އަންހެނުންގެ ކެރިއަރު ކުރިއެރުވުމަށާއި ލީޑާޝިޕްގެ ފުރުސަތުތައް ފަހިކޮށްދިނުމަށް މޯލްޑިވްސް އިސްލާމިކް ބޭންކް (އެމްއައިބީ) އިން ކުރަމުންދާ މަސައްކަތްތަކުގެ އަގުވަޒަންކޮށް، ކެމްބްރިޖް އައިއެފްއޭ އިން ދޭ "ވުމަނައި ލީޑާޝިޕް އެވޯޑް ފޯ ކެރިއާ އެޑްވާންސްމަންޓް 2026" އެވޯޑު އެ ބޭންކަށް ލިބިއްޖެ އެވެ.
މި އެވޯޑަކީ އަންހެނުންގެ ޕްރޮފެޝަނަލް ކުރިއެރުމަށް މަގުފަހިކޮށްދީ، މުއައްސަސާގެ އެކި ދާއިރާތަކުން އިސް ސަފުގައި ހަރަކާތްތެރިވެ ކާމިޔާބީ ހޯދޭނެ ފަހި މާހައުލެއް ގާއިމުކޮށްދިނުމުގައި އެމްއައިބީން ދައްކަމުންދާ ނަމޫނާ ބަލައިގަނެ އެމްއައިބީއަށް ދީފައިވާ އެވޯޑެކެވެ.
މި ކާމިޔާބީގެ އިތުރުން، އިސްލާމީ މާލީ ދާއިރާގައި ފާހަގަކޮށްލެވޭ އަންހެން ލީޑަރުން ހިމަނައިގެން ނެރޭ "ވުމަނައި ރިޕޯޓް 2026" ގައި އެމްއައިބީގެ ފަސް އަންހެން ލީޑަރަކު ވަނީ ހިމެނިފަ އެވެ.
އެމްއައިބީން ބުނީ ވުމަނައި ރިޕޯޓުގައި ހިމެނިފައިވަނީ މާލީ ހިދުމަތްތަކުގެ ދާއިރާއަށް ކޮށްދެއްވާފައިވާ އަގުހުރި ހިދުމަތްތަކާއި، ދައްކަވާފައިވާ އިސްނެގުމާއި ހޯއްދަވާފައިވާ ކާމިޔާބީތަކުގެ ސަބަބުން ކަމަށެވެ.
މި ޝަރަފުވެރި ކާމިޔާބީއަކީ ބޭންކުގެ ކުރިއެރުމުގައި މުހިންމު ދައުރެއް އަދާކުރަމުންދާ ހުނަރުވެރި އަންހެން މުވައްޒަފުންގެ ބުރަ މަސައްކަތުގެ ނަތީޖާ ކަމަށް އެމްއައިބީން ބުންޏެވެ.
ހުނަރުވެރިން ބިނާކޮށް، ވަކި ޖިންސަކަށް ތަފާތުކުރުމެއް ނެތި ލީޑަޝިޕްގެ ފުރުސަތުތައް ފަހިކޮށްދީ، އަންހެނުން ބާރުވެރިކުރުވުމުގައި އަބަދުވެސް ދެމިއޮންނާނެކަމުގެ ޔަގީންކަން އެމްއައިބީން ވަނީ ދީފަ އެވެ.
