ސަރުކާރަށް ޑޮލަރު ގެނައުމަށް ތަންފީޒުކުރަން ފެށި ހުރިހާ ސިޔާސަތެއް ފެއިލްވެ، ޑޮލަރުގެ އަގު ދަނީ މައްޗަށް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު އެކްސް ގައި ވިދާޅުވީ ދިވެހި ރުފިޔާ ޑޮލަރަށް މާރު ނުކުރެވި، އޭގެ ސަބަބުން ބޭރުގައި ދިރިއުޅޭ އާއިލާތަކާއި ކިޔަވާ ކުދިންގެ އިތުރުން ވިޔަފާރިވެރިންނަށް އިންތިހާއަށް ދަތިވެފައިވާ ކަމަށެވެ.
"ޔޫއެސްޑީގެ އަގު ދަނީ ހައްތަހާ މައްޗަށް. އެކައުންޓުގައި އެމްވީއާރް ހުރީމަ އެ ފައިސާ ޔޫއެސްޑީއެއް މާރެއް ނުކުރެވޭ. ކުދިން މަދަރުސާއަށް ލައިގެން ބޭރުގައި ދިރިއުޅޭ އާއިލާތަކާއި، ގިނަ ވިޔަފާރިވެރިންނަށް މިވަނީ އިންތިހާއަށް ދަތިވެފައި. ސަރުކާރުން ޔޫއެސްޑީ ހޯދުމަށް ގެނައި ސިޔާސަތެއް ފެއިލްވެއްޖެ،" ނަޝީދު ވިދާޅުވި އެވެ.
މި މަހުވެސް ރާއްޖެ ބަނގުރޫޓުނުވެ ސަލާމަތްވީ އިންޑިއާ އިން ނަގާފައިވާ 30 ބިލިއަން ރުޕީސްގެ ކަރަންސީ ސްވޮޕް ރޯލްއޯވާ ކޮށްދިނުމުންކަން ފާހަގަކުރައްވާ ނަޝީދު ވިދާޅުވީ ރައީސް މުހައްމަދު މުއިއްޒު އެވަރުންވެސް ޕާކިސްތާނަށް ވަޑައިގަންނަވަން އުޅޭ ކަމަށެވެ.
ޑޮލަރު ރޭޓުގެ ހަބަރު ޖެހުން މަނާކުރެވުނަސް ކަޅު ބާޒާރެއް ނުހުއްޓުވުނު
ޑޮލަރުގެ އަގު ބޮޑުވަނީ ނޫސްތަކުން ފަތުރާ ހަބަރުތަކުގެ ސަބަބުން ކަމަށް ސަރުކާރުން ބުނި ނަމަވެސް، ވަރުގަދަ ފިޔަވަޅުތަކާއެކުވެސް ނުއަގުގައި ޑޮލަރު ގަނެވިއްކުން ނުހުއްޓުވޭތީ އާންމުން ދަނީ ކަންބޮޑުވުން ފާޅުކުރަމުން.
ޑޮލަރު މައްސަލަ ހައްލުކުރުމުގެ ގޮތުން ސަރުކާރުގެ ތަންފީޒީ ކަންކަން ހަރުކަށި ކުރުމާއެކުއެކީ، ރިސޯޓުތަކާއި 25 މިލިއަން ޑޮލަރަށް ވުރެ ބޮޑު އާމްދަނީއެއް ލިބޭ ވިޔަފާރިތަކުން މާރުކުރަން ޖެހޭ މިންވަރު ވަނީ އާމްދަނީގެ 40 ޕަސެންޓަށް އުފުލާފަ އެވެ.
ސަރުކާރުން ބުނަނީ އެއާ އެކީ، ބޭންކިން ނިޒާމަށް ވަންނަ ޑޮލަރު އިތުރުކުރުމުގެ ގޮތުން ރިސޯޓުތަކާއި ޑޮލަރު ތާށިކަމާއި ބޮޑު އަގުގައި ޑޮލަރު ގަންނަން ޖެހޭ މައްސަލަ ވެސް ހައްލުކުރެވޭނެ ކަމަށެވެ.
ނަމަވެސް ބޭރު ފައިސާއާ ބެހޭ ގާނޫނަށް ބަދަލުގެނެސް، ރަސްމީ ރޭޓު ނޫން ރޭޓެއްގެ ހަބަރު ލިޔުމާއި އެ ނޫން ރޭޓެއްގައި ޑޮލަރު ވިއްކުން މަނާކުރި ނަމަވެސް، ބޮޑު އަގުގައި ޑޮލަރު ގަނެވިއްކުން ނުހުއްޓުވޭ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
