ޑޮލަރު ތާށިކަން އިންތިހާއަށް ބޮޑުވެ އާންމުނަށް ޑޮލަރު ލިބުމުގައި އެތައް ދަތިތަކެއް ކުރިމަތިވެފައިވާ މި ދަނޑިވަޅުގައި ރާއްޖޭގައި ހަރަކާތްތެރިވާ ބައިނަލްއަގުވާމީ އޮޑިޓް ފާމްތަކުން ބޭންކް އޮފް މޯލްޑިވްސް (ބީއެމްްއެލް) ގެ ސައްހަ ހިސާބުތައް ހާމަކުރުމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ގޮވާލައްވައިފި އެވެ.
މިއަދު އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވި ގޮތުގައި ދައުލަތުގެ ރިޒާވުގައި މިހާރު ބޭރު ފައިސާއެއް ނެތެވެ. އެފަދަ ހާލަތެއްގައި ރިޒާވު ހުރިއިރު މިވަގުތަށް ވެސް ރާއްޖެއަށް 50 މިލިއަން ޑޮލަރު ބޭނުންވާ ކަމަށް ނަޝީދު ވިދާޅުވި އެވެ.
"ސަރުކާރުން ވަނީ ދަރަނި ދެއްކުމަށްޓަކައި ކަސްޓަމަރުންގެ ޑިޕޮސިޓް ފައިސާ ބޭނުންކުރުމަށް ބީއެމްއެލްއަށް މަޖުބޫރުކުރުވާފައި. އަދި އޭގެ ނަތީޖާއެއްގެ ގޮތުން، ފައިސާ ދޫކުރުމަށް ބޭންކު ވަނީ ނުކުޅެދިފައި،" ނަޝީދު ވިދާޅުވި އެވެ.
އަންނަ ހަފްތާގެ ތެރޭގައި ކަސްޓަމަރުންގެ ކަންކަން ހަމައަކަށް އެޅުވޭނެ ކަމަށް ބީއެމްއެލްއިން އުންމީދު ކުރަނީ ރިސޯޓުތަކަށް ލިބޭ ބޭރު ފައިސާގެ 40 ޕަސެންޓު މާރުކުރަން ފެށުމާއެކު އެމްއެމްއޭއަށް 160 މިލިއަން ޑޮލަރު ވަންނާނެ ކަމަށް ދެކިގެން ކަމަށް ނަޝީދު ވިދާޅުވި އެވެ.
"މިއީ އިގުތިސޯދީ ނުވަތަ މާލީ އިސްތިރާޖެއް ނޫން، މިއީ ހަމައެކަނި ކުރެވޭ އުންމީދެއް. ބީއެމްއެލް އަކީ އާންމު ބޭންކަކަށްވާތީ، ދިވެހިރާއްޖޭގައި ހަރަކާތްތެރިވާ ބައިނަލްއަގުވާމީ އޮޑިޓް ފާމްތަކުން އެ ބޭންކުގެ ސައްހަ ހިސާބުތައް އާންމުކުރަންޖެހޭ،" ނަޝީދު ގޮވާލެއްވި އެވެ.
ބީއެމްއެލްއިން ބުނީ ޑޮލަރު ލިބޭ މިންވަރާއި ޑޮލަރު ހޭދަވާ މިންވަރު މެނޭޖުކުރަން އެ ބޭންކުން ފިޔަވަޅުތަކެއް އަޅާފައިވާ ކަމަށެވެ. އެ ގޮތުން އީ-ކޮމާސް މުއާމަލާތްތައް ލިމިޓްކޮށް، ޒަރޫރީ އަދި ކޮންމެހެން ބޭނުންތެރި މުއާމަލާތްތަކަށް އިސްކަންދޭން ފަށާފައިވާ ކަމަށް އެ ބޭންކުން ބުންޏެވެ.
ބީއެމްއެލްގެ ޑޮލަރު ތާށިކަމުގެ މައްސަލައަށް އަވަސް ހައްލެއް ލިބޭނެ ކަމުގެ ޔަގީންކަން އެ ބޭންކުން ދިންއިރު، އެތެރޭގެ ބޭންކުތަކަށް ޓްރާންސްފާ ނުކުރެވޭތީ އާއީ ޓީޓީ ފޮނުވާތާ އެތައް ދުވަހެއް ވާއިރުވެސް އެ ފައިސާ ނުފޮނުވޭތީ ވިޔަފާރިވެރިން ތިބީ ވަރަށް ކަންބޮޑުވެފަ އެވެ. ހަމައެހެންމެ، މިހާރު ޑޮލަރު ސަޕޯޓު ހޯދަން ވެސް ވަރަށް ދަތި ކަމަށް އެ ވިޔަފާރިތަކުން އަންނަނީ ބުނަމުންނެވެ.
އޭގެ އިތުރުން، އާންމުންނަށް ވެސް ރުފިިޔާ ކާޑުތައް ބޭނުންކޮށްގެން ޑޮލަރުން މުއާމަލާތް ކުރަން ވަރަށް އުނދަގުލެވެ. ބީއެމްއެލްއިން ކޮންމެ ދުވަހަކު ހަތެއް ޖަހާއިރު ރީސެޓުވާ ގޮތަށް ޑެއިލީ ބަޖެޓެއް ކަނޑައެޅި ފަހުން ވެސް ކާޑުން ފައިސާ ކަނޑަން ވަރަށް އުނދަގޫ ކަމަށް އާންމުން ވެސް އަންނަނީ ޝަކުވާކުރަމުންނެވެ.
