ސަރުކާރުން 100 ރަށެއްގައި އަޅައިދޭނެ ކަމަށް ބުނެފައިވާ ކައުންސިލް އިމާރާތްތަކުގެ ޑިޒައިން މަސައްކަތް ނުނިމޭތީ އެ މަސައްކަތް ފެށޭނެ ތާރީހެއް އަދި މުޅި މަޝްރޫއަށް ހަރަދުވާ ވަރެއް ވެސް ނޭނގޭ ކަމަށް ލޯކަލް ލޯކަލް ގަވަމެންޓް މިނިސްޓްރީން ބުނެފި އެވެ.

ކައުންސިލް އިމާރާތްތައް އެޅުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. ސަރުކާރެއް އަހަރެއް ފާހަގަކުރަން ބޭއްވި ރަސްމިއްޔާތުގައި ރައީސް ވިދާޅުވި ގޮތުގައި ކައުންސިލް އިމާރާތްތައް އަޅަން ހިންގަނީ ދެ މަޝްރޫއެކެވެ. އަދި މި ދައުރުގެ ތެރޭގައި މި ހުރިހާ އިމާރާތްތަކެއް ނިންމާނެ ކަމަށް ވެސް ރައީސް ވިދާޅުވި އެވެ.

"އެއް މަޝްރޫއާކީ، ޗައިނާ ސަރުކާރުން ހިލޭ އެހީގެ ދަށުން 50 ރަށެއްގެ ކައުންސިލް އިމާރާތް އެޅުމުގެ މަޝްރޫއު. އިރާދަކުރެއްވިއްޔާ މި އަންނަ އަހަރު އަޅައިދޭނަން. 50 ރަށެއްގެ ކައުންސިލް އިމާރާތް. އަނެއް މަޝްރޫއަކީ، ކޮންޓްރެކްޓާ ފައިނޭންސް އުސޫލުން، ސަރުކާރުން އެ އޮންނަ އުސޫލަކުން ޕޭކުރާގޮތަށް، އަދި އިތުރު 50 ރަށުގައި އިމާރާތް އަޅާގޮތަށް." ރައީސް ވިދާޅުވި އެވެ.

"އެހެންވީމާ، ޖުމްލަ 100 ރަށުގެ ކައުންސިލް އިމާރާތް، އިރާދަކުރެއްވިއްޔާ މި އަންނަ އަހަރު އަޅަން ފަށާނެ. މި ދައުރު ތެރޭގައި ނިންމާނަން."

މި މަސައްކަތް ހިނގަމުންދާ ގޮތުގެ މައުލޫމާތު ހޯދަން "އަދަދު" އިން ހުށަހެޅި އާރުޓީއައިއެއްގެ ޖަވާބުގައި ކައުންސިލް މިނިސްޓްރީން ބުނީ ޗައިނާ ސަރުކާރުގެ ހަރަދުގައި ހިންގާ މަޝްރޫއުގެ ދަށުން އިމާރާތްކުރާ އޮފީސްތަކުގެ ޑިޒައިން އަދި މުޅިން ނުނިމޭ ކަމަށެވެ. އެހެންވެ މި މަޝްރޫއުގެ މަސައްކަތް ބީލަމަށް ހުޅުވާލާ އަދި އެ މަޝްރޫއުގެ މަސައްކަތް ފަށާނެ ވަކި ދުވަހެއް ކަނޑައަޅާފައި ނުވާ ކަމަށް ވެސް އެ މިނިސްޓްރީން ބުންޏެވެ.

ހަމަ އެގޮތަށް ކޮންޓްރެކްޓާ ފައިނޭންސިންގެ ދަށުން އަޅާ އިމާރާތްތަކުގެ ކޮންޓްރެކްޓުގައި އަދި ސޮއި ނުކުރާ ކަމަށް ކައުންސިލް މިނިސްޓްރީން ބުންޏެވެ. އަދި އެ މަޝްރޫއުގެ ދަށުން އިމާރާތް ކުރުމުގެ އަމަލީ މަސައްކަތް އަދި ބަޔަކާ ހަވާލުކޮށްފައި ނުވާ ކަމަށް ވެސް އެ މިނިސްޓްރީން ބުންޏެވެ. މި މަސައްކަތަށް ހަރަދު ވާނެ ވަރެއް ވެސް މިނިސްޓްރީގެ ޖަވާބުގައި ނެތެވެ.

ސަރުކާރުން ކުރިން ބުނެފައި ވަނީ ކޮންޓްރެކްޓާ ފައިނޭންސިންގެ ދަށުން ކައުންސިލް އިމާރާތްތައް އަޅާ ރަށްތައް ހޮވާނީ އާންމުންގެ ހިޔާލު ހޯދައިގެން ކަމަށެވެ. އަދި ކައުންސިލުތައް ކަނޑައަޅާނެ އުސޫލެއް އެކުލަވާލާފައިވާ ކަމަށް ވެސް މީގެ ނުވަ މަސް ދުވަސް ކުރިން ބޭއްވި ނޫސްވެރިންގެ ބައްދަލުވުމެއްގައި ކައުންސިލް ލޯކަލް ގަވަމެންޓު މިނިސްޓަރު، އާދަމް ޝަރީފް ވިދާޅުވެފައިވެ އެވެ.

އޭގެ ފަހުން ބޭއްވި "ފަނޯއްލަ ދަރުބާރު 2024" ގައި އާދަމް ޝަރީފް ވަނީ ޗައިނާ ސަރުކާރުގެ އެހީގައި އަޅާ އިމާރާތްތަކުގެ އަމަލީ މަސައްކަތް ވެސް މި އަހަރުގެ ތެރޭގައި ފެށޭނެ ކަަމަށް ވެސް ވިދާޅުވެފަ އެވެ. އެކަމަކު މިއަދާ ހަމައަށް މި އިމާރާތްތައް އަޅާނެ ގޮތުގެ އިތުރު އެއްވެސް ތަފުސީލެއް ހިއްސާކޮށްފައި ނުވެ އެވެ.