ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ މުވައްޒަފުންނަށް އަދިވެސް، މިދިޔަ މަހުގެ މުސާރަ ނުދޭ ކަމަށް އެ ކުންފުނީގެ މުވައްޒަފުން ބުނެފި އެވެ.
އަދަދު އަށް މައުލޫމާތު ދިން ވެމްކޯގެ މުވައްޒަފަކު ބުނީ މިއަދު ސަރުކާރު ބަންދުވުމުގެ ކުރިން މުސާރަ ދިނީ ބައެއް މުވައްޒަފުންނަށް ކަމަށެވެ. ނަމަވެސް، ދެންތިބި މުވައްޒަފުންނަށް އަދިވެސް މުސާރަ ނުލިބޭ ކަމަށް އޭނާ ބުންޏެވެ.
"ބައެއް މީހުންނަށް ދީފި ބަންދުގެ ކުރިން، އެކަމު އަދިވެސް ބައެއް މުވައްޒަފުންނަށް ނުލިބޭ [މުސާރައެއް]، ބިދޭސީ އެއްވެސް މީހަކަށް ނުދޭ، ދިވެހި ބައެއް މީހުންނަށް ނުލިބޭ،" މި ނޫހަށް މައުލޫމާތު ދިން ވެމްކޯގެ މުވައްޒަފު ބުންޏެވެ.
ވެމްކޯގެ މުވައްޒަފުންނަށް މުސާރަ ދިނުން ލަސްވާން ފެށީ މިދިޔަ އަހަރުގެ ވަކި ހިސާބަކުން ފެށިގެންނެވެ. މި ނޫހަށް މައުލޫމާތު ދިން ވެމްކޯގެ ބައެއް މުވައްޒަފުން ބުނީ އެންމެ ފުރަތަމަ ލަސްވާން ފެށީ މަހުގެ 5 ހައި ހިސާބަށް ކަމަށެވެ. ނަމަވެސް، މިހާރު ކޮންމެ މަހެއްގެ ވެސް މުސާރަ ލިބެނީ އަނެއް މަހުގެ 10 ހައި ހިސާބުގައި ކަމަށް އެ މުވައްޒަފުން ބުންޏެވެ.
މިކަމާ ގުޅިގެން ވެމްކޯގެ މުވައްޒަފުން ދަނީ ކަންބޮޑުވުން ފާޅުކުރަމުންނެވެ. އެ މުވައްޒަފުން ބުނާ ގޮތުގައި މުސާރަ ދިނުން ލަސްވުމުގެ ސަބަބުން ކުއްޔާއި ބިލުތައް ދައްކާ ދުވަސް ލަސްވުމުން ޖޫރިމަނާތައްވެސް ދައްކަންޖެހެ އެވެ.
"ޑޭޓެއް ކަނޑައަޅާފައި ދައްކަންޖެހޭ ބިލްތައްވެސް ހުރޭ. އެއިންނަ ޑޭޓްގެ ލާރި ނުދެއްކެންޏާ ދެން ލާރި ބަލައިގަންނާނީ ޖޫރިމަނާއާ އެކީގައި. މިކަންކަމުގެ ޒިންމާއެއް ހަމަ ގައިމުވެސް ވެމްކޯއިން ނަގާކަށް ނުޖެހޭ. މަހުގެ 10 އަކާ ހަމައަށްދާއިރު ސަރުކާރު ކުންފުންޏެއްގެ ނިމިދިޔަ މަހުގެ މުސާރަ ނުދެވި އޮތުމަކީ ވަރަށް ދެރަ ކަމެއް،" ވެމްކޯގެ މުވައްޒަފަކު ބުންޏެވެ.
ވެމްކޯގެ އިތުރު މުވައްޒަފަކު ބުނީ ކޮންމެ މަހެއްގެ ކުއްޔާއި ބިލުތައް ދައްކަން ވަކި މުއްދަތެއް ކަނޑައެޅިފައިވާއިރު، ލަހުން އެ ފައިސާ ޖެހުމުން ގޭގެ އޯނަރުންގެ ޕްްރެޝަރުވެސް ކުރިމަތިވާ ކަމަށެވެ.
"ކޮންމެ މަހަކު ވަކި ދުވަހެއް އެބަ އިނދޭ ކަނޑައަޅާފައި ކުލި ދައްކަން. ބިލުތައް ދައްކަންވެސް. އެ މުއްދަތުގައި ކުއްޔާއި ބިލުތައް ނުދެއްކުމުން ގޭގެ އޯނަރުގެ ފަރާތުންވެސް ޕްރެޝަރު އެބަ ކުރިމަތިވޭ. އޭގެ ސަބަބުން ލަދުވެސް ގަންނަން އެބަޖެހޭ،" މުވައްޒަފަކު ބުންޏެވެ.
މީގެއިތުރުން ވެމްކޯގައި މަސައްކަތްކުރާ ބިދޭސީ މުވައްޒަފުން މި ނޫހަށް ބުނީ އެ މުވައްޒަފުންނަށް މުސާރަ ލިބެނީ އާންމުގޮތެއްގައި މިހާރު މަހުގެ 15 ހިސާބުގައި ކަމަށެވެ. އެގޮތުން އޭގެ ސަބަބުން ގައުމަށް ލާރި ފޮނުވުމުގައި ލަސްވާތީ ވަރަށް ގިނަ ގޮންޖެހުންތަކާ ކުރިމަތިވަމުންދާ ކަމަށް އެ މުވައްޒަފުން ބުންޏެވެ.
ވެމްކޯގެ މުވައްޒަފުންގެ މުސާރައިން ކަނޑާ ޕެންޝަން ފައިސާ، އޮކްޓޯބަރު 16، 2024، އިން ފެށިގެން ޖަމާނުކުރެ އެވެ. ނަމަވެސް މުވައްޒަފުންނަށް މުސާރަ ދޭއިރު ޕެންޝަނަށް ފައިސާ ކަނޑަ އެވެ. އެއީވެސް މުވައްޒަފުންގެ ކަންބޮޑުވުމެކެވެ.
މުވައްޒަފުންނަށް ޕެންޝަން ފައިސާ ނުދޭ ކަމަށް ވެމްކޯއިން ވަނީ އެއްބަސްވެ، އުޒުރަކަށް މާލެ ސިޓީ ކައުންސިލުން އެތަނަށް ލިބެންޖެހޭ ގިނަ އަދަދެއްގެ ފައިސާ ނުލިބޭ ކަމަށް ބުނެފަ އެވެ. އެ ފައިސާ ވެމްކޯއަށް ދިނުމަށް ކަމަށް ބުނެ ފިނޭންސް މިނިސްޓްރީން މިދިޔަ މަހު ވަނީ މާލޭ ސިޓީ ކައުންސިލަށް ދޭންޖެހޭ 19 މިލިއަން ރުފިޔާގެ ބްލޮކް ގްރާންޓް ކަނޑާލައިފަ އެވެ.
ސަރުކާރު ކުންފުނިތަކުގެ ތެރެއިން އެންމެ ގިނަ އަދަދަކަށް މުވައްޒަފުން ގެންގުޅޭ އެއް ކުންފުނި، ވެމްކޯއަށް މިދިޔަ އަހަރު އެކަނިވެސް މުވައްޒަފުންގެ މުސާރަ އާއި އިނާޔަތްތަކަށް 439.6 މިލިއަން ރުފިޔާ ހަރަދުކުރިކަން ތަފާސްހިސާބުތަކުން ދައްކަ އެވެ.
މިދިޔަ އަހަރުގެ ނިޔަލަށް އެ ކުންފުނީގައި 3,500 އެއްހާ މުވައްޒަފުން ތިބިއިރު، މިދިޔަ އެޕްރީލް މަހު ބޭއްވި ކައުންސިލް އިންތިހާބުގެ ކެމްޕެއިނުގެ ތެރެއިން ގިނަ އަދަދެއްގެ މުވައްޒަފުން ވެމްކޯއަށް ނަގާފައިވެ އެވެ.
ޕީސީބީން ބުނާ ގޮތުގައި ވެމްކޯއަށް 2024 ވަނަ އަހަރު 138 މިލިއަން ރުފިޔާ ގެއްލުންވި އެވެ. އެ ކުންފުންޏަށް މިދިޔަ އަހަރު އެންމެ ބޮޑު ގެއްލުމެއްވީ 55 މިލިއަން ރުފިޔާއާއެކު ފަހު ކުއާޓާގަ އެވެ. އެ ކުންފުންޏަށް 2024 ވަނަ އަހަރު 61 މިލިއަނުގެ ގެއްލުމެއް ލިބުނުއިރު، 2023 ގައި 93 މިލިއަނުގެ ގެއްލުމެއް ލިބިފައިވެ އެވެ.
