ސައުދީ އަރަބިއްޔާއަށް ޑްރޯނާއި މިސައިލް ހަމަލާތަކެއް ދިނުމާ ގުޅިގެން މުޅި ސަރަހައްދުގެ މަސްރަހު ނުތަނަވަސްވެފައި ވަނިކޮށް، އެމެރިކާ އާއި އެ ގައުމުގެ ބައިވެރިން ބޮޑު ހަމަލާއެއް ދޭން ތައްޔާރުވަމުންދާ ކަމުގެ މައުލޫމާތު ލިބިފައިވާ ކަމަށް ބުނެ، އެފަދަ ފިޔަވަޅެއް ނޭޅުމަށް އީރާނުން އާދީއްތަ ދުވަހު އިންޒާރު ދީފި އެވެ.
އީރާނުގެ އަސްކަރިއްޔާގެ މަރުކަޒީ ކޮމާންޑުން އެ ގައުމުގެ ދައުލަތުގެ މީޑިއާ މެދުވެރިކޮށް ބުނީ، އެމެރިކާއިން އާ ހަމަލާއެއް ދީފި ނަމަ، އެމެރިކާގެ އަސްކަރީ މަރުކަޒުތަކަށާއި މަސްލަހަތު އޮތް ތަންތަނަށް މެދުނުކެނޑި ބަދަލުހިފުމުގެ ހަމަލާތައް ދޭނެ ކަމަށެވެ. އަދި އެފަދަ ހަމަލާއެއްގައި ބައިވެރިވާ އެމެރިކާގެ ސަރަހައްދީ އެކުވެރި ގައުމުތަކަކީ ވެސް އެ ހަނގުރާމައިގެ ބައިވެރިންގެ ގޮތުގައި ބަލާނެ ކަމަށް އީރާނުން ބުންޏެވެ. ނަމަވެސް، އެމެރިކާއިން ދޭން އުޅޭ ކަމަށް ބުނާ ހަމަލާއާ ގުޅޭގޮތުން ލިބިފައިވާ މައުލޫމާތުގެ އިތުރު ތަފްސީލެއް އީރާނުން ހާމައެއް ނުކުރެ އެވެ.
މެދުއިރުމަތީގެ މަސްރަހު ނުތަނަވަސްވެ، ހީނުކުރާ ފަދަ ގޮތަކަށް ހަމަނުޖެހުންތައް އިތުރުވެދާނެ ކަމަށް ބުނެ އެމެރިކާގެ ސްޓޭޓް ޑިޕާޓްމަންޓުން ހޮނިހިރު ދުވަހު ވަނީ ސަލާމަތީ އިންޒާރެއް ނެރެފަ އެވެ. އެގޮތުން އެ ސަރަހައްދުގައި ތިބި އެމެރިކާ ރައްޔިތުން އިތުރަށް ސަމާލުވުމަށާއި، ފްލައިޓްތައް ކެންސަލްވުމާއި ވައިގެ ސަރަހައްދު ބަންދުކުރުން ފަދަ ކަންކަމަށް ތައްޔާރުވެ ތިބުމަށް އެ އިންޒާރުގައި ބުނެފައިވެ އެވެ.
އެމެރިކާ އާއި އީރާނާ ދެމެދު ހިނގަމުންދާ ކުރިމަތިލުންތަކަށް ހަތް މަސް ދުވަސް ވެފައިވާއިރު، ހަނގުރާމަ ހުއްޓާލުމަށްޓަކައި ދޫދޭން އެއްވެސް ފަރާތަކުން ބޭނުންވާ ކަމަކަށް ނުފެނެ އެވެ. ދުނިޔޭގެ ހަކަތައިގެ ބާޒާރަށް މިކަމުގެ ނޭދެވޭ އަސަރު ކުރަމުންދާއިރު، މި ހަމަނުޖެހުންތަކުގެ އަސަރު ސަރަހައްދީ އެހެން މައްސަލަތަކަށް ވެސް ދަނީ ފޯރަމުންނެވެ.
ޔަމަނުގެ ދާހިލީ ހަނގުރާމަ މި މަހު އަލުން ވަރުގަދަވެ، ރަތް ކަނޑުގެ އައްސޭރިފަށުގެ ބޮޑު ސަރަހައްދެއްގެ ކޮންޓްރޯލް ހޯދާފައިވާ، އީރާނުގެ މަދަދުލިބޭ ހޫތީން ހޮނިހިރު ދުވަހު ބުނީ ސައުދީ އަރަބިއްޔާގެ ވެރިރަށް ރިޔާދަށާއި، ރަތް ކަނޑުގެ އައްސޭރީގައި އޮންނަ ޔަންބޫ ބަނދަރުގެ ތެޔޮ މަރުކަޒަކަށް ހަމަލާދީފައިވާ ކަމަށެވެ.
ރޭގަނޑުގެ ވަގުތެއްގައި ރިޔާދުން ބާރުގަދަ ގޮވުންތަކެއްގެ އަޑު އިވުމަށްފަހު، އެ ސިޓީގެ މައި ބައިނަލްއަގުވާމީ އެއާޕޯޓް ހިމެނޭ ސަރަހައްދުން ބޯ ކަޅު ދުން އަރަމުންދާ މަންޒަރު ރޮއިޓާސްގެ ވީޑިއޯތަކުން ފެނެ އެވެ.
މި ހާދިސާއާ ގުޅޭގޮތުން ނުވަތަ ހޫތީންގެ ދައުވާތަކާ ގުޅޭގޮތުން ސައުދީ އަރަބިއްޔާއިން ރަސްމީކޮށް އެއްޗެއް ބުނެފައެއް ނުވެ އެވެ. ނަމަވެސް ހޫތީންނާ ދެކޮޅަށް ހަނގުރާމަކުރާ ސައުދީ އިސްވެ އޮންނަ ކޯލިޝަނުން ބުނީ، ސައުދީއަށް ދޭން އުޅުނު އެހެން ހަމަލާތަކެއް ނާކާމިޔާބުކޮށްލާފައިވާ ކަމަށެވެ. އެމެރިކާގެ ސްޓޭޓް ޑިޕާޓްމަންޓުން ނެރުނު އިންޒާރުގައި ވެސް ވަނީ އާންމު އެއާޕޯޓްތައް ހިމެނޭހެން ސައުދީއަށް ހޫތީން ދެމުންދާ ހަމަލާތަކަށް އިޝާރާތްކޮށްފަ އެވެ.
