މޯލްޑިވްސް އިސްލާމިކް ބޭންކް (އެމްއައިބީ) އިން އިންތިޒާމުކޮށްގެން ބާއްވާ "އެމްއައިބީ ގެސްޓްހައުސް އެވޯޑްސް 2026" އަށް ކުރިމަތިލުމުގެ ސުންގަޑި، ގިނަ ފަރާތްތަކެއްގެ އެދުމުގެ މަތިން އިތުރުކޮށްފި އެވެ.
ގެސްޓްހައުސް އެވޯޑަށް ކުރިމަތިލުމުގެ ފުރުސަތު އޮތީ އޮގަސްޓު 31 ވަނަ ދުވަހުގެ ނިޔަލަށް ހުޅުވާލާފަ އެވެ. ނަމަވެސް މިހާރު އިތުރުކޮށްފައިވަނީ ސެޕްޓެމްބަރު މަހުގެ 14 ވަނަ ދުވަހުގެ 23:59 ގެ ނިޔަލަށެވެ.
މި އެވޯޑުގައި ޖުމްލަ 3 ކެޓަގަރީއަކުން 20 އެވޯޑު ދިނުމަށް ވަނީ ހަމަޖެހިފަ އެވެ. އޭގެ ތެރޭގައި ދެ ޓިއާއަކަށް ބަހާލައިގެން ގެސްޓްހައުސްތަކަށް ދެވޭ 16 އެވޯޑާއި، ފަތުރުވެރިކަމުގެ ދާއިރާގެ ބޭފުޅުންނަށް ދެވޭ އިންޑިވިޖުއަލް 3 އެވޯޑުގެ އިތުރުން "ގެސްޓްހައުސް ޓޫރިޒަމް ޗެމްޕިއަން އައިލެންޑް" ގެ ގޮތުގައި އެންމެ ފާހަގަކޮށްލެވޭ ރަށަށް ދެވޭ އެވޯޑެއް ހިމެނެ އެވެ.
މިއީ ރާއްޖޭގެ ލޯކަލް ޓޫރިޒަމް ކުރިއެރުވުމަށާއި، މި ދާއިރާގައި ފާހަގަކޮށްލެވޭ ރަށު ފެންވަރުގެ ޚިދުމަތްތެރިންނާއި، ގެސްޓްހައުސްތަކުގެ އިތުރުން ރަށްތަކުގެ އަގުވަޒަންކުރުމުގެ ގޮތުން ދޭ ޚާއްޞަ އެވޯޑެކެވެ.
މި އެވޯޑްސްގެ މުޅި އިވެލުއޭޝަން މަރުހަލާ އިންސާފުވެރިކަމާއެކު ކުރިއަށް ގެންދިއުމަށް ޓަކައި މުސްތަގިއްލު ތާޑް-ޕާޓީއެއްގެ ގޮތުގައި ކްރޯ މޯލްޑިވްސް އެޑްވައިޒަރީ އިން ހަރަކާތްތެރިވާނެ އެވެ.
އެމްއައިބީން ބުނެފައިވާ ގޮތުގައި އެ ބޭންކުގެ މަގުސަދަކީ މި އެވޯޑު މެދުވެރިކޮށް ރާއްޖޭގެ ލޯކަލް ޓޫރިޒަމްގެ ފެންވަރު މަތިކޮށް، އީޖާދީ އަދި ދެމެހެއްޓެނިވި ހިދުމަތްތަކަށް ހިތްވަރުދީ، ދިވެހިވަންތަ މެހެމާންދާރީގެ އަގުވަޒަންކުރުމެވެ.
