ގާނޫނުއަސާސީން ތަސައްވުރުކޮށްފައިވާ ފުރިހަމަ ލާމަރުކަޒީ ނިޒާމު ދެމެހެއްޓުމަށްޓަކައި އަތޮޅު ކައުންސިލްތައް އުވާލުމަށް މި ސަރުކާރުން ގާނޫނުއަސާސީއަށް ގެނައި ބަދަލު ރުޖޫއަ ކުރުމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ގަލޮޅު އުތުރު ދާއިރާގެ މެންބަރު، މުހައްމަދު އިބްރާހިމް (ކުޑޫ) ހުށަހެޅުއްވި ބިލު ބޭރުކޮށްލައިފި އެވެ.
މި ބިލު ބަލައިގަތުމާ ގުޅޭ ގޮތުން ނެގި ވޯޓުގައި ބައިވެރިވި 53 މެންބަރުންގެ ތެރެއިން 45 މެންބަރުން ވޯޓުދިނީ ބިލު ބަލައިނުގަތުމަށެވެ. ބިލު ބަލައިގަތުމާ އެއްކޮށް ވޯޓުދެއްވީ އެމްޑީޕީއަށް ނިސްބަތްވާ އަށް މެންބަރުން އެކަންޏެވެ.
ކުޑޫ އެ ބިލު ހުށަހެޅުއްވީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގަން ފަށައި، އެ ނިޒާމު ތަރައްގީކޮށް، ހަރުދަނާ ކުރަމުންދަނިކޮށް، އެ ނިޒާމުގައި ހިމެނޭ މުހިންމު ބައެއް ކަންކަމުގައިވާ އަތޮޅު ކައުންސިލްތައް އުވާލުމުގެ ސަބަބުން ގާނޫނުއަސާސީ ތަސައްވުރުކުރި ނިޒާމަށް އުނިކަން ލިބޭ ކަމަށް ބުނެ އެވެ.
"ދެންނެވުނު ބަދަލު ގެނެސްފައިވަނީ، ދިވެހި ދައުލަތުގެ ހިންގުމުގެ ނިޒާމަށް ބަދަލުތަކެއް ގެނައުމަށް ރައީސުލްޖުމްހޫރިއްޔާގެ އަމިއްލަ ވިސްނުންފުޅަށް ފެށި މަސައްކަތުގެ ތެރެއިން. އެ ކަންކަމާމެދު ދިރާސާތަކެއް ކުރެވިފައެއް ނުވޭ. އަދި ފުޅާ ދާއިރާއެއްގައި ބަހުސްކޮށް، މަޝްވަރާކޮށްފައެއްވެސް ނުވޭ،" އޭނާ ވިދާޅުވި އެވެ.
ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލަން ރައްޔިތުންގެ މެދުގައި ނެގި ފެންނަ ނުފެންނަ ވޯޓުގައި ސަރުކާރުން ހުށަހެޅި ހުށަހެޅުމަށް 68.74 ޕަސަންޓު މީހުން ގަބޫލުނުވާއިރު، އޭގެއިން ދޭހަވަނީ ދައުލަތުގެ ހިންގުމުގެ ނިޒާމަށް ބަދަލުތަކެއް ގެނައުމަށް ރައީސުލްޖުމްހޫރިއްޔާ އަމިއްލަ ވިސްނުންފުޅަށް ހުށަހެޅުއްވި ކަންކަމަށް ރައްޔިތުންގެ ރުހުން ނެތްކަން ކަމަށް ކުޑޫ ފާހަގަކުރެއްވި އެވެ.
މިގޮތުން ކުޑޫ ވިދާޅުވީ ސަރުކާރުން ގެނައި ބަދަލުތަކުގެ ތެރޭގައި އަތޮޅު ކައުންސިލްތައް އުވައިނުލުމަށް ރައްޔިތުންގެ މަޖިލީހުން ފާސްކޮށްފައިވާ ބިލަކީވެސް ރައްޔިތުންގެ އެދުމާ އެއްކޮޅު ބިލެއް ނޫން ކަމަށެވެ.
އަތޮޅު ކައުންސިލުތައް އުވާލައި، އާބާދީ ކުޑަ ރަށްރަށަށް މަދުން ކައުންސިލަރުން ހޮވަން ގާނޫނުއަސާސީ އާއި ގާނޫނުތަކަށް ގެނައި މުއިއްޒު ތަސްދީގު ކުރެއްވީ ޑިސެމްބަރު 2025، ގަ އެވެ.
