މި އަހަރުގެ ތެރޭގައި ދައްކަން ހުރި ބޮޑެތި ދަރަނިތައް އަދާކޮށް، ރާއްޖެ ބަނގުރޫޓުވިޔަ ނުދީ ސަލާމަތްކޮށްދިނީ ޓޫރިޒަމް ވިޔަފާރިތަކުން ކަމަށް ކުރީގެ އިކޮނޮމިކް މިނިސްޓަރު އަހުމަދު މުހައްމަދު (އަންޑޭ) މިއަދު ވިދާޅުވެއްޖެ އެވެ.
މޯލްޑިވްސް އިސްލާމިކް ބޭންކް (އެމްއައިބީ) އިން އިންތިޒާމުކުރި ގެސްޓްހައުސް ސިމްޕޯސިއަމް 2026 ގެ ޕެނަލް ޑިސްކަޝަންގައި އަންޑޭ މިހެން ވިދާޅުވީ، ޑޮލަރު މާރުކުރަން މަޖުބޫރުކޮށްފައި އޮތުމުން ޓޫރިޒަމް ވިޔަފާރިތަކަށް ހުރި ގޮންޖެހުންތަކުގެ ވާހަކަ ދައްކަވަމުންނެވެ.
މި ޕެނަލް ޑިސްކަޝަންގައި ބައިވެރިވި ޓޫރިޒަމް ވިޔަފާރިވެރިންނާއި ފަންނީ މީހުން ވެސް ވަނީ މާރުކުރަން މަޖުބޫރުކޮށްފައި އޮތުމުގެ ސަބަބުން ވިޔަފާރިކުރަން ވަރަށް އުނދަގޫ ކަމުގެ ކަންބޮޑުވުން ފާޅުކޮށްފަ އެވެ. އަދި، މިހާ އުނދަގުލުގައި ވިޔަފާރިކުރަން ޖެހުނު ދުވަހެއް ކުރިމަތި ނުވާ ކަމަށް ވެސް އެ މީހުން އެއްބަސްވި އެވެ.
އެ ގޮތުން ކުރި މަޝްވަރާތަކުގައި އަހުމަދު މުހައްމަދު ވިދާޅުވީ، ސަރުކާރުން ޑޮލަރު މާރުކުރަން މަޖޫބޫރުކޮށްގެން ކުރި ކަމަކީ، ދަރަނި ދައްކާނެ ފައިސާ ހޯދުން ކަމަށެވެ. މިކަން ރިޒާވު އަދަދުތަކަށް ބެލުމުން ފެންނާނެ ކަމަށް އޭނާ ވިދާޅުވި އެވެ.
އަހުމަދު މުހައްމަދު ވިދާޅުވި ގޮތުގައި ސަރުކާރަށް ދަރަނިތައް ދެއްކުނީ ޓޫރިޒަމް ވިޔަފާރިތަކުން 20 ޕަސެންޓު ޑޮލަރު މާރުކުރުމުން ކަމަށެވެ. އަދި، މިއީ އެ ސިނާއަތަށް ޝުކުރުއަދާކުރަން ޖެހޭ ކަމެއް ކަމަށާއި މާރުކުރާ ނިސްބަތް 40 ޕަސެންޓަށް މަތިކުރުމަކީ ޝުކުރު އަދާކުރާ ގޮތް ނޫން ކަމަށް އޭނާ ވިދާޅުވި އެވެ.
ދަރަނި އަނބުރާ ދެއްކުމުގައި ސަރުކާރުން ބޮޑު ކާމިޔާބީއެއް ހޯދާފައިވީ ނަމަވެސް، މާލީ ކަންކަން ހަރުަދަނާކުރުމުގައި ސަރުކާރަށް އެ ވަރުގެ ކާމިޔާބީއެއް ނުހޯދޭ ކަމަށް އަހުމަދު މުހައްމަދު ވިދާޅުވި އެވެ. މި ނުކުތާއަށް ބާރުދެއްވަން އޭނާ ބޭނުންކުރެއްވީ އެތެރޭގެ ދަރަނި އިތުރުވަމުން ދިޔުމެވެ.
އެތެރޭގެ ދަރަންޏާ ހެދި، އަހުމަދު މުހައްމަދު ވިދާޅުވީ، ބިލިއަން ޑޮލަރަށް ވުރެ ބޮޑު އަދަދެއްގެ ދަަރަނި އަދާކުރި ނަމަވެސް، ޖުމްލަ ދަރަންޏަށް މާ ބޮޑު ބަދަލެއް ނާންނަ ކަމަށެވެ. އަދި، މީގެ ސަބަބުން ސަރުކާރަށް ބޭންކުތަކަށް ބަރޯސާވުން ބޮޑުވެ، އަމިއްލަ ވިޔަފާރިތަކަށް ދޫކުރަން ހުރި ފައިސާ ވަރަށް މަދުވެފައިވާ ކަމަށް އޭނާ ވިދާޅުވި އެވެ.
އަހުމަދު މުހައްމަދު ވަނީ ޑޮލަރު މާރުކުރުމުގެ ސިޔާސަތަށް ފާޑުވިދާޅުވުމާއެކީ، އެ ސިޔާސަތަކީ ހައްލެއް ނޫން ކަމަށް ވެސް ވިދާޅުވެފަ އެވެ. ސަބަބެއް ކަމަށް އޭނާ ފާހަގަކުރެއްވީ، ފިސްކަލް ޑިސިޕްލިން ގެނައުމުގައި ސަރުކާރު ނުކުޅެދުމެވެ. އޭނާ ވަނީ، މިއީ ކުރީ ސަރުކާރޭ ބުނެ ނިންމާލެވޭނެ ވަރު މައްސަލައެއް ނޫން ކަމަށް ވިދާޅުވެ، މާލިއްޔަތު ހަމައަކަށް އަޅުވަން މާލީ ސިޔާސަތު ހަރުދަނާ ކުރަން ސަަރުކާރަށް ގޮވާލައްވާފަ އެވެ.
