ބޭންކުތަކުން ސަރުކާރަށް ފަންޑު ކުރަމުންދާތީ އަމިއްލަ ވިޔަފާރިތަކަށް ފުރުސަތު ހަނިވެފައިވާ ކަމަށް ކުރީގެ އިކޮނޮމިކް މިނިސްޓަރު އަހުމަދު މުހައްމަދު (އަންޑޭ) ވިދާޅުވެއްޖެ އެވެ.
ގެސްޓްހައުސް ސިމްޕޯޒިއަމް 2026 ގައި ބޭއްވި ޕެނަލް ޑިސްކަޝަންގައި އަހުމަދު މުހައްމަދު ވިދާޅުވީ އަމިއްލަ ވިޔަފާރިތަކަށް ދިވެހި ރުފިޔާ އާއި ޑޮލަރު ލިބުމުގައި ބޮޑެތި ދަތިތަކެއް ކުރިމަތިވެފައިވާ ވަނީ ބޭންކުތަކުން ސަރުކާރަށް ފައިސާ ދިނުމުގެ ސަބަބުން ކަމަށެވެ.
މި މައްސަލައިގެ ފުނަށް ވަޑައިގަންނަވަމުން އަހުމަދު މުހައްމަދު ވިދާޅުވީ، މިއީ ހަމައެކަނި މި ސަރުކާރުގެ މައްސަލައެއް ނޫން ކަމަށެވެ. އޭނާ ވިދާޅުވި ގޮތުގައި މިއީ ޒަމާނުއްސުރެން ސަރުކާރުތަކުން އަމަލުކުރަމުން އަންނަ ގޮތް ކަމަށެވެ.
އަހުމަދު މުހައްމަދު ވިދާޅުވީ ރާއްޖޭގެ ދަރަނީގެ ހާލަތަކީ މި ސަރުކާރުން ކުރި ކަމެއްގެ ސަބަބުން ވީކަމެއް ނޫން ކަމަށް އޭނާ ގަބޫލުކުރާ ކަމަށެވެ. ނަމަވެސް ކަންކަން ރަނގަޅު ކުރެވޭނީ ކުރީ ސަރުކާރޭ ބުނެ ނިންމާނުލާ، މާލީ ޒިންމާދާރުކަން ގެނެސްގެން ކަމަށް އޭނާ ވިދާޅުވި އެވެ.
"އާނ. އަހަރަމެން ވަރަށް ގިނަ ދަރަނި ދައްކައިފިން. މިއީ ކޮންމެހެން އެ މީހުން އުފެއްދި ދަރަންޏަކަށް ނުވިޔަސް މިކަމާ ކުރިމަތިލާން މި ޖެހުނީ، ނަސީބު ދިމާކުރި ގޮތުން، މިހާރުގެ ސަރުކާރަށް. ނަމަވެސް، މިއަދު ވެރިކަމުގެ ހުންގާނުގައި ތިބި މީހުންނާއި، ކުރިއަށް އޮތްތަނުގައި ތިބޭނެ މީހުންނަށް މިކަމަށް ބަދަލެއް ގެނެވިދާނެ،" އަހުމަދު މުހައްމަދު ވިދާޅުވި އެވެ.
"ހަމައެކަނި ކުރީ ސަރުކާރޭ ބުނެގެން އަހަރަމެންނަކަށް ކަންކަމެއް ރަނގަޅެއް ނުކުރެވޭނެ."
މި ސަރުކާރުގެ މާލީ ސިޔާސަތު ވެސް ގޯސްކަން ދައްކަން އަހުމަދު މުހައްމަދު ބޭނުންކުރެއްވީ އެތެރޭގެ ދަރަނީގެ އަދަދުތަކެވެ. ރަސްމީ ރެކޯޑުތަކުން ދައްކާ ގޮތުގައި މި ސަރުކާރުގެ ދައުރުގެ ތެރޭގައި އެތެރޭގެ ދަރަނި ވަނީ ވަރަށް ބޮޑަށް އިތުރުވެފަ އެވެ.
އަހުމަދު މުހައްމަދު ވިދާޅުވީ ބޭންކުތަކުން ސަރުކާރަށް ދަރަނި ދޫކުރުމުގެ ސަބަބުން އަމިއްލަ ވިޔަފާރިތަކަށް ބޭނުންވާ މާލީ އެހީތެރިކަން ހޯދުމުގައި ހުރަސްތަކެއް އެބަހުރި ކަމަށެވެ. އަދި، ޑޮލަރު ތާށިކަމާ މި މައްސަލަ ގުޅުވާ، އޭނާ ވިދާޅުވީ މާކެޓުގައި ޑޮލަރުގެ ދަތިކަން އިންތިހާއަށް ބޮޑުވީ ވެސް މީގެ ސަބަބުން ކަމަށެވެ.
މި އުނދަގޫތަކުން އަރިގަންނަން ސަރުކާރަށް އޮތް ހަމައެކަނި މަގަކީ ފިސްކަލް ޑިސިޕްލިން (މާލީ ޒިންމާދާރުކަން) ގާއިމުކުރުން ކަމަށް އަހުމަދު މުހައްމަދު ވިދާޅުވި އެވެ.
ދަރަނި ދެމެހެއްޓެނިވި މިންވަރެއްގައި ހިފެހެއްޓުމަށާއި މާލީ ކަންކަމުގައި ޒިންމާދާރުވާން ޖެހޭ. އެހެން ނޫންނަމަ، ފިރާގު ވިދާޅުވި ފަދައިން، އަހަރަމެން ޖެހޭނީ ކިރު ފެލަން އޮތް ހަމައެކަނި ގެރީގެ ކިރު އެއްކޮށް ހުސްވަންދެން ފެލަން،" އޭނާ ވިދާޅުވި އެވެ.
"އެހެން ކިރު ފެލަން އޮތް ހަމައެކަނި ގެރިއަކީ، ތި އެންމެން ތަމްސީލުކުރާ، ޓޫރިޒަމް ސިނާއަތް."
ފިނޭންސް މިނިސްޓްރީގެ އެންމެ ފަހުގެ ރެކޯޑުތަކުން ދައްކާ ގޮތުގައި މި މަސް ފެށުނު ހަފުތާގައި އެތެރޭގެ ދަރަނި ހުރީ 98.8 ބިލިއަން ރުފިޔާގައި އެވެ. މި ސަރުކާރުން ވެރިކަމާ ހަވާލުވީއިރު އެތެރޭގެ ދަރަނި ހުރީ 68.1 ބިލިއަން ރުފިޔާގައި އެވެ.
މި އަދަދުތަކުން ދައްކާ ގޮތުގައި، މި ސަރުކާރުން ވަނީ ވެރިކަމަށް ތިން އަހަރު ނުވަނީސް އެތެރޭގެ ބާޒާރުން 30 ބިލިއަން ރުފިޔާގެ ދަރަނި ނަގާފަ އެވެ. މިއީ 45.1 ޕަސެންޓުގެ އިތުރުވުމެކެވެ.
