ސެވިލް، ސްޕެއިން (އޮކްޓޫބަރު 17) - ސްޕެނިޝް ލީގުގައި މިރޭ ރެއާލް ބެޓިސް 5-2 އިން ބަލިކޮށް ބާސެލޯނާ އިން ލީގުގައި ޖެހިޖެހިގެން ނުވަ ވަަނަ މެޗުން މޮޅުވެއްޖެ އެވެ.
މިއީ، ސްޕެނިޝް ލީގުގެ އާ ސީޒަނެއްގައި ޓީމެއްގެ އެންމެ ރަނގަޅު ޓްރެކް ރެކޯޑެވެ.
ސްޕެނިޝް ލީގުގެ އެއް ވަަނައިގައި އޮތް ބާސެލޯނާ އިން ސައްތަ އިން ސައްތަ ރެކޯޑަކާ އެކު އޮތީ، ނުވަ މެޗުން 27 ޕޮއިންޓް ހޯދައިގެންނެވެ. ދެ ވަނައިގައި އޮތް އެތުލެޓިކޯ މެޑްރިޑްގެ އޮތީ ނުވަ މެޗުން 22 ޕޮއިންޓެވެ. ތިން ވަނައިގައި އޮތް ރެއާލް ބެޓިސް އަށް ވަނީ ނުވަ މެޗުން 19 ޕޮއިންޓް ލިބިފަ އެވެ. އެތުލެޓިކޯ އިން ވަނީ މިރޭ 1-0 އިން އެސްޕަންޔޯލް އަތުން މޮޅުވެފަ އެވެ.
ހަތަރެއްގައި އޮތް ރެއާލް މެޑްރިޑުން. މާދަމާރޭ ކުޅޭނީ ފަސް ވަނައިގައި އޮތް ސެވިއްޔާއާ އެވެ. ރެއާލަށް އަށް މެޗުން 18 ޕޮއިންޓް އަދި ސެވިއްޔާ އަށް އަށް މެޗުން ވަނީ 14 ޕޮއިންޓް ލިބިފައިވެ އެެވެ.
އެސްޓަޑިއޯ ލަ ކަރްޓޫހާ ސްޓޭޑިއަމްގައި ކުޅުނު މެޗު ފަށައިގެން، 10 ވަނަ މިނިޓްގައި ބާސެލޯނާ އިން ލީޑުނެގީ ލަމީން ޔަމާލް ޖެހި ހިތްގައިމު ގޯލުންނެވެ. އެކަމަކު، 27 ވަނަ މިނިޓްގައި ޕަބްލޯ ފޯނާލްސް ތަނަވަސްކޮށްދިން ފުރުސަތެއްގައި ޑިއޭގޯ ގޯމޭސް ވަނީ ބެޓިސް އަށް އެއްވަރުކޮށްދީފަ އެވެ.
ދެ ވަނަ ފަހަރަށް ބާސެލޯނާ އިން ލީޑުނެގީ، 41 ވަނަ މިނިޓްގައި ރޮޑްރީގޯ (ރޮޑްރީ) ބޮލުން ޖެހި ގޯލުންނެވެ. މިއީ، ބާސެލޯނާ އަށް ރޮޑްރީ ޖަހައިދިން ފުރަތަމަ ގޯލެވެ. އޭގެ ދެ މިނިޓް ފަހުން، ޖިއޮވާނީ ލޮ ސެލްސޯ ޖެހި ހިތްގައިމު ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިނުގަންނަން ނިންމި އެވެ. އެއީ، އެޓޭކުގައި ބެޓިސްގެ ކުޅުންތެރިއެއްގެ އަތުގައި ބޯޅަ ޖެހުމުންނެވެ.
ބާސެލޯނާ އިން ދެ ވަނަ ހާފުގެ ކުޅުން ފެށިގެން ހަ މިނިޓް ތެރޭ، މެޗުގެ 51 ވަނަ މިނިޓްގައި ގަބްރިއެލް ޖީސޫސް ޖެހި ގޯލުން ލީޑުފުޅާކުރި އެވެ. އޭގެ ދެ މިނިޓް ފަހުން، ބެޓިސްގެ އަބްދެ އެޒަލްޒޫލީ ވަނީ ލަނޑެއް ޖަހައި، ބެޓިސް އަށް ފަރަގު ކުޑަކޮށްދީފަ އެވެ. އެކަމަކު، އެ ޓީމުގެ ފަކުންޑޯ ބާނާލަށް ރަތެއް ދެއްކުމުން ބެޓިސްގެ ކުޅުންތެރިއަކު މަދުވި އެވެ.
އޭގެ ފަހުން، ބާސެލޯނާ އިން ވަނީ އިތުރު ދެ ގޯލު ޖަހައިފަ އެވެ. އެ ގޮތުން، 62 ވަނަ މިނިޓްގައި ޔަމާލްގެ ހިލޭޖެހުމެއްގައި ބެޓިސް އޭރިއާތެރެއިން ޕައު ކުބަރްސީ ދިން ބޯޅައަކުން އެރިކް ގާސިއާ ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ. އަދި، ބަދަލަކަށް ކުޅެން އެރި ޑެނީ އޮލްމޯ ވަނީ 81 ވަނަ މިނިޓްގައި ބާސެލޯނާގެ ފަސް ވަނަ ލަނޑު ޖަހައިފަ އެވެ. މި ލަނޑު ޖަހަން ވެސް ފުރުސަތު ހޯދައިދިނީ ޒުވާން ޑިފެންޑަރު، ކުބަރްސީ އެވެ.
ސްޕެނިޝް ލީގުގައި ދެން ބާސެލޯނާ އަށް އޮތް މެޗަކީ ވާދަވެރި ރެއާލް މެޑްރިޑާ ދެކޮޅަށް ކުޅޭ އެލް ކްލަސިކޯ މެޗެވެ.
