މެޑްރިޑް (އޮކްޓޫބަރު 19) - ސްޕެނިޝް ލީގުގައި ރޭ ކީލިއަން އެމްބާޕޭގެ ދެ ގޯލާ އެކު، ރެއާލް މެޑްރިޑުން 4-1 އިން ސެވިއްޔާ ބަލިކޮށްފި އެވެ.
މި ނަތީޖާއާ އެކު، ރެއާލުން ވަނީ ލީގުގެ ތިން ވަނަ އަށް ޖެހިލައިފަ އެވެ. އެއް ވަނައިގައި އޮތީ ކުޅުނު ނުވަ މެޗުން ވެސް މޮޅުވި ބާސެލޯނާ އެވެ. އެ ޓީމަށް ނުވަ މެޗުން 27 ޕޮއިންޓް ވަނީ ލިބިފަ އެވެ. ދެ ވަނައިގައި އޮތް އެތުލެޓިކޯ މެޑްރިޑްގެ އޮތި ނުވަ މެޗުން 22 ޕޮއިންޓެވެ. ތިން ވަނައިގައި އޮތް ރެއާލަށް ނުވަ މެޗުން 21 ޕޮއިންޓް އަދި ހަތަރެއްގައި އޮތް ރެއާލް ބެޓިސް އަށް ވަނީ ނުވަ މެޗުން 19 ޕޮއިންޓް ލިބިފަ އެވެ. އަދި، ރެއާލް އަތުން ބަލިވި ސެވިއްޔާ ހަ ވަނައިގައި އޮތީ ނުވަ މެޗުން 16 ޕޮއިންޓާ އެކު އެވެ.
ރެއާލުގެ ސަންޓިއާގޯ ބާނަބައުގައި ކުޅުނު މެޗުގައި، 30 ވަނަ މިނިޓްގައި އެ ޓީމުން ލީޑުނެގީ އާޑާ ގުލާ ޖެހި ހިތްގައިމު ގޯލުންނެވެ. ރެއާލުގެ ޔަން ޑިއޮމަންޑޭ އަރިމަތިން ދިން ބޯޅައެއް އާޑާ ގުލާ ވަނީ ގޯލުގެ މަތީ ކަނަށް ފޮނުވާލައިފަ އެވެ.
ފުރަތަމަ ހާފު ނިމުމުގެ ކުރިން ރެއާލުން ލީޑުފުޅާކުރި އެވެ. މިއީ، މެޗުގެ 37 ވަނަ މިނިޓްގައި އެމްބާޕޭ ޖެހި ގޯލެކެވެ. މޮޅު ކޮންޓްރޯލަކުން އޭރިއާތެރެއަށް ބޯޅަ ގެންދިއުމަށް ފަހު، އެމްބާޕޭ މި ލަނޑު ޖެހީ، ސެވިއްޔާގެ ކީޕަރު، އޮޑީސިއަސް ވްލަޗޯޑިމޯސް ކައިރިން ނައްޓައިފަ އެވެ.
ރެއާލަށް 61 ވަނަ މިނިޓްގައި ތިން ވަނަ ލަނޑު ޖަހައިިދިނީ ޕެނަލްޓީ އަކުން އެމްބާޕޭ އެވެ. މިއީ، އެމްބާޕޭ އަށް ކުރި ފައުލަކަށް ދިން ޕެނަލްޓީ އެކެވެ. މި ލަނޑާ އެކު، އެމްބާޕޭ ވަނީ މި ސީޒަނުގައި 11 ލަނޑު ހަމަކޮށްފަ އެވެ.
ސެވިއްޔާ އިން މެޗުގެ ތެރެއަށް ވަނުމަށްޓަކައި ކުރި މަސައްކަތުގެ ތެރެއިން އެ ޓީމުން ވަނީ 80 ވަނަ މިނިޓްގައި ލަނޑެއް ޖަހައިފަ އެވެ. ރެއާލްގެ އޭރިއާތެރެއިން ގޯލުގެ ތިރީ ކަނަށް ބޯޅަ ފޮނުވާލައިގެން މި ލަނޑު ޖެހީ މަނޫ ބުއޭނޯ އެވެ.
ރެއާލަށް މެޗުގެ ތިން ޕޮއިންޓް ޔަގީންކޮށްދިން ގޯލު މެޗުގެ 82 ވަނަ މިނިޓްގައި ކާމިޔާބުކުރީ މެޗުގައި މޮޅު ކުޅުމެއް ދެއްކި ޑިއޮމަންޑޭ އެވެ. އޭނާ އަށް ލިބުނު ފުރުސަތުގައި، އޭރިއާބޭރުން ފޮނުވާލި ޝޮޓް އަމާޒުވީ ގޯލުގެ މަތީ ކަނަށެވެ. މެޗުގައި ރެއާލަށް ފަސް ވަނަ ލަނޑެއް ޖަހައިދޭން އެ ޓީމުގެ ފްރާންސް މިޑްފީލްޑަރު، އައުރެލިއަން ޗުއަމެނީ ޖެހި ޝޮޓް ސެވިއްޔާގެ ކީޕަރު ވްލަޗޯޑިމޯސް ވަނީ މަތަކޮށްފަ އެވެ.
ލީގުގައި ރެއާލުން ދެން އެންމެ އަވަހަށް ކުޅޭ މެޗުގައި ބައްދަލުކުރާނީ ބާސެލޯނާއާ އެވެ.
