ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އޮތް ކުޅުންތެރިޔާ އެވެ. ހަ ވޯލްޑް ކަޕެއްގައި ޕޯޗުގަލް އަށް ކުޅެދިން ރޮނާލްޑޯ ވަނީ، ގައުމީ ޓީމަށް ކުޅެދިން، 233 މެޗުން 146 ލަނޑު ޖަހައިފަ އެވެ.
