މޯލްޑިވްސް އިސްލާމިކް ބޭންކް (އެމްއައިބީ) އިން އަލަށް ތައާރަފުކުރި "އެމްއައިބީ ގެސްޓްހައުސް އެވޯޑްސް 2026" ގެ އެންމެ ޝަރަފުވެރި އެއް އިނާމު ކަމަށްވާ "ގެސްޓްހައުސް ޓޫރިޒަމް ޗެމްޕިއަން އައިލެންޑް" އެވޯޑް ފުވައްމުލައް ސިޓީން ކާމިޔާބުކޮށްފި އެވެ.
މިއަދު ބާސެލޯ ނަސަންދުރާގައި ބޭއްވި ރަސްމިއްޔާތެއްގައި މި އެވޯޑް ފުވައްމުލަކަށް އެރުވުމާއެކު، އެ ސިޓީއަށް ވަނީ އިޖުތިމާއީ މަޝްރޫއެއް ހިންގުމަށްޓަކައި 500،000 ރުފިޔާގެ މާލީ އެހީއެއް ވެސް ކަށަވަރުވެފަ އެވެ.
މި އެވޯޑަކީ އެމްއައިބީން ދޭ އެވޯޑްތަކުގެ ތެރެއިން ރަށެއްގެ ފެންވަރުގައި ދެވޭ ހަމައެކަނި އިނާމެވެ. މިއީ ވަކިވަކި ގެސްޓްހައުސްތަކުގެ ކުރިއެރުމަށްވުރެ ބޮޑަށް، މުޅި ރަށުގެ ފެންވަރުގައި ފަތުރުވެރިކަން ފުޅާކޮށް، ދެމެހެއްޓެނިވި ގޮތެއްގައި އެ ސިނާއަތް ކުރިއެރުވުމަށް ނަމޫނާ ދައްކާފައިވާ ރަށްރަށުގެ އަގުވަޒަންކުރުމަށް ދޭ އެވޯޑެކެވެ.
މި އެވޯޑަށް ރަށްރަށް ހޮވުމުގައި ބަލާފައިވާ މައިގަނޑު މިންގަނޑުތަކުގެ ތެރޭގައި ރަށު ކައުންސިލާއި، ރައްޔިތުންނާއި، ވިޔަފާރިތަކުގެ މެދުގައި އޮތް ގާތް ގުޅުމާއި، ރަށް އިޝްތިހާރުކުރުމަށް ކުރެވުނު މަސައްކަތްތައް ހިމެނެއެވެ. މީގެ އިތުރުން ރަށުގެ އުމްރާނީ ތަރައްގީއާއި، ތަބީއީ މާހައުލު ރައްކާތެރިކުރުމަށް ކުރާ މަސައްކަތްތަކާއި، ފަތުރުވެރިންނަށް ރައްކާތެރި އަދި އުފާވެރި މާހައުލެއް ފޯރުކޮށްދިނުމަށް ކުރާ މަސައްކަތްތަކަށް ވެސް ވަނީ އިންސާފުކޮށްފައެވެ.
މި އެވޯޑަށް ކުރިމަތިލުމުގެ ޝަރުތެއްގެ ގޮތުން އެ ރަށެއްގައި މަދުވެގެން ހިދުމަތްދޭ 50 ގެސްޓްހައުސް ކޮޓަރި ހުންނަންޖެހެ އެވެ.
އެމްއައިބީން ދޭ 500،000ރ. ގެ އެހީއަކީ ފުވައްމުލަކުގެ ރައްޔިތުންނާއި އެ ރަށަށް ޒިޔާރަތްކުރާ ފަތުރުވެރިންނަށް ފާގަތި އަދި ފަސޭހަ މާހައުލެއް ގާއިމުކުރުމަށްޓަކައި ހިންގޭ އިޖުތިމާއީ މަޝްރޫއަކަށް ހާއްސަކުރެވިފައިވާ ފައިސާއެކެވެ. މިއީ އެ ރަށުގެ ފަތުރުވެރިކަމުގެ އުމްރާނީ ވަސީލަތްތައް އިތުރަށް ވަރުގަދަކުރުމަށް ލިބިގެންދާނެ ބޮޑު އެހީތެރިކަމެކެވެ.
ރާއްޖޭގެ އެންމެ ދެކުނުގައި، އެއް ފަސްގަނޑަކަށް އޮންނަ ފުވައްމުލައް ސިޓީއަކީ ފަހަކަށް އައިސް ރާއްޖޭގެ ގެސްޓްހައުސް ފަތުރުވެރިކަމުގައި އެންމެ ބާރަށް ކުރިއަރަމުން އަންނަ އެއް މަންޒިލެވެ. ފުވައްމުލަކީ ފީނުމުގެ އިތުރުން، ރަށުގައި ހުންނަ ކުޅިތަކާއި ޗަސްބިންތަކުގެ ސަބަބުން ބައިނަލްއަގުވާމީ ގޮތުން ބޮޑު މަގުބޫލުކަމެއް ހޯދާފައިވާ ރަށެކެވެ.
މީގެއިތުރުން ގެސްޓް ހައުސް އެވޯޑުގައި ހޮވި ތިން އެވޯޑެއް ކަމަދޫ އިން ގެސްޓްހައުސްއަށް ލިބުނުއިރު، އޯޝަން ގްރޭންޑް ގެސްޓްހައުސް އާއި ބްލިސް ދިގުރަށް ގެސްޓްހައުސް އާއި ކޮނޑޭ ގާޑަން ވިލާ އަދި ސްވާން ބައި ހޯކްސްއަށްވެސް އެވޯޑެއް ލިބުނެވެ. ގެސްޓްހައުސް އެވޯޑު ހަފުލާގައި ހޮވި އައުޓްސްޓޭޑިން ޑައިވް މާސްޓާ އެވޯޑު ލިބުނީ މުހައްމަދު ޝަމޫން އަމީނަށެވެ.
އެމްއައިބީ ގެސްޓް ހައުސް އެވޯޑްސްއަކީ ގެސްޓްހައުސް ދާއިރާގައި ފާހަގަކޮށްލެވޭ ހިދުމަތްތައް ކުރާ ފަރާތްތަކުގެ އަގުވަޒަންކުރުމަށް އެމްއައިބީން ފެށި މަސައްކަތެއް ކަމަށް އެ ބޭންކުން ބުންޏެވެ. މި އެވޯޑުތައް ދިނުމަށް ހަމަޖެހިފައި ވަނީ ގެސްޓްހައުސްތަކަށާއި، ވަކިވަކި ފަރުދުންގެ އިތުރުން ރަށްރަށަށެވެ. މީގެ ތެރޭގައި މެހެމާންދާރީގެ ހިދުމަތާއި، އީޖާދީ މަސައްކަތްތަކާއި، ދެމެހެއްޓެނިވި ގޮތެއްގައި ކުރާ މަސައްކަތްތައް ހިމެނެ އެވެ.
