ދުނިޔޭގެ މަޝްހޫރު ފޯބްސް މެގަޒިންއިން ފުރަތަމަ ފަހަރަށް ހޮވި ދުނިޔޭގެ އެންމެ ރަނގަޅަށް މަސައްކަތްކުރާ ބޭންކުތަކުގެ ލިސްޓުން ބޭންކް އޮފް މޯލްޑިވްސް (ބީއެމްއެލް) ޖާގަ ހޯދައިފި އެވެ.
މާކެޓް ރިސާޗް ފާމެއް ކަމަށްވާ ސްޓެޓިސްޓާއާ ގުޅިގެން ފޯބްސްއިން އެކުލަވާލި މި ލިސްޓަކީ ބޭންކުތަކުގެ މާލީ ހިސާބުތަކާއި ކުރިއެރުމަށް ބަލައި ތައްޔާރުކޮށްފައިވާ ލިސްޓެކެވެ.
މި ރޭންކިންގައި ބޭންކް އޮފް މޯލްޑިވްސް ހިމެނިފައިވަނީ ތިނެއް ބިލިއަން ޑޮލަރާއި ދިހަ ބިލިއަން ޑޮލަރާ ދެމެދުގެ އެސެޓް ހުރި ބޭންކުތައް ހިމެނޭ ޓިއާ ހައެއް ގައި އެވެ. އެއީ ކުދި ބޭންކުތަކުގެ ގިންތި އެވެ.
މި ކެޓަގަރީން ބީއެމްއެލް ވަނީ 39 ވަނަ ރޭންކު ހޯދާފަ އެވެ. މި ލިސްޓުގައި 89 ގައުމަކުން ޖުމްލަ 500 ބޭންކު ވަނީ ހިމެނިފައެވެ.
ފޯބްސްއިން މި ލިސްޓު އެކުލަވާލުމުގައި ބަލާފައިވަނީ ކަސްޓަމަރުންގެ ހިޔާލުގެ ބަދަލުގައި ބޭންކުތަކުން އާންމުކޮށްފައިވާ މާލީ ހިސާބުތަކަށެވެ. މީގެ ތެރޭގައި އެސް އެންޑް ޕީ ކެޕިޓަލް އައިކިއު ފަދަ ޕްލެޓްފޯމްތަކުން ލިބުނު މައުލޫމާތާއި ބޭންކުތަކުން ހުށަހެޅި އެންމެ ފަހުގެ އޮޑިޓް ކުރެވިފައިވާ މާލީ ބަޔާންތައް ހިމެނެ އެވެ.
މި ލިސްޓަށް ބޭންކުތައް ހޮވުމުގައި މައިގަނޑު ހަތަރު ދާއިރާއަކަށް ވަނީ މާކްސް ދީފަ އެވެ. އެއީ ފައިދާ ނުވަތަ ޕްރޮފިޓަބިލިޓީއަށް 30 ޕަސެންޓު، ކުރިއެރުމާއި އާމްދަނީގެ ފެންވަރަށް 20 ޕަސެންޓު، ކެޕިޓަލް އަދި ފަންޑިން ރެސިލިއަންސަށް 25 ޕަސެންޓު އަދި އެސެޓް ކޮލިޓީ އާއި އެފިޝަންސީއަށް 25 ޕަސެންޓެވެ.
ފޯބްސްއިން ބޭންކުތައް އިވެލުއޭޓް ކުރުމުގައި ބޭނުންކުރި މިންގަނޑުތަކުގެ ތެރޭގައި ރިޓާން އޮން އެވްރެޖް އެސެޓްސް، ކޮސްޓް ޓު އިންކަމް ރޭޝިއޯ އަދި ނެޓް އިންޓްރެސްޓް މާޖިން ހިމެނެ އެވެ. މީގެ އިތުރުން ތިން އަހަރުގެ މުއްދަތެއްގައި ކަސްޓަމަރުންގެ ޑިޕޮސިޓް އިތުރުވި މިންވަރާއި، އިކުއިޓީ ރޭޝިއޯ އަދި ލޯން ޓު ޑިޕޮސިޓް ރޭޝިއޯއަށް ވެސް ވަނީ ބަލާފަ އެވެ.
މި ލިސްޓުގައި ހިމެނުމަށްޓަކައި ބޭންކެއްގެ އެސެޓްގައި މަދުވެގެން ތިން ބިލިއަން ޑޮލަރު ހުންނަން ޖެހެ އެވެ.
ބައިނަލްއަގުވާމީ ލިސްޓަކުން ބީއެމްއެލް ޖާގަ ހޯދިއިރު، މި އަހަރުގެ ފުރަތަމަ ނުވަ މަސް ދުވަހުގެ ތެރޭގައި އެ ބޭންކުން ވަނީ 1.9 ބިލިއަން ރުފިޔާގެ ސާފު ފައިދާއެއް ހޯދާފަ އެވެ. އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފް ވިދާޅުވެފައިވަނީ މި އަހަރަކީ ބޭންކުގެ ތާރީހުގައި ވެސް އެންމެ ކާމިޔާބު އަހަރަށް ވާނެ ކަމަށެވެ.
