ވެރިކަމުގެ ދަހިވެތިކަމާއި ހަސަދަވެރިކަމުގެ ކުރިޔަށް ގައުމީ ސަލާމަތާއި، ފުދުންތެރިކަމާއި، ދިވެހި ކޮންމެ ފަރުދެއްގެ އުފާވެރިކަމަށް ތަން ދޭން ޖެހޭ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ މި އަހަރުގެ ހުރަވީ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާކުރެއްވި މެސެޖެއްގަ އެވެ.
އެ ގޮތުން މުއިއްޒު ވިދާޅުވީ ގައުމުގެ މިނިވަންކަމާއި ސިޔާދަތު ދެމެހެއްޓުމަށްޓަކައި ސިޔާސީ ޖަޒުބާތުތަކުގެ ކުރިޔަށް ގައުމީ އިހުލާސްތެރިކަން ނެރެންޖެހޭ ކަމަށެވެ. އަދި ޒާތީ އަރާރުންތަކުގެ ކުރިޔަށް މުޅި ޖަމާއަތުގެ ބާއްޖަވެރިކަން އިސްކުރުމަކީ ކޮންމެހެން ކުރަންޖެހިފައިވާ ކަމެއް ކަމަށް ވެސް އެމަނިކުފާނު ވިދާޅުވި އެވެ.
"ސިޔާސީ ޖަޒުބާތަކުގެ ކުރިޔަށް ގައުމީ އިހުލާސްތެރިކަން ނެރެން އެބަ ޖެހޭ. ޒާތީ އަރާރުންތަކުގެ ކުރިޔަށް ޖަމާއަތުގެ ބާއްޖަވެރިކަން އިސްކުރަން އެބަ ޖެހޭ. ވެރިކަމުގެ ދަހިވެތިކަމާއި ހަސަދަވެރިކަމުގެ ކުރިޔަށް ގައުމީ ސަލާމަތާއި، ފުދުންތެރިކަމާއި، ދިވެހި ކޮންމެ ފަރުދެއްގެ އުފާވެރިކަމަށް ތަންދޭން އެބަ ޖެހޭ." މުއިއްޒު ވިދާޅުވި އެވެ.
މީގެ އިތުރުން މުއިއްޒު ވަނީ ދަރަނީގެ އަޅުވެތިކަމުގައި ފަނާ ވާން ދިވެހިން ތިބެގެން ނުވާނެ ކަމަށް ވިދާޅުވެފަ އެވެ. އޭގެ ބަދަލުގައި ފުދުންތެރިކަމުގެ ފާގަތި ފަތިހަކަށް ގައުމު ގެންދިއުމަށްޓަކައި އެންމެން އެކުގައި މަރުހަބާ ކިޔަން ޖެހޭ ކަމަށް އެމަނިކުފާނު ވިދާޅުވި އެވެ.
ހުރަވީ ދުވަހުގެ ތާރީހީ މުހިންމުކަމަށް އަލިއަޅުއްވާލައްވަމުން މުއިއްޒު ވިދާޅުވީ އެ ހާދިސާއަށް ތިން ގަރުނު ފުރެން ކައިރިވެފައިވާ ކަމަށެވެ.
މިހެންކަމުން މިއަދު ދުނިޔޭގެ ކަންކަން ހިނގަމުންދާ ގޮތާއި މިނިވަންކަން ދިފާއުކުރަން ޖެހޭ ގޮތްތަކާމެދު ފުންކޮށް ވިސްނަންޖެހޭ ކަމަށް މުއިއްޒު ވިދާޅުވި އެވެ. އަދި މާޒީގެ ތާރީހުން ފިލާވަޅު ލިބިގަނެ މުސްތަގުބަލު އުޖާލާކުރަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.
ހުރަވީ ދުވަހަކީ މަލާބާރީންގެ ވަކިތަކުން ދިވެހިރާއްޖެ ސަލާމަތްކުރެއްވި ގައުމީ ބަތަލު ދޮންބަންޑާރައިން ނުވަތަ ސުލްތާން ގާޒީ ހަސަން އިއްޒުއްދީންގެ ހިތްވަރުގަދަ ޖިހާދުގެ ހަނދާން އާކުރާ ދުވަހެވެ.
