މޯލްޑިވްސް އިސްލާމިކް ބޭންކް (އެމްއައިބީ) އިން އިންތިޒާމުކޮށްގެން ބާއްވާ އެމްއައިބީ ގެސްޓްހައުސް ސިމްޕޯސިއަމް 2026 ގެ ތިންވަނަ އެޑިޝަނާއި، އަލަށް ތައާރަފްކުރާ ފުރަތަމަ އެމްއައިބީ ގެސްޓްހައުސް އެވޯޑްސް ބޭއްވުމަށް މިހާރު ބާކީ އޮތީ އެންމެ ދެ ދުވަހެވެ.
މި ބޮޑު އިވެންޓް ބޭއްވުމަށް އެންމެ ފަހުގެ ތައްޔާރީތައް ވަމުން އަންނައިރު، މި ސިމްޕޯސިއަމް އޮންނާނީ މި މަހުގެ 15 ވާ ބުރާސްފަތި ދުވަހު މާލޭގެ ބާސެލޯ ނާސަންދުރާގަ އެވެ.
މި އަހަރުގެ ސިމްޕޯސިއަމް ކުރިއަށްދާނީ ބިޔޯންޑް ދަ ސްޓޭ: ބިލްޑިން ދަ ގެސްޓްހައުސް އޮފް ޓުމޯރޯގެ ތީމުގެ ދަށުންނެވެ.
މިއީ ރާއްޖޭގެ ގެސްޓްހައުސް ވެރިންނާއި، އޮޕަރޭޓަރުންނާއި، ޓޫރިޒަމް ދާއިރާގެ އިސް ފަރާތްތަކުގެ އިތުރުން މުހިންމު ބައިވެރިން އެއްތަންވެ، ހިޔާލު ބަދަލުކުރުމަށް ލިބޭ ރަނގަޅު ފުރުސަތެކެވެ. މި އިވެންޓުގެ ތެރެއިން ރާއްޖޭގެ ގެސްޓްހައުސް ދާއިރާގެ މުސްތަގުބަލާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް، އާ ފުރުސަތުތައް ހޯދުމަށް މަސައްކަތް ކުރާނެ އެވެ.
އަހަރަކު އެއްފަހަރު ބާއްވާ މި ސިމްޕޯސިއަމްއަކީ ދާއިރާއަށް ކުރިމަތިވެފައިވާ ގޮންޖެހުންތަކާ މެދު ވާހަކަދެއްކުމަށާއި، އަމަލީ ތަޖުރިބާތައް ހިއްސާކުރުމަށް ލިބޭ މުހިންމު މަންސައެކެވެ. މީގެ އިތުރުން، ރަށްރަށުގެ ގެސްޓްހައުސް ފަތުރުވެރިކަމުގެ ވާދަވެރިކަން އިތުރުކޮށް، ދެމެހެއްޓެނިވި ގޮތެއްގައި މި ވިޔަފާރި ކުރިއަށް ގެންދެވޭނެ ގޮތްތަކާ ބެހޭ ގޮތުން ވެސް މި ބައްދަލުވުމުގައި މަޝްވަރާ ކުރެވޭނެ އެވެ.
މި އަހަރުގެ ސިމްޕޯސިއަމްގައި ކީނޯޓް އެޑްރެސް ދެއްވާނީ ބައިނަލްއަގުވާމީ ގޮތުން ފާހަގަކޮށްލެވޭ ސްޕީކަރެއް ކަމަށްވާ ކިރުބާ ޝަންކަރެވެ. އޭނާއަކީ އޮންލައިން ބިޒްނަސް ސްޓްރެޓެޖިސްޓެއްގެ އިތުރުން މަޝްހޫރު މުސަންނިފެކެވެ.
ދުނިޔޭގެ 24 ގައުމެއްގައި 700 އަށްވުރެ ގިނަ ތަގުރީރު ދެއްވާފައިވާ ކިރުބާއަކީ އާޓިފިޝަލް އިންޓެލިޖެންސް (އޭއައި) އާއި ޑިޖިޓަލް ޓްރާންސްފޯމޭޝަންގެ ދާއިރާއިން ބޮޑެތި ތަޖުރިބާތަކެއް ހޯދާފައިވާ މީހެކެވެ. އޭނާގެ ވާހަކައިގައި، ޑިޖިޓަލް ވަސީލަތްތައް ބޭނުންކޮށްގެން ގެސްޓްހައުސް ވިޔަފާރި ފުޅާކުރާނެ ގޮތްތަކަށް އަލިއަޅުވާލާނެ އެވެ.
މި އިވެންޓުގެ އެންމެ ހާއްސަ އެއް ބަޔަކީ މުޅިން އަލަށް ތައާރަފްކުރާ އެމްއައިބީ ގެސްޓްހައުސް އެވޯޑްސް އެވެ. މިއީ ގެސްޓްހައުސް ދާއިރާގައި ފާހަގަކޮށްލެވޭ ހިދުމަތްތައް ކުރާ ފަރާތްތަކުގެ އަގުވަޒަންކުރުމަށް އެމްއައިބީން ފެށި މަސައްކަތެކެވެ. މި އެވޯޑުތައް ދިނުމަށް ހަމަޖެހިފައި ވަނީ ގެސްޓްހައުސްތަކަށާއި، ވަކިވަކި ފަރުދުންގެ އިތުރުން ރަށްރަށަށެވެ. މީގެ ތެރޭގައި މެހެމާންދާރީގެ ހިދުމަތާއި، އީޖާދީ މަސައްކަތްތަކާއި، ދެމެހެއްޓެނިވި ގޮތެއްގައި ކުރާ މަސައްކަތްތައް ހިމެނެ އެވެ.
އެވޯޑްސްގެ އިންސާފުވެރިކަން ކަށަވަރުކުރުމަށްޓަކައި، އެވޯޑްތައް އިވެލުއޭޓްކުރުމުގެ މިނިވަން ޕާޓްނަރެއްގެ ގޮތުގައި ހަމަޖައްސާފައިވަނީ ކްރޯ މޯލްޑިވްސް އެވެ.
އެމްއައިބީން ބުނާ ގޮތުގައި މި ސިމްޕޯސިއަމް އާއި އެވޯޑްސް އެކުއެކީގައި ބޭއްވުމުގެ ބޭނުމަކީ، މައުލޫމާތު ހިއްސާކުރުމުގެ މާހައުލެއް އުފެއްދުމާއެކު، ރާއްޖޭގެ ގެސްޓްހައުސް ފަތުރުވެރިކަން ކުރިއެރުވުމަށް މަސައްކަތްކުރާ ފަރާތްތަކަށް ހިތްވަރު ދިނުމެވެ.
