ކެބިނެޓުން ވަކިކުރި މިނިސްޓަރުންގެ ތެރޭގައި ހިމެނޭ ތޯރިގު އިބްރާހިމް އާއި އާދަމް ޝަރީފް އުމަރު އާއި ރިފަރެންޑަމް ވޯޓުގައި "އާނއެކޭ" ބުނަން ސަރުކާރާ އެއްކޮޅަށް ވަކާލާތުކޮށްދެއްވި ދިޔާނާ ޝަރީފް، ފޮރިން މިނިސްޓްރީގެ އެމްބެސެޑާ އެޓް ލާޖުގެ މަގާމަށް މިއަދު އައްޔަންކޮށްފި އެވެ.
މި ތިން ބޭފުޅުން ފޮރިން މިނިސްޓްރީގެ އިސް މަގާމުތަކަށް އައްޔަންކުރިކަން ސަރުކާރުން އަދި އިއުލާންނުކުރި ނަމަވެސް މިކަން ވަނީ ކަށަވަރުކުރެވިފަ އެވެ.
އެމްބެސެޑާ އެޓް ލާޖުގެ މަގާމަށް އައްޔަނުކުރި ތިން ބޭފުޅުންގެ ތެރެއިން ތޯރިގާއި އާދަމް ޝަރީފަކީ "ރައްޔިތުންގެ ވިންދާ އެއް ގޮތަށް" ވެރިކަން ހިންގަން ވެގެން ރައީސް މުހައްމަދު މުއިއްޒު އަންގަވައިގެން އިސްތިއުފާ ދެއްވަން މަޖުބޫރުވި ދެ ބޭފުޅުންނެވެ.
މި ދެ ބޭފުޅުން އަލުން ސަރުކާރުގެ މަގާމުތަކަށް އައްޔަންކޮށްފައި މި "ޕާފޯމް ނުކުރެވޭ" ލިސްޓުގައި ހިމެނިގެން މިނިސްޓަރު ކަމުން ދުރުކުރަން މުއިއްޒު ނިންމެވި ނިންމެވުމަށް ދެ ހަފުތާ ވެސް ނުވަނީހެވެ.
ފޮރިން މިނިސްޓްރީއަށް އައްޔަންކުރި ކުރީގެ އެޓާނީ ޖެނެރަލް ދިޔާނާ މި ސަރުކާރުގެ އެއްވެސް މަގާމެއްގައި ކުރިން ނޫޅުއްވަ އެވެ. ނަމަވެސް ރިފަރެންޑަމް ވޯޓަށް އަހަން ނިންމި ދުވަސްވަރުން ފެށިގެން ދިޔާނާ ވަނީ ސަރުކާރާ ގާތުން މަސައްކަތްތަކެއް ކުރައްވާފަ އެވެ.
