ރަސްމާލެ ވިއްކުމާ ދެކޮޅަށް އަންނަ ހުކުރު ދުވަހު މާލޭގައި ބާއްވަން ނިންމާފައިވާ ބޮޑު އެއްވުމުގައި ބައިވެރިވާނެކަމަށް ކުރީގެ ނައިބު ރައީސް، ފައިސަލް ނަސީމް ވެސް ވިދާޅުވެއްޖެ އެވެ.
ފައިސަލްގެ ކެމްޕޭން ހިންގާ ރަސްމީ އެކައުންޓުން ސޯޝަލް މީޑިއާގައި ޕޯސްޓުކޮށްފައިވާ ވީޑިއޯ އިންޓަވިއުކޮޅެއްގައި ފައިސަލް ވިދާޅުވީ ރަސްމާލެ ވިއްކާލުމާ ދެކޮޅަށް ހުރިހާ އެންމެން ވެސް ނުކުންނަން ޖެހޭ ކަމަށް ގަބޫލުކުރައްވާ ކަމަށެވެ.
"އާދެ އަޅުގަނޑު ބައިވެރިވާނަން އިނގޭތޯ ރަސްމާލެ ވިއްކާލުމާ ދެކޮޅަށް ބާއްވާ ރެލީގައި، އަޅުގަނޑު ގަބޫލުކުރާ ގޮތުގައި ދިވެހިރައްޔިތުންގެ ހައްގުގައި، މުޅި ގައުމުގެ ހައްގުގައި، މި ކަމުގައި ހުރިހާ އެންމެން ވެސް ނުކުންނަން އެބަޖެހޭ،" ފައިސަލް ވިދާޅުވި އެވެ.
ރަސްމާލެ ވިއްކާލުމާ ދެކޮޅަށް މަސައްކަތް ކުރުމަށް އުފައްދައިފައިވާ ގައުމީ ހަރަކާތުން އަންނަ ހުކުރު ދުވަހު ބާއްވާ އެއްވުމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވެސް ބައިވެރިވެވަޑައިގަންނަވާނެކަން އެމަނިކުފާނުގެ އަރިސް ބޭބޭފުޅުން ވަނީ ކަށަވަރުކޮށްދެއްވައިފަ އެވެ.
ރަސްމާލެ ވިއްކުމާ ދެކޮޅަށް ހުކުރު ދުވަހު ބާއްވާ އެއްވުމުގައި ކުރީގެ ރައީސް ޔާމީން ބައިވެރިވަނީ
އިދިކޮޅު ފަރާތްތަކުން ގުޅިގެން ބާއްވާ މި ހަރަކާތަކީ ރަސްމާލޭގެ 500 ހެކްޓަރުގެ ބިން އީގަލް ހިލްސް ކުންފުންޏަށް ދިނުމަށް ސަރުކާރުން ކުރާ މަސައްކަތާ ދެކޮޅަށް ބާއްވާ އެއްވުމެކެވެ. މި މަޝްރޫއު ކުރިއަށް ގެންދިއުމަށް ބޭނުންވާ ގާނޫނީ ބަދަލުތައް މަޖިލީހަށް ހުށަހަޅާފައިވާއިރު، މިކަމާ ގުޅިގެން ސަރުކާރަށް ދަނީ ބޮޑެތި ފާޑުކިޔުންތަކެއް އަމާޒުވަމުންނެވެ.
ރަސްމާލެ ވިއްކައިލުމާ ދެކޮޅަށް ހުކުރު ދުވަހު ބޮޑު އެއްވުމެއް ބާއްވަން ތައްޔާރުވަމުން އަންނައިރު، ރަސްމާލޭގެ 500 ހެކްޓަރުގެ ބިން އީގަލް ހިލްސް ކުންފުންޏަށް ދިނުމަށް ސަރުކާރުން ދަނީ ބާރު ސްޕީޑުގައި މަސައްކަތް ކުރަމުންނެވެ. ރަސްމާލެ ޑީލު ކުރިއަށް ގެންދިޔުމަށް ބޭނުންވާ ގާނޫނީ ބަދަލުތައް ގެންނަން މިދިޔަ ހޯމަ ދުވަހު ވަނީ މަޖިލީހަށް ވެސް ހުށަހަޅައިފަ އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރުން ހުއްޓާލިކަން ސަރުކާރުން ހާމައެއް ނުކުރެ އެވެ. ދާއިމީ އެއްބަސްވުމުގައި މި ނޮވެމްބަރު މަހު ސޮއިކުރާނެ ކަމުގެ އަޑުތައް ވަނީ ފެތުރިފަ އެވެ.
މި ޕްރޮޖެކްޓަށް ފަހިކުރުމުގެ ގޮތުން ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ގޮތުން ރަސްމާލެއިން ވިއްކާ ތަންތަނަކީ "ސަރަންޑާ އެންޑް ރީގްރާންޓް" މޮޑެލްގެ ދަށުން ތާއާބަދަށް މިލްކުވެރިކަން ލިބޭ ގޮތަށް ވިއްކާލާ ތަންތަނެވެ. މިކަމާ ދެކޮޅު މީހުން ބުނަނީ މި ގޮތަށް އޮތުމުން ރަސްމާލޭގެ ބިން ތާއާބަދަށް ދޫވީ ކަމަށެވެ.
