ރާއްޖޭގައި ބޭރު މީހުންނަށް ދިގު މުއްދަތަކަށް ދިރިއުޅޭވެ ވަކި ސަރަހައްދުތަކެއް އުފެދޭ ގޮތަށް މަޝްރޫއުތައް ކުރިއަށްނުގެންދިޔުމަށް އަދާލަތު ޕާޓީން ގޮވައިލި ގޮވައިލުމަށް ރަސްމާލެ ވިއްކާލުމާ ދެކޮޅަށް މަސައްކަތް ކުރަން އުފައްދާފައިވާ ހަރަކާތުން މަރުހަބާ ކިޔައިފި އެވެ.
"ދިވެހިންގެ ބިން ދިވެހިންނަށް" ހަރަކާތުގައި އިސްކޮށް ހަރަކާތްތެރިވާ ކެންދޫ ދާއިރާގެ ކުރީގެ މެންބަރު، އަލީ ހުސައިން އެކްސްގައި ކުރެއްވި ޕޯސްޓެއްގައި ވިދާޅުވީ ދީނާއި ގައުމުގެ ހައްގުގައި އަދާލަތު ޕާޓީން ބަސްބުނި ބުނުމަށް މަރުހަބާ ކިޔާ ކަމަށެވެ.
"ބިރުވެރިކަމުގެ ތެރޭގައި ވެސް ދީނާއި ގައުމުގެ ދިފާއުގައި ބަސްބުނެ، ރާއްޖޭގެ ސަލާމަތާއި ދީނީ އެއްބައިވަންތަކަމަށް އުނިކަން ލިބޭގޮތަށް ރަސްމާލެ މަޝްރޫއު ކުރިއަށް ނުގެންދިޔުމަށް ގޮވާލި ގޮވައިލުމަށް ފުރިހަމައަށް ތާއީދުކުރަން،" އަލީ ހުސައިންގެ ޕޯސްޓުގައި ލިޔުއްވައިފައިވެ އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރުމުގެ އެންމެ ފަހުގެ ތައްޔާރީތައް ސަރުކާރުން އަންނަނީ ވަމުންނެވެ.
ދީނީ އެއްބައިވަންތަކަމަށް ގޮންޖެހުންތަކެއް ކުރިމަތިވެދާނެތީ ރަސްމާލެ މަޝްރޫއު ކުރިއަށްނުގެންދަން އަދާލަތުން އެދިއްޖެ
ރަސްމާލެ މަޝްރޫއުގެ ދަށުން ބޭރު މީހުންނަށް ދިގު މުއްދަތަކަށް ދިރިއުޅެވޭނެ ވަކި ސަރަހައްދުތަކެއް އުފެދޭތީ، އެކަމުގެ ސަބަބުން ރާއްޖޭގެ ދީނީ އެއްބައިވަންތަކަމާއި ސަލާމަތަށް ނުރައްކާވެދާނެ ކަމަށް ބުނެ އަދާލަތު ޕާޓީން ކަންބޮޑުވުން ފާޅުކޮށްފިއެވެ. އެ ޕާޓީން ސަރުކާރަށް އިލްތިމާސްކުރީ ބޭރު މީހުން ވަޒަންވެރިވާ ގޮތަށް މަޝްރޫއު ކުރިއަށް ނުގެންގޮސް، އޭގެ ބަދަލުގައި ހޮލިޑޭ ހޯމްސް ފަދަ ވަސީލަތްތައް ތަރައްޤީކުރުމަށެވެ.
އެ މައްސަލައިގައި ގިނަ ދިވެހިންގެ އެއް ކަންބޮޑުވުމަކީ ރާއްޖޭގައި ބޭރު މީހުންނަށް ވަޒަންވެރިވެވޭނެ މަގުފަހިވެގެންދިޔުމެވެ. ދީނީ އިލްމުވެރިންގެ ތެރެއިން ވެސް އެތައް ބަޔަކު އެކަމާ ދެކޮޅަށް އަޑުއުފުލަމުން އަންނައިރު، އަދާލަތު ޕާޓީން ރޭ ނެރުނު ބަޔާނެއްގައި ވަނީ ރަސްމާލެ މަޝްރޫއުގެ ނަން ނުގެނެސް، އެ މަޝްރޫއު މިހާރު ކުރިއަށް ގެންދާ ގޮތަށް ނުގެންދިޔުމަށް ސަރުކާރަށް ގޮވާލައިފަ އެވެ.
"ބޭރުގެ ފަރާތްތައް ދިގު މުއްދަތަކަށް ދިރިއުޅޭ ވަކި ސަރަޙައްދުތަކެއް އުފެދޭ ގޮތަށް މަޝްރޫޢުތައް ކުރިޔަށް ގެންދާ ނަމަ، ރާއްޖޭގެ ދީނީ އެއްބައިވަންތަކަމާއި އާންމު މަސްލަޙަތާއި ދިވެހި ސަގާފަތާއި ރާއްޖޭގެ ސަލާމަތާއި ރައްކާތެރިކަމަށް، ގޮންޖެހުންތައް ކުރިމަތިވެގެންދާނެ ކަމަށް އަދާލަތު ޕާޓީއިން ދެކެމެވެ. ވީމާ، މިގޮތަށް މަޝްރޫއު އެއް ކުރިއަށް ނުގެންދެވުމަށް ސަރުކާރަށް އިލްތިމާސްކުރަމެވެ،" އެ ޕާޓީން ނެރުނު ކުރު ބަޔާނުގައި ބުނެފައިވެ އެވެ.
ރާއްޖޭގައި އިންޓަރނޭޝަނަލް ރިއަލް އެސްޓޭޓު މަޝްރޫޢުތައް ކުރިޔަށް ގެންދިއުމުގައި ގެންގުޅޭ ސިޔާސަތުތަކަށް ބަދަލުތަކެއް ގެންނަންޖެހޭކަމަށް އެ ޕާޓީގެ ބަޔާނުގައި ބުންޏެވެ.
އެގޮތުން، ބޭރުގެ ފަރާތްތަކުން ދާއިމީކޮށް ނުވަތަ ދިގު މުއްދަތަކަށް ދިރިއުޅޭނެ ތަންތަން ބިނާކުރުމުގެ ބަދަލުގައި، އެފަދަ މަޝްރޫއުތައް އަމާޒުކުރަންވާނީ ބޭރުގެ ފަރާތްތަކުން ޗުއްޓީ ހޭދަކުރުމަށް ބޭނުންކުރާ ހޮލިޑޭ ހޯމްސް ފަދަ ވަސީލަތްތައް ތަރައްޤީކުރުމަށް ކަމަށް އެ ޕާޓީން ދެކެ އެވެ. އެފަދަ އުސޫލަކުން މަޝްރޫޢުތައް ބައްޓަންކުރުމުން ރާއްޖޭގެ އިޖުތިމާޢީ ފޭރާމަށް ލިބިދާނެ ގެއްލުންތަކުން ސަލާމަތްވެވޭނެ ކަމަށްވެސް ބަޔާނުގައިވެ އެވެ.
ރަސްމާލެ ވިއްކާލުމާ ދެކޮޅަށް އަޑުއުފުލުމަށް އަންނަ ހުކުރު ދުވަހު ބޮޑު އެއްވުމެއް ބާއްވަން ތައްޔާރުވަމުންދާއިރު، އެ އެއްވުމުގައި އަދާލަތު ޕާޓީން ބައިވެރިވާނެ ކަމެއް އަދި، ހާމައެއް ނުކުރެ އެވެ. ނަމަވެސް، އެ އެއްވުމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް އާއި އިދިކޮޅު އެމްޑީޕީގެ ލީޑަޝިޕުގައި ހިމެނިވަޑައިގަންނަވާ ބައެއް ބޭފުޅުން ބައިވެރިވާނެކަން ވަނީ ހާމަކޮށްފަ އެވެ.
ރަސްމާލެ ވިއްކާލުމާ ދެކޮޅު އަޑުތައް ގަދަވެފައި ވަނިކޮށް މިދިޔަ ހޯމަ ދުވަހު ސަރުކާރުން ވަނީ ރަސްމާލެ މަޝްރޫއު ކުރިއަށް ގެންދިޔުމަށް ބޭނުންވާ ގާނޫނީ އޮނިގަނޑު ހެދުމަށް މަޖިލީހަށް ހަތަރު ބިލެއް ވައްދައިފަ އެވެ.
ރަސްމާލޭގެ މަޝްރޫއުއަށް މަގުފަހިކުރުމަށް ހުށަހެޅި ރިއަލް އެސްޓޭޓު ބިލުގައި އޮތީ ގާނޫނުއަސާސީން ބޭރުގެ ފަރާތްތަކަށް ބިން ކުއްޔަށް ދެވޭނެ އެންމެ ދިގު މުއްދަތަކީ 99 އަހަރު ކަމަށް ކަނޑައަޅާފައި ވަނިކޮށް، އެ ހިމާޔަތް ފަހަނައަޅައި ގޮސް "ސަރެންޑާ އެންޑް ރީ-ގްރާންޓް" މޮޑެލް މެދުވެރިކޮށް ތާއަބަދަށް ލީސް އާވާ ގޮތަށެވެ. އެހެންވެ އެ ޝަހަރުގައި ބޭރު މީހުންނަށް ވަޒަންވެރިވުމުގެ ފުރުސަތު ލިބޭނެ އެވެ.
އެ ބިލުގެ 89 ވަނަ މާއްދާގައި ބަޔާންކޮށްފައި ވަނީ ހާއްސަ ޒޯނުގައިވާ އެޕާޓްމަންޓްތަކާއި ޕްރޮޕަޓީތަކުގެ ލީސްހޯލްޑް ބޭރު މީހުންނަށް 99 އަހަރަށް ވިއްކޭނެ ކަމަށެވެ. އަދި ބޭރު މީހަކު މާސްޓާ ޑިވެލޮޕަރުގެ އަތުން ތަނެއް ގަތުމުން، ލިބެނީ ކުރީގެ ލީސްގެ ބާކީ އޮތް މުއްދަތެއް ނޫނެވެ.
އޭގެ ބަދަލުގައި، ކުރީގެ ލީސް ސަރުކާރަށް ދޫކޮށްލުމުން، ގަތް ފަރާތަށް ސީދާ އާ 99 އަހަރުގެ ލީސްއެއް އޮތޯރިޓީން ދޫކުރަން ޖެހޭނެ އެވެ. ބިލުގެ 78 ވަނަ މާއްދާގެ ށ. ގައިވާ ގޮތުން، މާސްޓާ ޑިވެލޮޕަރުގެ މުއްދަތު ހަމަވި ނަމަވެސް އެ ގޮތަށް ދޫކުރާ ލީސް ދެމިއޮންނާނެ އެވެ.
މި މޮޑެލްގެ ދަށުން ގަންނަ ބޭރު މީހުންނަށް އެ ޕްރޮޕަޓީ އެހެން ފަރާތްތަކަށް އަލުން ވިއްކުމާއި، ބޭންކުތަކަށް ރަހުނުކުރުމުގެ ފުރިހަމަ އިހުތިޔާރު ލިބިގެންދެ އެވެ. އެހެންކަމުން މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް ގެނައި އިންތިޒާމެއް ކަމަށް ބެލެވެ އެވެ.
