ރަސްމާލެއިން ޔޫއޭއީގެ އީގަލް ހިލްސް ކުންފުންޏަށް ބިން ދިނުމާ ދެކޮޅަށް އާޓިފިޝަލް ބީޗުގައި މިރޭ ބާއްވާ އެއްވުމަކީ މުޒާހަރާއެއް ނޫން ކަމަށާއި އެ ތަނުގައި އެއްވެސް ހަމަނުޖެހުމެއް ނުހިނގާނެ ކަމުގެ ޔަގީންކަން ފުލުހުންނަށް ދީފައިވާނެ ކަމަށް އެ ހަރަކާތް އިންތިޒާމުކުރާ "ދިވެހިންގެ ބިން ދިވެހިންނަށް" ގައުމީ ހަރަކާތުން ބުނެފި އެވެ.
އެ ހަރަކާތުން މިހެން ބުނީ، އެއްވުން އިންތިޒާމުކުރާ ފަރާތްތަކުން ފުލުހުންނަށް މައުލޫމާތު ހިއްސާކޮށްފައި ނުވާ ކަމަށް ބުނެ ގާނޫނީ އިމުގެ ތެރެއިން އެ ހަރަކާތް ކުރިއަށް ގެންދިއުމަށް ފުލުހުން ބަޔާނެއް ނެރެ އިލްތިމާސްކޮށްފައި ވަނިކޮށެވެ.
މި ބަޔާނާ ގުޅިގެން ކަންކަން ސާފުކޮށްދޭން ފުލުހުންގެ އިދާރާއަށް ހާޒިރުވެ މަޝްވަރާކުރުމަށް ފަހު އެ ހަރަކާތުގެ އިސް ބޭފުޅުން ވިދާޅުވީ، ފުލުހުންގެ ކަންބޮޑުވުންތަކަށް ޔަގީންކަން ދީފައިވާނެ ކަމަށެވެ. އެ ގޮތުން މިއީ އެއްވެސް ހަމަނުޖެހުމެއް ނުވަތަ ކުރިމަތިލުމެއް ނޯންނާނެ، ހަމައެކަނި ޝުއޫރު ފާޅުކޮށްލުމަށް ބާއްވާ ސުލްހަވެރި އެއްވުމެއް ކަމަށް މި ހަރަކާތުގައި އިސްކޮށް އުޅުއްވާ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސެއިން ވިދާޅުވި އެވެ.
"މިއީ މުޒާހަރާއެއް ވެސް ނޫން. އަޅުގަނޑުމެން ބޭނުންވަނީ ހަމައެކަނި އެ ތަނަށް ހުރިހާ ރައްޔިތުން އެއްވެލައި، 10:30 ހާއިރު ޝުއޫރު ފާޅުކޮށް ނިންމާލާފައި ދާން. އެއްވެސް ކުރިމަތިލުމެއް ނޯންނާނެ. އެހެންވެ ކުޑަކުދިންނާއި ޒުވާނުން އަދި ސީނިއާ ސިޓިޒަނުން ވެސް ވަޑައިގަތުމަށް އަޅުގަނޑުމެން ދައުވަތު އަރުވަން." އޭނާ ވިދާޅުވި އެވެ.
"ދިވެހިންގެ ބިން ދިވެހިންނަށް" ހަރަކާތުން ވަނީ މިއީ އެއްވެސް ސިޔާސީ ބޭނުމެއްގައި ބާއްވާ އެއްވުމެއް ނޫން ކަމަށެވެ. އެއާ ހިލާފަށް، އެ ހަރަކާތުން ބުނާ ގޮތުގައި، މިއީ ގައުމުގެ ބިން ބޭރު ބަޔަކަށް ވިއްކުމާ ދެކޮޅަށް ރައްޔިތުންގެ އަޑު އިއްވުމަށް ބާއްވާ ހަރަކާތެކެވެ. މިހެންވެ ވެރިކަން ކުރާ ޕީއެންސީގެ މެންބަރުންނާއި، ސިފައިންނާއި ފުލުހުން ވެސް ޑިއުޓީގައި ނޫޅޭ ވަގުތުތަކުގައި މި އެއްވުމުގައި ބައިވެރިވުމަށް އެ ހަރަކާތުން ވަނީ ގޮވާލައިފަ އެވެ.
މީގެ އިތުރުން، މި އެއްވުން ކެންސަލްވެފައިވާ ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތައް އަލީ ހުސެއިން ދޮގުކުރެއްވި އެވެ. އޭނާ ވިދާޅުވީ ކުރިން ވެސް ޕްލޭންކުރި ގޮތަށް މިރޭ 8:30 ގައި އެއްވުން ފެށޭނެ ކަމަށެވެ. އަދި އެއްވުން ކުރިއަށްދާނީ ގާތްގަނޑަކަށް ދެ ގަޑިއިރަށް ކަމަށާއި ރޭގަނޑު 10:30 ހާއިރު އެއްވުން ނިންމާލާނެ ކަމަށް ވިދާޅުވި އެވެ.
"އެއްވުން ކެންސަލެއް ނުވޭ. ޕްލޭންކޮށްފައި އޮތް ގޮތަށް މިރޭ 8:30 ގައި ކުރިއަށްދާނެ. ވަކިން ހާއްސަކޮށް އަލައްބާރަށާއި އީގަލް ހިލްސްގެ މީހުންނަށް އަޅުގަނޑުމެން އެބަޖެހޭ މެސެޖު ދޭން ދިވެހިން މިކަމާ ނުރުހޭކަން، އަދި ދިވެހިންގެ ބިން ބޭރު ބަޔަކަށް ނުދެވޭނެކަން." އަލީ ހުސެއިން ވިދާޅުވި އެވެ.
ރަސްމާލެ މަޝްރޫއުގެ ދަށުން 500 ހެކްޓަރުގެ ބިން ބޭރުގެ ކުންފުންޏަކަށް ދޫކޮށްލުމާ ދެކޮޅަށް ބާއްވާ މި އެއްވުމަށް އިދިކޮޅު އެމްޑީޕީ އާއި ޕީއެންއެފްގެ އިތުރުން ސިޔާސީ އިސް ލީޑަރުން ވަނީ ތާއީދުކޮށްފަ އެވެ. މި ހަރަކާތުން ވަނީ ރަސްމާލެ ޑީލު ބާތިލުކުރަން ދެން އަޑުއުލާނެ ކަމަށް ބުނެފަ އެވެ.
