މޯލްޑިވްސް އިސްލާމިކް ބޭންކް (އެމްއައިބީ) އިން އިންތިޒާމުކުރާ "އެމްއައިބީ ގެސްޓްހައުސް އެވޯޑްސް 2026" ގެ ހާއްސަ ކެޓަގަރީއެއްގެ ގޮތުގައި "ގެސްޓްހައުސް ޓޫރިޒަމް ޗެމްޕިއަން އައިލެންޑް އެވޯޑް" ތައާރަފުކޮށްފި އެވެ.
މި އެވޯޑަކީ ވަކިވަކި ގެސްޓްހައުސްތަކުގެ އިތުރުން، ރަށު ފެންވަރުގައި ޓޫރިޒަމް ފުޅާކޮށް ދެމެހެއްޓެނިވި ގޮތެއްގައި ކުރިއެރުވުމަށް އިސްނަގައިގެން މަސައްކަތްކުރާ ރަށްރަށުގެ އަގުވަޒަންކުރުމުގެ ގޮތުން ދެވޭ ހާއްސަ އެވޯޑެކެވެ. މި އެވޯޑަށް ކުރިމަތިލުމުގެ ފުރުސަތު މިހާރު ދަނީ ކުރިއަށެވެ.
ޓޫރިޒަމް ޗެމްޕިއަނުގެ އެވޯޑު ދޭ ރަށްރަށް އިންސާފު ކުރުމުގައި، ރަށު ކައުންސިލުތަކާއި އާންމު ރައްޔިތުންނާއި ވިޔަފާރިތައް ގުޅިގެން ކުރާ މަސައްކަތްތަކަށާއި، ރަށް އިޝްތިހާރުކުރުމުގެ އިތުރުން އިންފްރާސްޓްރަކްޗާ ތަރައްގީކުރުމާއި، ރަށުގެ ގުދުރަތީ ރީތިކަން ދެމެހެއްޓުމާއި، އަދި ޓޫރިސްޓުންނަށް ރައްކާތެރި އުފާވެރި މާހައުލެއް ގާއިމުކޮށްދިނުމަށް ކުރެވޭ މަސައްކަތްތަކަށް ބެލޭނެ އެވެ.
އެމްައިބީން ބުނީ "ގެސްޓްހައުސް ޓޫރިޒަމް ޗެމްޕިއަން އައިލެންޑް އެވޯޑް" އަށް ކުރިމަތިލާ ރަށްރަށުގައި އެޕްލިކޭޝަން ހުށަހަޅާ ވަގުތު މަދުވެގެން އޮޕަރޭޝަނަލް 50 ގެސްޓްހައުސް ކޮޓަރި ހުންނަން ޖެހޭނެ ކަމަށެވެ.
އެމްއައިބީ ގެސްޓްހައުސް އެވޯޑްސްގެ ދަށުން ޖުމްލަ ތިން ދާއިރާއަކުން 12 އެވޯޑެއް ދިނުމަށް ހަމަޖެހިފައިވެ އެވެ. އެއީ:
- ގެސްޓްހައުސްތަކަށް ހާއްސަ އަށް އެވޯޑު
- ޓޫރިޒަމް ދާއިރާގައި މަސައްކަތްކުރާ ފަރުދުންނަށް ދެވޭ ތިން އެވޯޑު
- އެންމެ ފާހަގަކޮށްލެވޭ ރަށަށް ދެވޭ އައިލެންޑް އެވޯޑު
މި އެވޯޑްސްގެ މުޅި އިވެލުއޭޝަން މަރުހަލާ އިންސާފުވެރިކަމާއެކު ކުރިއަށް ގެންދިއުމަށް ޓަކައި މުސްތަގިއްލު ތާޑް-ޕާޓީއެއްގެ ގޮތުގައި ކްރޯ މޯލްޑިވްސް އެޑްވައިޒަރީ އިން ހަރަކާތްތެރިވާނެ އެވެ.
އެމްއައިބީން ބުނެފައިވާ ގޮތުގައި އެ ބޭންކުގެ މަގުސަދަކީ މި އެވޯޑު މެދުވެރިކޮށް ރާއްޖޭގެ ލޯކަލް ޓޫރިޒަމްގެ ފެންވަރު މަތިކޮށް، އީޖާދީ އަދި ދެމެހެއްޓެނިވި ހިދުމަތްތަކަށް ހިތްވަރުދީ، ދިވެހިވަންތަ މެހެމާންދާރީގެ އަގުވަޒަންކުރުމެވެ.
ގެސްޓްހައުސް އެވޯޑަށް ކުރިމަތިލުމުގެ ފުރުސަތު ވަނީ މި މަހުގެ 31 ވަނަ ދުވަހުގެ ނިޔަލަށް ހުޅުވާލާފަ އެވެ. މި އެވޯޑަށް އެދި mib.com.mv/guesthouseaward މެދުވެރިކޮށް ހުށަހެޅޭނެ އެވެ.
