އެކި ކަންކަމުގައި ރައީސް މުހައްމަދު މުއިއްޒުއަށް ލަފާ އަރުވަން، ދައުލަތުގެ އިއްޒަތުގެ ޝަރަފު ލިބިފައިވާ ބޭފުޅުން ހިމެނޭ މަޖިލީހެއް މިއަދު އެކުލަވާލައިފި އެވެ.
ރައީސް އޮފީހުން ބުނީ އެ މަޖިލީހަކީ ގައުމުގެ ކަންކަން ހަރުދަނާކޮށް ހިންގުމަށާއި ސަރުކާރުގެ ކަންކަން ރަނގަޅު ގޮތުގައި ގެންދިޔުމަށްޓަކައި މަޝްވަރާ ހޯދުމަށް އެކުލަވައިލި މަޖިލީހެއް ކަމަށެވެ. އަދި، އެ މަޖިލީހުގެ ރިޔާސަތު ބަލަހައްޓަވާނީ މުއިއްޒު ކަމަށް އެ އޮފީހުން ބުންޏެވެ.
މިއަދު އުފެއްދި މަޖިލީހުގައި ހިމެނިވަޑައިގަންނަވަނީ 12 ބޭފުޅުންނެވެ. އެ ހުރިހާ ބޭފުޅުންނަކީ ވެސް ދައުލަތުގެ ޝަރަފު ލިބިވަޑައިގެންފައިވާ ބޭފުޅުންނެވެ. އެއީ:
- ނިޝާން އިއްޒުންދީނުގެ އިއްޒަތުގެ ވެރިޔާ، އަބްދުﷲ ކަމާލުއްދީން
- ނިޝާން އިއްޒުންދީނުގެ އިއްޒަތުގެ ވެރިޔާ، އައްބާސް އިބްރާހިމް
- ނިޝާން އިއްޒުންދީނުގެ އިއްޒަތުގެ ވެރިޔާ، އަބްދުއްރަޝީދު ހުސެއިން
- ނިޝާން އިއްޒުންދީނުގެ އިއްޒަތުގެ ވެރިޔާ، އަނީސާ އަހުމަދު
- ނިޝާން އިއްޒުންދީނުގެ އިއްޒަތުގެ ވެރިޔާ، ޑރ. މުހައްމަދު ލަތީފް
- ނިޝާން އިއްޒުންދީނުގެ އިއްޒަތުގެ ވެރިޔާ، އިބްރާހިމް ރަޝީދު މޫސާ
- ނިޝާން އަސްކަރީގެ ވެރިޔާ، މޫސާ އަލީ ޖަލީލް
- ނިޝާން މުލީގޭ ޝަރަފުގެ އިއްޒަތުގެ ވެރިޔާ، އިބްރާހިމް އިސްމާއިލް އަލީ
- ނިޝާމް މުލީގޭ ޝަރަފުގެ އިއްޒަތުގެ ވެރިޔާ، އަހުމަދު ނަސީމް
- ނިޝާން ދިޔަމިގިލީ ޝަރަފުގެ އިއްޒަތުގެ ވެރިޔާ، ބަދުރުއްނަސީރު
- ނިޝާން ދިޔަމިގިލީ ޝަރަފުގެ އިއްޒަތުގެ ވެރިޔާ، އާދަމް އަބްދުއްރަހުމާން
- ނިޝާން ދިޔަމިގިލީ ޝަރަފުގެ އިއްޒަތުގެ ވެރިޔާ، އަހުމަދު ޝާކިރު
ގައުމީ ލަފާ އަރުވާ މަޖިލީހެއް އެކުލަވައިލަން ނިންމާފައިވާކަން މުއިއްޒު އިއުލާނުކުރެއްވީ މި އަހަރުގެ މިނިވަން ދުވަހުގެ ޖަލްސާގައި ވާހަކަދައްކަވަމުންނެވެ. އެގޮތުން، ގައުމަށް ގިނަ ދުވަސްތަކެއް ވަންދެން ހިދުމަތް ކޮށްދީފައި ތިބި ބޭފުޅުން ހިމެނޭ މަޖިލީހަކާއި އެކި ދާއިރާތަކުގެ ތަޖުރިބާކާރުން ހިމެނޭ ގައުމީ މަޖިލީހެއް އެކުލަވައިލައްވާނެ ކަމަށް މުއިއްޒު ވަނީ ވިދާޅުވެފަ އެވެ.
ދައުލަތުގެ އިއްޒަަތް ހާސިލުކުރައްވާފައިވާ ބޭފުޅުން ހިމެނޭ މަޖިލީހެއް މިއަދު އުފައްދަވައިފައިވާއިރު، އެކި ދާއިރާތަކުގެ ތަޖުރިބާކާރުން ހިމެނޭ މަޖިލިސް އެކުލަވައިލާނީ 150 އެއްހާ މީހުން ހިމަނައިގެން ކަމަށް ޕީއެސްއެމްއިން ގެނެސްދޭ ނޭޝަން ޗެޓް ޕްރޮގްރާމެއްގައި ވާހަކަދައްކަވަމުން މުއިއްޒު ވިދާޅުވި އެވެ.
