ދިވެހި ސަރުކާރުން ސްޓޭޓް ބޭންކް އޮފް އިންޑިއާ (އެސްބީއައި) އަށް ވިއްކާފައިވާ ޓީބިލުތަކަށް ދައްކަން ޖެހޭ 50 މިލިއަން ޑޮލަރު ދައްކަން ބޭންކް އޮފް މޯލްޑިވްސް (ބީއެމްއެލް) އިން ޑޮލަރު ދިން ކަމަށް ބުނާ ވާހަކަ އެ ބޭންކުން މިއަދު ދޮގުކޮށްފި އެވެ.
ބީއެމްއެލްއިން މިހެން ބުނީ އެ ބޭންކަށް ދިމާވެގެން އުޅޭ ޑޮލަރު ތާށިކަމުގެ މައްސަލަ ގުޅެޅީ މި ލޯނު އަދާކުރަން ސަރުކާރަށް ފައިސާ ދިނުމުން ކަމަށް އިދިކޮޅު ސިޔާސީ މީހުން ބުނަމުން އަންނާތީ އެވެ. މީގެ ކުރިން ސަރުކާރުން ވެސް ވަނީ މިކަން ދޮގުކޮށް، އެ ފައިސާ ދެއްކީ ސޮވްރިން ޑިވެލޮޕްމަންޓް ފަންޑް (އެސްޑީއެފް) އަށް ޖަމާކޮށްފައި ހުރި ފައިސާ ކަަމަށް ބުނެފަ އެވެ.
މި ތުހުމަތުތަކާ ގުޅިގެން ނެރުނު ބަޔާނެއްގައި، ސަރުކާރުން މި ދަރަނި އަދާކުރުމާއި ބީއެމްއެލްގެ މާލީ ހާލަތާ ނުވަތަ ބޭންކިން އޮޕަރޭޝަންތަކާ އެއްވެސް ގުޅުމެން ނެތް ކަމަށް ބީއެމްއެލްއިން ބުންޏެވެ.
"ބީއެމްއެލް އިން މި ފައިސާ ދެއްކުމަށް ކަސްޓަމަރުންގެ ޑިޕޮސިޓްތަކެއް ނުވަތަ ބޭންކުގެ އަމިއްލަ އެއްވެސް ވަސީލަތެއް ބޭނުންކޮށްފައެއް ނުވޭ،" ބަޔާނުގައި ބުންޏެވެ.
ސަރުކާރުގެ ދަރަނި ދެއްކުމާ ބޭންކުގެ މާލީ ހާލަތާ ގުޅުމެއް ނެތް ކަމަށް ބުނުމާއެކީ، ބީއެމްއެލްއިން ވަނީ އެ ބޭންކު އޮތީ މާލީ ގޮތުން ވަރުގަދަކޮށް ކަމަށް ވެސް ބުނެފަ އެވެ. އަދި ބުނީ، އެ ބޭންކަކީ، ކަނޑައެޅިފައިވާ ރިސްކު އެޕެޓައިޓްތަކާއި، ރެގިއުލޭޓަރީ މިންގަނޑުތަކާއި، ހަރުދަނާ ގަވަނަންސް އަދި ރިސްކް މެނޭޖުމަންޓު އޮނިގަނޑެއްގެ ތެރެއިން ހިންގަމުން އަންނަ ބޭންކެއް ކަމަށެވެ.
ބީއެމްއެލްއިން ބުނީ ސަރުކާރުން މި މުއާމަލާތް ހިންގުމުގެ ސަބަބުން އެ ބޭންކުގެ މާލީ ވަސީލަތަކަށް އެއްވެސް އަސަރެއް ނުކުރާ ކަމަށެވެ. އަދި ކަސްޓަމަރުންނަށް އަދާކުރަން ޖެހޭ ޒިންމާތައް އަދާކުރުމަށް އެއްވެސް ހުރަހެއް ނެތް ކަމުގެ ޔަގީންކަން އަރުވާ ކަމަށް ވެސް ބަޔާނުގައި ބުންޏެވެ.
މި ވާހަކަތަކަށް ފަހު ބީއެމްއެލްއިން ވަނީ ބޭންކުގެ މާލީ ހާލަތުގެ ވާހަކަ ދެއްކުމުގެ ކުރިން އެ މައުލޫމާތު ކަށަވަރު ކުރުމަށް މީޑިއާތަކާއި ސިޔާސީ މީހުންނަށް އިލްތިމާސްކޮށްފަ އެވެ. އަދި، ބޭންކުގެ އަގުވައްޓާލަން ނޫނީ ބޭންކަށް ގެއްލުންވާ ގޮތަށް ހަގީގަތާ ހިލާފު ހަބަރު ފަތުރާ ނަމަ ގާނޫނީ ފިޔަވަޅު އެޅުމުގެ އިހުތިޔާރު ބޭންކަށް ލިބިގެންވާ ކަމަށް ބުންޏެވެ.
ބޭންކުގެ މާލީ ހާލަތު ރަނގަޅު ކަމަށް ބީއެމްއެލްއިން ބުނި ނަމަވެސް އެ ބޭންކަށް ޑޮލަރު ލިބުން ތާށިވެ އާންމުންނާއި ވިޔަފާރިތަކަށް ޑޮލަރު ފޮނުވުމާއި ޑޮލަރުން ފައިސާ ދެއްކުމުގައި ގިނަ އުނދަގޫތަކާ ވަނީ ކުރިމަތިވެފަ އެވެ. މި މައްސަލައަކީ، އިންޑިއާއަށް 50 މިލިއަން ޑޮލަރު ދެއްކުމުގެ މާ ކުރިން އޮތް މައްސަލައެކެވެ.
