މޯލްޑިވްސް އިސްލާމިކް ބޭންކް (އެމްއައިބީ) އިން ބ. އޭދަފުށީގައި ބްރާންޗެއް ހުޅުވައި، އެ އަތޮޅު ކެންދޫ، ތުޅާދޫ އަދި ގޮއިދޫގައި އޭޓީއެމްގެ ހިދުމަތް ތައާރަފްކޮށް، އެ ބޭންކުން ދެމުން އަންނަ ހިދުމަތްތައް އިތުރަށް ފުޅާކޮށްފި އެވެ.
އެ ހަތަރު ރަށުގައި ބޭއްވި ރަސްމިއްޔާތުގައި އެމްއައިބީގެ ބްރާންޗް އަދި އޭޓީއެމްތައް ހުޅުވައިދެއްވީ ފިނޭންސް މިނިސްޓަރު ހަސަން ޒަރީރު އެވެ. އެ ރަސްމިއްޔާތުގައި އެމްއައިބީގެ ޑެޕިއުޓީ ސީއީއޯ އަހްމަދު ރިޒާ އާއި ބޭންކުގެ އިސްވެރިން ބައިވެރިވެވަޑައިގެންނެވި އެވެ.
އެމްއައިބީން ބުނީ އޭދަފުށީގައި ބްރާންޗެއް ހުޅުވިގެންދިޔުމަކީ މުޅި ރާއްޖެއަށް އެ ބޭންކުގެ ހިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިން ހާސިލުކުރެވުނު މުހިންމު ކުރިއެރުމެއް ކަމަށެވެ.
އޭދަފުށީގައި އެމްއައިބީން ހުޅުވި ބްރާންޗަކީ އެ ރަށުގައި ހިންގަމުން އައި އެމްއައިބީގެ ސޭލްސް ސެންޓަރު އަޕްގްރޭޑްކޮށް، އަމިއްލަ ފަރުދުންނާއި ވިޔަފާރިތަކަށް ބޭނުންވާ ފުރިހަމަ ބޭންކިން ހިދުމަތްތަކާއި، އެކައުންޓް ހުޅުވުމާއި، ފައިނޭންސިން ހައްލުތަކުގެ އިތުރުން އެހެނިހެން އަސާސީ ބޭންކިން ހިދުމަތްތައް އެއް ފުރާޅެއްގެ ދަށުން ލިބޭނެހެން ތަރައްގީކޮށްފައިވާ ބްރާންޗެކެވެ.
އެމްއައިބީން ބ. އަތޮޅުގެ ރަށްތަކުގައި އަލަށް ގާއިމުކުރި އޭޓީއެމްތަކުން 24 ގަޑިއިރު ދިވެހި ރުފިޔާ ޖަމާކުރުމާއި ނެގުމުގެ ހިދުމަތް ލިބޭނެ އެވެ. އޭގެއިތުރުން އޭދަފުށި ބްރާންޗުން ދިވެހި ރުފިޔާ އާއި އެމެރިކާ ޑޮލަރު ނަގައި ޖަމާކުރުމުގެ ހިދުމަތް ލިބެ އެވެ.
ބ. އަތޮޅުގައި އޭޓީއެމް ނެޓްވޯކް ފުޅާކުރުމުގެ މައިގަނޑު މަގުސަދަކީ ރާއްޖޭގެ އެކި ކަންކޮޅުތަކުގައި ބޭންކުގެ ހިދުމަތްތައް ވަރުގަދަކޮށް، ކަސްޓަމަރުންނަށް ފަސޭހަކަމާއެކު އަސާސީ ބޭންކިން ހިދުމަތްތައް ފޯރުކޮށްދިނުން ކަމަށް އެ ބޭންކުން ބުންޏެވެ.
މި ބްރާންޗާއެކު އޭދަފުށްޓާއި އަދި އެހިސާބުގަނޑުގެ އެހެން ރަށްރަށުގެ ރައްޔިތުންނަށް މާލީ ހިދުމަތްތައް ހޯދުމުގައި ބޮޑެތި ލުއިފަސޭހަތަކެއް ލިބިގެންދާނެ ކަމަށް އެމްއައިބީން ބުންޏެވެ.
