މެޑްރިޑް (ނޮވެމްބަރު 7) - ސްޕެއިންގެ ދެ ވަނަ ޑިވިޝަނުގެ މެޗެއްގެ ތެރެއިން ލިބުނު އަނިޔާ އަކަށް ފަރުވާދެނިކޮށް، ޓެނެރިފް އަށް ކުޅޭ 30 އަހަރުގެ ފޯވާޑް ޖީސޫސް ޑި މިގުުއެލް މަރުވިއިރު، އޭނާ މަރުވަން ދިމާވި ފައުލު ކުރި ކީޕަރު ޖީސޫސް އޮވޯނޯގެ ނަފްސާނީ ހާލަތު ދަށްވެ، އޭނާ ފުޓްބޯޅައިން ރިޓަޔާކުރަން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ ހަފްތާގެ ހޯމަ ދުވަހު ޓެނެރިފް އާއި އެފްސީ އެންޑޯރާ ކުޅުނު މެޗުގެ ތެރެއިން، ޑި މިގުއެލް ބޯޅަ ހޯދަން އުޅުމުގެ ތެރޭގައި، އެންޑޯރާގެ ކީޕަރު ޖީސޫސް އޮވޯނޯގެ ކަކުލުގައި ހާފުގެ މެދެެއްހާ ހިސާބުން ޖެހި އަނިޔާވި އެވެ. އޮވޯނޯގެ ކަކޫ ވަނީ ޑި މިގުއެލް މޭމަތީގައި ޖެހިފަ އެެވެ. އެއީ ކީޕަރު އޮވޯނޯ ކުރި ފައުލެއް ކަމަށް ނިންމައި، ރެފްރީ ވަނީ އޭނާ އަށް ރަތް ކާޑެއް ދައްކައިފަ އެވެ. ރަތް ކާޑު ދެއްކުމުން އޮވޯނޯ ދަނޑުން ފައިބައިގެން ދިޔަ ވަގުތު ދެ ޓީމުގެ ކުޅުންތެރިން ހާސްވެގެން އުޅެން ފެށުމާ އެކު، އޮވޯނޯ ވެސް އަލުން އަނބުރާ ޑި މިގުއެލް ގާތަށް ދެ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، ޑި މިގުއެލްގެ މަރުގެ ހާދިސާގައި އޮވޯނޯ އަށް ވަރަށް އަސަރުކޮށްފައިވާއިރު، އޭނާ އަށް ނަފްސާނީ ގޮތުން ދޭން ޖެހޭ އެހީތެރިކަން އަންނަނީ ފޯރުކޮށްދެމުންނެވެ. އަދި، ސޯޝަލް މީޑިއާގައި އޮވޯނޯ އަށް އަންނަނީ ގިނަ ފާޑުކިޔުންތަކާއި ނަފުރަތުގެ މެސެޖުތަކެއް އަމާޒުވަމުންނެވެ.
ފޯވާޑް މަރުވަން ދިމާވި ފައުލުކުރި ކީޕަރުގެ މައްސަލަ ފުލުހުން ބަލަނީ
ސްޕެއިންގެ ދެވަނަ ޑިވިޝަނުގެ މެޗެއްގެ ތެރެއިން ކީޕަރު ޖީސޫސް އޮވޯނޯ ކުރި ފައުލަކާ ގުޅިގެން ލިބުނު އަނިޔާތަކަށް ފަރުވާދެމުން ދަނިކޮށް، ޓެނެރިފްގެ ފޯވާޑް ޖީސޫސް ޑި މިގުއެލް ވަނީ މަރުވެފައި. މި ހާދިސާގައި ކީޕަރު ގަސްދުގައި ގެއްލުމެއް ދީފައިވޭތޯ ބެލުމަށް ސްޕެއިންގެ ފުލުހުން މިހާރު ވަނީ ތަހުގީގެއް ފަށާފައި
އުމުރުން 25 އަހަރުގެ އޮވޯނޯ އަކީ އިކުއެޓްރަލް ގިނީ އަށް އުފަން ކުޅުންތެރިއެކެވެ. އެކަަމަކު، ޅަ އުމުރުގައި ސްޕެއިނަށް ދިރިއުޅުން ބަދަލުކޮށް، އާއިލާއާ އެކު އޭނާ އުޅެބޮޑުވީ ސްޕެއިންގަ އެވެ. އިކުއެޓްރަލް ގިނީން ކުރިއަށް އޮތް އިންޓަނޭޝަނަލް މެޗުތަކަށް ނެގި ސްކޮޑުން އޮވޯނޯ ބާކީކޮށްފައިވާއިރު، އޭނާގެ އާއިލާ އިން އަންނަނީ އަމާޒުވަމުން އަންނަ ނުރުހުން ވުމުގެ މެސެޖުތަކުގެ ސަބުން އޮވޯނޯ އަށް ފުން އަސަރެއް ކޮށްފައިވާ ކަމަށް ބުނެފަ އެެވެ.
އޮވޯނޯ މީގެ ކުރިން ނެރުނު ބަޔާނެއްގައި ބުނެފައިވަނީ، މި ވަގުތު އޭނާގެ އިހުސާސްތައް ބަޔާންކޮށްދޭނެ އެއްވެސް ގޮތެއް ނެތް ކަމަށެވެ. އަދި، ކުރެވުނު ކަންތައްތަކާ މެދު ގިނަ ގޮތްގޮތަށް ވިސްނަމުން އަންނަ ކަމަށާއި ކޮންމެ އަދަބެއް އަޔަސް ބަލައިގަންނާނެ ކަމަށެވެ.
ރެއާލް ސޮސިއެޑާޑްގެ ޔޫތު ޓީމުތަކަށް ކުޅެފައިވާ އޮވޯނޯ ވަނީ ސީނިއާ ކެރިއަރުގައި އަލަވޭސް އަށް ވެސް ކުޅެފަ އެވެ. މިދިޔަ ސީޒަނުގައި ލޯނަކަށް އެންމެ ފުރަތަމަ އެންޑޯރާ އަށް ބަދަލުވި އޮވޯނޯ މިދިޔަ އޮގަސްޓް މަހު ވަނީ ދެ އަހަރުގެ ކޮންޓްރެކްޓެއްގައި އެ ކްލަބާ އެކު ސޮއިކޮށްފަ އެވެ.
ދަނޑުމަތީގައި ހިނގާ ކަމެއްގައި ސީދާ މައްސަލަ ބެލޭނެ ހާލަތެއް ނެތް ކަމުގައި ވިޔަސް ގަސްދުގައި މީހަކަށް ގެއްލުމެއް ދޭ ފަދަ ކަމެއް އޮވޯނޯގެ ފަރާތުން ފެނުނުތޯ، ދި ހޯމިސައިޑް ގްރޫޕް އޮފް ދި ނެޝަނަލް ޕޮލިސް އިން އަންނަނީ ބަލަމުންނެވެ. އަދި، މިކަން ބަލާއިރު، ސްޕެނިޝް ފުޓްބޯޅަ ފެޑެރޭޝަންގެ ޑިސިޕްލިނަރީ ކޯޑަށް ވެސް އަމަލުކުރާނެ ކަމަށް ރިޕޯޓްތައް ބުނެ އެވެ.
އެ ދުވަހު، ޑި މިގުއެލް ހޮސްޕިޓަލަށް ގެންގޮސް ފަރުވާ ދޭން ފެށިއިރު، ޓެނެރިފުން ވަނީ ހާލު ސީރިއަސް ކަމަށް މީޑިއާގައި ބުނެފަ އެވެ. އަދި، ހޮސްޕިޓަލްގައި ފަރުވާ ދެމުން އަންނަނިކޮށް، ފައުލު ހިނގިތާ 24 ގަނޑިއިރެއްހާއިރުގެ ވަގުތެއްގައި ޑި މިގުއެލް ވަނީ މަރުވެފަ އެވެ. ޑި މިގުއެލް އަށް ފަރުވާ ދެމުން އައީ މެއަަށާއި ބޮލަށް ލިބުނު އަނިޔާތަަކަކަށް ކަމަށް ހޮސްޕިޓަލުން ވަނީ މައުލޫމާތު ދީފަ އެވެ. .
މަރުވިއިރު، ޑި މިގުއެލް އާއި އޭނާގެ އަންހެނުންގެ ދޮޅު އަހަރުގެ ފިރިހެން ދަރިއަކު އެބަހުއްޓެވެ.
އަނިޔާވެގެން އެމްބިއުލަންސްގައި ޑި މިގުއެލް ހޮސްޕިޓަލަށް ގެންދިޔަ މަގުމަތީގައި އޭނާ އަށް ކާޑިއަކް އެރެސްޓެއް ޖެހުނު ކަމަށް ވެސް ސްޕެއިނުގެ މީޑިއާގައި ރިޕޯޓްކޮށްފައިވެ އެވެ. ޑި މިގުއެލްގެ އަނިޔާއާ ގުޅިގެން، މެޗުގެ ވަގުތު ހަމަވާން ހަތް މިނިޓަށް ވެފައި އޮއްވައި، ރެފްރީ ނިންމީ މެޗު އިތުރަށް ކުރިއަށް ނުގެންދިއުމަށެވެ. އޭރު ނަތީޖާ އަކީ، 2-2 އެވެ.
މެޑްރިޑަށް އުފަން ޑި މިގުއެލް، ފުޓްބޯޅަ ކެރިއަރު ފެށީ 2015 ވަނަ އަހަރު ލެގަނޭސް އިންނެވެ. ސްޕެއިނުގެ ތަފާތު އަށް ކްލަބަކަށް ކުޅެފައިވާ ޑި މިގުއެލް ޓެނެރިފް އަށް ބަދަލުވީ މިދިޔަ އަހަރު އެވެ. އެއީ، ތިން އަހަރުގެ ކޮންޓްރެކްޓެއްގަ އެވެ. އެ ޓީމަށް ކުޅެދިން 29 މެޗުން ވަނީ 11 ލަނޑު ޖަހައިފަ އެވެ.
