ގާނޫނުއަސާސީން ތަސައްވުރުކޮށްފައިވާ ފުރިހަމަ ލާމަރުކަޒީ ނިޒާމު ދެމެހެއްޓުމަށްޓަކައި އަތޮޅު ކައުންސިލްތައް އުވާލުމަށް މި ސަރުކާރުން ގާނޫނުއަސާސީއަށް ގެނައި ބަދަލު ރުޖޫއަ ކުރުމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.
އެ ޕާޓީގެ ފަރާތުން މި އިސްލާހު ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ. އަތޮޅު ކައުންސިލްތައް އުވައިލުމަށް މީގެ ކުރިން ނިންމި ނިންމުމަކީ ރައީސުލްޖުމްހޫރިއްޔާގެ އަމިއްލަ ވިސްނުންފުޅަށް ގެންނަން އުޅުނު ބަދަލެއްގެ ގޮތުގައި ބިލުގައި ފާހަގަކޮށްފައިވެ އެވެ.
މި ބަދަލާ ގުޅިގެން ބާއްވަންޖެހޭ އިންތިހާބުތަކާއި، އިދާރީ އަދި މާލީ ގޮތުން ހަމަޖައްސަންޖެހޭ ކަންކަމުގެ އުސޫލުތައް ބަޔާންކުރާ އިސްލާހުތައް އެއް މަސް ދުވަހުގެ ތެރޭގައި މަޖިލީހަށް ހުށަހަޅަންޖެހޭނެ ކަމަށް ބިލުގައި ބުނެ އެވެ. އެންމެ ފަހުން ބޭއްވި ކައުންސިލް އިންތިހާބުަގައި އަތޮޅު ކައުންސިލްތައް އިންތިހާބެއް ނުކުރެ އެވެ.
އަތޮޅު ކައުންސިލްތައް އުވާލި ބަދަލަކީ އެކަށީގެންވާ ދިރާސާއެއް ނުވަތަ ފުޅާ ދާއިރާއެއްގައި މަޝްވަރާކުރުމެއް ނެތި ގެނައި ބަދަލެއް ކަމަށްވެސް ބިލުގައި ބަޔާންކޮށްފައިވެ އެވެ. ގާނޫނުއަސާސީގެ 230 ވަނަ މާއްދާގައި ރާއްޖޭގެ އިދާރީ ދާއިރާތައް ހިންގަންވާނީ ލާމަރުކަޒީ އުސޫލުން ކަމަށް ބަޔާންކޮށްފައިވާއިރު، އަތޮޅު ކައުންސިލްތަކަކީ އެ ނިޒާމުގެ މުހިންމު ބައެއް ކަމަށް އެމްޑީޕީން ބުނެ އެވެ.
މި އިސްލާހު ހުށަހެޅުމުގައި ރައްޔިތުންގެ ހިޔާލު ހޯދުމުގެ އާންމު ވޯޓުގެ ނަތީޖާއަށް ރިއާޔަތްކޮށްފައިވެ އެވެ. ރިޔާސީ އިންތިހާބާއި މަޖިލިސް އިންތިހާބު އެކުގައި ބޭއްވުމާ ގުޅޭގޮތުން ނެގި ވޯޓުގައި، 69 އިންސައްތަ ރައްޔިތުން ވަނީ ސަރުކާރުން ހުށަހެޅި ބަދަލުތަކާ ދެކޮޅަށް ވޯޓު ދީފަ އެވެ.
އަތޮޅު ކައުންސިލުތައް އުވާލައި، އާބާދީ ކުޑަ ރަށްރަށަށް މަދުން ކައުންސިލަރުން ހޮވަން ގާނޫނުއަސާސީ އާއި ގާނޫނުތަކަށް ގެނައި މުއިއްޒު ތަސްދީގު ކުރެއްވީ ޑިސެމްބަރު 2025، ގަ އެވެ.
