ޔޫއޭއީ އީގަލް ހިލްސްއިން ތަރައްގީކުރަން ރާވާފައިވާ ރަސްމާލެ ވޯޓާފްރޮންޓް އެންޑް މެރީނާ މަޝްރޫއަކީ ދިވެހިރާއްޖޭގައި ޔަހޫދީން އާބާދުކުރުމަށް ހިންގާ މަޝްރޫއެއް ކަމަށާއި، އެކަން ކޮށްފި ނަމަ ދިވެހި ރައްޔިތުން މި ސަރުކާރުގެ ވެރިންނަށް ދުވަހަކު ވެސް މައާފު ނުކުރާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓް (ޕީއެންއެފް) އިން ރޭ ބޭއްވި ޖަލްސާގައި ޔާމީން ވިދާޅުވީ ރަސްމާލޭގެ މުޅި ކޮންސެޕްޓަށް އިންކާރު ކުރައްވާ ކަމަށެވެ. އޭގެ މައިގަނޑު ސަބަބެއްގެ ގޮތުގައި ޔާމީން ވިދާޅުވީ ޔަހޫދީން ވަޒަންވެރިކުރުވުމުގެ ރޭވުމާއި ރަސްމާލެ ދިވެހީންގެ އަތުން ދިއުމަށް ފަހު އެތަނަށް ދިވެހިރާއްޖެ ސިޔާދަތީ ބާރެއް ނުފޯރާނެ ކަމަށެވެ.
"އެތަނުގައި އުޅޭނީ ޔަހޫދީން، އެތަނަށް ދާނީ ޔަހޫދީން. އެތަނަށް ހުއްދަ ދޭނީ ޔަހޫދީންނަށް ތާއީދުކުރާ މީހުން،" ޔާމީން ވިދާޅުވި އެވެ.
އެއީ ޔަހޫދީންނަށް ހަމްދަރުދީވާ، ޔަހޫދީންދެކެ ލޯބިވާ މީހުން ކުރެާ ކަމެއް ކަމަށާއި އެހެން ނޫނީ ދިވެހިންގެ ތެރެއިން ޔަހޫދީން ގެނެސް ވަޒަންވެރިކުރުވާކަށް ނުޖެހޭނެ ކަމަށް ޔާމީން ވިދާޅުވި އެވެ.
ރަސްމާލޭގައި ރާ ނުވިއްކޭނެ ކަމަށް މުއިއްޒު ވިދާޅުވެފައި ވަނިކޮށް، ވިއްކޭނެ ކަމަށް އުޝާމް ވިދާޅުވެއްޖެ
ރަސްމާލޭގައި ބަނގުރާ ނުވިއްކޭނެ ކަމަށް ރައީސް މުއިއްޒު ވިދާޅުވެފައި ވަނިކޮށް، އެތަނުގެ ހޮޓާތަކުގައި ހުއްދަ ނަގައިގެން ރާ ވިއްކިދާނެ ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެ. އުޝާމް މިހެން ވިދާޅުވީ ދީނީ އިލްމުވެރިންނާއެކު ބޭއްވި ބައްދަލުވުމެއްގައި ކަމަށްވާއިރު، މިހެ
މި މަޝްރޫއުއާ ގުޅޭ ގޮތުން ރައީސް މުހައްމަދު މުއިއްޒު އާއި ސަރުކާރުގެ މިނިސްޓަރުން ދައްކަވާ ވާހަކަތަކުގައި ފުށޫއެރުން ހިރިކަން ފާހަގަ ކުރައްވައި ޔާމީން ވިދާޅުވީ ރަސްމާލެ ދޫކުރަނީ ނިމުމެއް ނެތް ގޮތަށް ކަމަށެވެ.
"މިއީ ނިމުމެއް އޮތް ކަމެއް ނޫން. މިހާވަރަށް ސަރުކާރުން އޮޅުވާލައިގެން މިކަން ކުރާއިރު އަޅުގަނޑު ހިތަށް މި އަރަނީ ހަމަ ދިވެހި ޒުވާނުންނާ މިހާރު ގެދޮރު ވެރިކަމުން މަހުރޫމްވެފައި ތިބި އެކި އުމުރުފުރައިގެ މީހުންނާ މިހާރު މުއިއްޒު ދައްވެއްޖެހޭ،" އެމަނިކުފާނު ވިދާޅުވި އެވެ.
ރަސްމާލޭގައި ތަރައްގީކުރާ ތަންތަނުން އެޕާޓެމެންޓުތަކާއި ވިލާތައް ބިދޭސީންނަށް ގަނެވޭނެ އެވެ. ރަސްމާލެ ވިއްކާލުމުގެ ފުރަތަމަ އެއްބަސްވުމުގައި ސެޕްޓެމްބަރު 21 ގައި އީގަލް ހިލްސްއާއެކު ދުބާއީގައި ދިވެހި ސަރުކާރުން ސޮއިކުރުމާއެކު ރައްޔިތުންގެ ކަންބޮޑުވުމާއި ފާޑިޔުން ސަރުކާރަށް އަމާޒުވުމުން ސަރުކާރުން ބުނެފައި ވަނީ އެތަނުން އިޒްރޭލް މީހުންނަށް ބިން ނުނަގެވޭނެ ކަމަށެވެ. ނަމަވެސް އިޒްރޭލްގެ ގިނަ އަދަދެއްގެ ބަޔަކީ ދެ ގައުމުގެ ޕާސްޕޯޓު އޮންނަ ބައެކެވެ،
ރަސްމާލެ ފުރަތަމަ ހިއްކުމަށް އެމްޓީސީސީގައި އޮތް މަހާޖައްރާފު ބޭނުންކުރުމުގެ ބަދަލުގައި، އެ މަޝްރޫއު ބޭރުގެ ބަޔަކާ ހަވާލުކުރީ އަކަ މީޓަރަކުން 2 ޑޮލަރާއި 4 ޑޮލަރުގެ ދެމެދުގެ ނާޖާއިޒު ފައިދާގެ ސަރުކާރުގެ ވެރިންނަށް ލިބޭ ގޮތަށް ކަމަށް ވެސް ޔާމީން ތުހުމަތު ކުރެއްވި އެވެ.
ދައުލަތުން ބޮޑު ހަރަދުކޮށްގެން ހިއްކި ރަސްމާލޭގެ ބިމުން 500 ހެކްޓަރު އީގަލް ހިލްސްއަށް ދޫކޮށްލުމަށް ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ރަސްމާލޭގެ އެއްބައި އީގަލް ހިލްސްއަށް ދޫކޮށްލާތީ އާއި އެ ކުންފުނީގެ ވެރިޔާ އަލައްބާރު އަކީ އިޒްރޭލްގެ އެކުވެރިއެއް އަދި މަދަދުވެރިއަކަށް ވުމުން ދީނީ އިލްމުވެރިންނާއި އިދިކޮޅު ޕާޓީތަކުން ދަނީ ކަންބޮޑުވުން ފާޅުކުރަމުންނެވެ. އެ މަޝްރޫއުގެ ސަބަބުން ރާއްޖޭގެ އެހެން ދީންތަކުގެ މީހުން ރާއްޖޭގައި ވަޒަންވެރިވުމަށް ފުރުސަތު ހުޅުވިގެންދާތީވެ ރައްޔިތުންގެ ފެންނަ ނުފެންނަ ވޯޓެއް ނެގުމަށް، މި މަޝްރޫއުއާ ދެކޮޅަށް މަސައްކަތްކުރާ "ގައުމީ ހަރަކާތުން" އަދި އިދިކޮޅު އެމްޑީޕީން ވަނީ ގޮވާލާފަ އެވެ.
ރަސްމާލެ ވިއްކުމާ ދެކޮޅަށް މަސައްކަތްކުރުމަށް އުފައްދާފައިވާ ގައުމީ ހަރަކާތުން ނޮވެމްބަރު 13 ވާ ހުކުރު ދުވަހުގެ ރޭ މާލޭގައި ބޮޑު އެއްވުމެއް ބޭއްވުމަށް ނިންމާފައިވެ އެވެ.
