ޔަމަނުގައި ހަރަކާތްތެރިވާ އީރާނުގެ މަދަދުލިބޭ ހޫތީ ހަނގުރާމަވެރިން، ސައުދީ އަރަބިއްޔާގެ ވެރިރަށް ރިޔާދަށާއި އެ ގައުމުގެ ރަތްކަނޑުގެ އައްސޭރިފަށުގައި ހުރި ހަކަތައާ ބެހޭ މަރުކަޒުތަކަށް ޑްރޯން އަދި ބެލިސްޓިކް މިސައިލް ހަމަލާތަކެއް ދީފި ކަމަށް ބުނެފި އެވެ.
ސައުދީ ކަމާބެހޭ ފަރާތްތަކުން ބުނި ގޮތުގައި، ހޮނިހިރު ދުވަހު ރިޔާދަށް އަމާޒުކޮށް ފޮނުވާލި ބެލިސްޓިކް މިސައިލެއް ވަނީ ވައިގެ ތެރޭގައި ހުއްޓުވައި ގޮއްވާލާފަ އެވެ. ނަމަވެސް، އިތުރު ހަމަލާތަކެއްގެ ތަފްސީލެއް ނުވަތަ މީހަކަށް ގެއްލުމެއް ލިބުނު ކަމެއް ސައުދީން ކަށަވަރުކޮށްދީފައެއް ނުވެ އެވެ.
މި ހަމަލާތަކާ ގުޅިގެން، ހޮނިހިރު ދުވަހު ރިޔާދްގެ ބައިނަލްއަގުވާމީ ވައިގެ ބަނދަރު ކައިރީގައި ހުރި ތެޔޮ ރައްކާކުރާ ތަންތަނުން ކަޅު ދުން އަރަމުންދިޔަ މަންޒަރު ފެނިފައިވާއިރު، އެ ސަރަހައްދުގެ ވައިގެ ދަތުރުފަތުރަށް ވަނީ ވަގުތީ ގޮތުން ބުރޫއަރާފަ އެވެ.
ހޫތީން ޖުލައި މަހުން ފެށިގެން ސައުދީ އަރަބިއްޔާއަށް ދޭ ހަމަލާތައް ވަރުގަދަކުރި ފަހުން، ވެރިރަށް ރިޔާދްގައި ވައިގެ ހަމަލާއަކުން ރައްކާތެރިވުމަށް އަންގައިދޭ އެލާމްގެ އަޑު އިވުނު މިއީ ފުރަތަމަ ފަހަރެވެ.
މި ހާލަތާ ގުޅިގެން އެމެރިކާގެ ސްޓޭޓް ޑިޕާޓްމަންޓުން ވަނީ މެދުއިރުމަތީގައި ތިބި އެމެރިކާ ރައްޔިތުން "ސަމާލުވެ ތިބުމަށާއި، ފްލައިޓްތައް ކެންސަލްވުމާއި ދަތުރުފަތުރުގެ އެހެނިހެން ދަތިތަކަށް ތައްޔާރުވެގެން ތިބުމަށް" އިލްތިމާސްކޮށްފަ އެވެ.
އެމެރިކާގެ ސްޓޭޓް ޑިޕާޓްމަންޓުން ނެރުނު ބަޔާނެއްގައި ބުނެފައިވަނީ، އީރާނުގެ އެހީތެރިކަން ލިބޭ ހޫތީން ސައުދީ އަރަބިއްޔާގެ އާންމު އެއާޕޯޓްތަކަށާއި އެހެނިހެން ތަންތަނަށް ހަމަލާދީފައިވާ ކަމަށާއި، މި އަސްކަރީ ކުރިމަތިލުންތައް ވަރަށް އަވަހަށް އިތުރަށް ވަރުގަދަވެގެން ދިއުމުގެ ފުރުސަތު އެބައޮތް ކަމަށެވެ.
ސައުދީ އިސްވެ އޮންނަ ކޯލިޝަނުގެ ތަރުޖަމާނު ނެރުއްވި ބަޔާނެއްގައި ވިދާޅުވީ، ބީޝް، ތާއިފް، ފަރަސާން އަދި ޔަންބޫ ފަދަ ސިޓީތަކުގެ އާންމުންނަށް އަމާޒުކޮށް ދޭން އުޅުނު ހަމަލާތަކެއް ވައިގެ ދިފާއީ ނިޒާމުން ހުއްޓުވާފައިވާ ކަމަށެވެ.
އިންޓަނެޓް މެދުވެރިކޮށް ހޫތީންގެ އަސްކަރީ ތަރުޖަމާނު ޔަހްޔާ އަލް-ސަރީއާ ނެރުނު ބަޔާނެއްގައި ބުނެފައިވަނީ، ރިޔާދްގެ މުހިންމު ތަންތަނަށާއި، އައްސޭރިފަށުގެ ޔަންބޫގައި ހުންނަ ސައުދީގެ ދައުލަތުގެ ތެޔޮ ކުންފުނި، އަރާމްކޯގެ މަރުކަޒުތަކަށް ހަމަލާދިނުމަށް "ގިނަ އަދަދެއްގެ ބެލިސްޓިކް އަދި ކްރޫޒް މިސައިލާއި ޑްރޯން" ބޭނުންކޮށްފައިވާ ކަމަށެވެ.
އޭނާ އިތުރަށް ބުނި ގޮތުގައި، މި ހަމަލާތަކަކީ މިހާރު ހޫތީންގެ ކޮންޓްރޯލްގެ ދަށުގައި އޮތް ޔަމަނުގެ ވެރިރަށް ސަނާއަށް އަމާޒުކޮށް "ސައުދީ ދުޝްމަނުން" ދެމުންދާ ޖަރީމާތަކަށް ރައްދު ދިނުމުގެ ގޮތުން ދިން ހަމަލާތަކެކެވެ.
