މޯލްޑިވްސް އިސްލާމިކް ބޭންކް (އެމްއައިބީ) އިން ދޭ ގޭސްޓްހައުސް އެވޯޑުތަކަކީ ރާއްޖޭގެ ތާރީހުގައި ވެސް ބްލޮކްޗެއިން ޓެކްނޮލޮޖީ ބޭނުންކޮށްގެން ދޭ ފުރަތަމަ އެވޯޑުތައް ކަމަށް އެ ބޭންކުގެ ޑެޕިއުޓީ ސީއީއޯ އަހްމަދު ރިޒާ ވިދާޅުވެއްޖެ އެވެ.
ބްލޮކް ޗެއިންއަކީ އެކިއެކި ކޮމްޕިއުޓަރުތަކުގައި އެއްކަމަކާ ގުޅޭ ހުރިހާ މުއާމަލާތަކާ ގުޅޭ ރެކޯޑުތައް ރައްކާކުރެވޭ ޑިޖިޓަލް ލެޖާއެކެވެ. މިއީ އެންމެންނަށް ފެންނަ ގޮތަށް އެކަމަކުވެސް، އެއްވެސް މީހަކަށް ބަދަލު ނުގެނެވޭ ގޮތަށް އެންކްރިޕްޓް ކޮށްފައި ހުންނަ ލެޖާއެކެވެ.
އެމްއައިބީ ގެސްޓްހައުސް އެވޯޑްސްގައި ރިޒާ ވިދާޅުވީ މި އެވޯޑުތަކާއެކު ދެވޭ ފިޒިކަލް އެވޯޑުގެ އިތުރުން، ބްލޮކްޗެއިން މެދުވެރިކޮށް ދެވޭ ޑިޖިޓަލް ސެޓިފިކެޓުގެ ސަބަބުން ދުނިޔޭގެ ކޮންމެ ތަނެއްގައި ހުރެގެން ވެސް އެ އެވޯޑުގެ ސައްހަކަން ވަގުތުން ކަށަވަރުކުރެވޭނެ ކަމަށެވެ.
މިއީ ރާއްޖޭގެ ގޭސްޓްހައުސް ސިނާއަތަށާއި މުޅި ގައުމަށް ލިބުނު ކުރިއެރުމެއްގެ ގޮތުގައި އޭނާ ފާހަގަކުރެއްވި އެވެ. އޭނާ ވިދާޅުވީ މި ނިޒާމުގެ ސަބަބުން ފަތުރުވެރިންނަށާއި، ޓްރެވަލް އެޖެންޓުންނަށް އަދި ވިޔަފާރީގެ ބައިވެރިންނަށް އެވޯޑު ލިބޭ ފަރާތްތަކުގެ ފެންވަރު ކަށަވަރުކުރުމަށް ފަސޭހަވެގެންދާނެ ކަމަށެވެ.
އެމްއައިބީ ގޭސްޓްހައުސް އެވޯޑަކީ ރާއްޖޭގައި މި ސިނާއަތަށް ހާއްސަކޮށްގެން ދެވޭ މިފަދަ ފުރަތަމަ އެވޯޑެވެ. މި އެވޯޑުގެ އިތުބާރު ހިފެހެއްޓުމަށްޓަކައި، މުޅި މަރުހަލާ ކުރިއަށް ގެންގޮސްފައިވަނީ މިނިވަން އޮޑިޓް ފާމެއްގެ ބެލުމުގެ ދަށުންނެވެ.
ރިޒާ ވިދާޅުވީ އެވޯޑެއް ލިބުމަކީ ހަމައެކަނި ޝަރަފެއް ނޫން ކަމަށާއި އެއީ އެ ހިފެހެއްޓި ފެންވަރު ދަމަހައްޓައި، އިތުރަށް ކުރިއެރުވުމަށް ލިބޭ ބޮޑު ޒިންމާއެއް ކަމަށެވެ. ކޮންމެ ގޭސްޓްހައުސްއަކީ ރާއްޖެ ތަމްސީލުކުރާ ސަފީރެއްގެ ގޮތުގައި އޭނާ ސިފަކުރެއްވި އެވެ.
އެމްއައިބީން އަބަދުވެސް މަސައްކަތް ކުރާނީ ހަމައެކަނި ބޭންކެއްގެ ގޮތުގައި ނޫން ކަމަށާއި، ވިޔަފާރިތަކުގެ ބައިވެރިއެއްގެ ގޮތުގައި ކަމަށް ރިޒާ ވިދާޅުވި އެވެ. ވިޔަފާރިތައް ކުރިއަރައިގެން ދިއުމަކީ މުޖުތަމައު ތަނަވަސްވެ، ގައުމު ވަރުގަދަވެގެންދާނެ ކަމެއްކަން އޭނާ ފާހަގަކުރެއްވި އެވެ.
އެމްއައިބީ ގެސްޓްހައުސް އެވޯޑްސް 2026" ގެ އެންމެ ޝަރަފުވެރި އެއް އިނާމު ކަމަށްވާ "ގެސްޓްހައުސް ޓޫރިޒަމް ޗެމްޕިއަން އައިލެންޑް" އެވޯޑް ލިބުނީ ފުވައްމުލައް ސިޓީއަށެވެ.
މީގެއިތުރުން ގެސްޓް ހައުސް އެވޯޑުގައި ހޮވި ތިން އެވޯޑެއް ކަމަދޫ އިން ގެސްޓްހައުސްއަށް ލިބުނުއިރު، އޯޝަން ގްރޭންޑް ގެސްޓްހައުސް އާއި ބްލިސް ދިގުރަށް ގެސްޓްހައުސް އާއި ކޮނޑޭ ގާޑަން ވިލާ އަދި ސްވާން ބައި ހޯކްސްއަށްވެސް އެވޯޑެއް ލިބުނެވެ. ގެސްޓްހައުސް އެވޯޑު ހަފުލާގައި ހޮވި އައުޓްސްޓޭޑިން ޑައިވް މާސްޓާ އެވޯޑު ލިބުނީ މުހައްމަދު ޝަމޫން އަމީނަށެވެ.
