ބޭންކް އޮފް މޯލްޑިވްސް (ބީއެމްއެލް) އިން މާލޭގައި 12 ބުރީގެ އޮފީސް އިމާރާތަކާއި ތިން ބުރީގެ މިކްސް-ޔޫސްޑް ކޮމާޝަލް އިމާރާތެއް ތަރައްގީކުރުމަށް ނިންމައި، އެ މަސައްކަތަށް ޝައުގުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުސަތު ހުޅުވާލައިފި އެވެ.
މި މަޝްރޫއުގެ ދަށުން ތަރައްގީކުރާ 12 ބުރީގެ އޮފީސް އިމާރާތް ބިނާކުރުމަށް ހަމަޖެހިފައިވަނީ 23،000 އަކަފޫޓުގެ ބޮޑު ބިމެއްގަ އެވެ. މި އިމާރާތުގެ ފްލޯ އޭރިއާގެ ގޮތުގައި 135،624 އަކަފޫޓު ހުންނާނެ ކަމަށް ބޭންކުން ބުނެ އެވެ. މީގެ އިތުރުން 6،000 އަކަފޫޓުގެ ބިމެއްގައި ތިން ބުރީގެ ކޮމާޝަލް އިމާރާތެއް ވެސް މި މަޝްރޫއުގެ ދަށުން ތަރައްގީކުރަން ވަނީ ހަމަޖެހިފަ އެވެ.
ބީއެމްއެލްގެ އިއުލާނުގައި މި އިމާރާތްތައް އަޅާނެ ސީދާ ސަރަހައްދެއް ބަޔާންކޮށްފައި ނުވި ނަމަވެސް، މާލޭގައި އެވަރުގެ ބޮޑު ބިމެއް އޮތީ ކުރީގެ ރައީސް ޔާމީންގެ ސަރުކާރުގައި "ކޮރަލް ބޮލެވާޑް" ތަރައްގީކުރަން އުޅުނު ސަރަހައްދުގަ އެވެ.
ބޭންކުން ހުޅުވާލާފައިވަނީ މި މަޝްރޫއުގެ ޑިޒައިން ކުރުމާއި، ފައިނޭންސް ކުރުމާއި، އަދި އިމާރާތް ކުރުމުގެ މަސައްކަތަށެވެ. މި މަސައްކަތަށް ކުރިމަތިލާ ފަރާތްތަކަކީ ވޭތުވެދިޔަ ހަތް އަހަރު ދުވަހުގެ ތެރޭގައި ޖުމްލަ 250 މިލިއަން ރުފިޔާއަށް ވުރެ މަދުނޫން އަދަދެއްގެ އުސް އިމާރާތްތަކުގެ މަޝްރޫއުތައް ނިންމާފައިވާ ތަޖުރިބާކާރު ކުންފުނިތަކަކަށް ވާންޖެހެ އެވެ.
މި މަޝްރޫއުގެ އެންމެ ހާއްސަ އެއް ޝަރުތަކީ ކޮންޓްރެކްޓަރުން އަމިއްލައަށް މަޝްރޫއަށް ފައިސާ ހޯދައިގެން މަސައްކަތް ކުރިއަށް ގެންދިއުމެވެ. ބޭންކުން މަޝްރޫއަށް ފައިސާ ދައްކަން ފަށާނީ އިމާރާތް އެއްކޮށް ނިމުމުންނެވެ. ބީއެމްއެލްއިން ބުނި ގޮތުގައި، ފައިސާ އަނބުރާ ދެއްކުމަށް އެންމެ ދިގު މުއްދަތެއް ހުށަހަޅާ ފަރާތްތަކަށް މި ބިޑުގައި އިސްކަންދެވޭނެ އެވެ.
މި އިމާރާތްތައް ފަރުމާކުރުމުގައި ބައިނަލްއަގުވާމީ މިންގަނޑުތަކަށް ފެތޭ ޒަމާނީ އާކިޓެކްޗަރަލް ޑިޒައިންތަކާއި، ތިމާވެއްޓާ ރައްޓެހި އަދި ހަކަތަ އިސްރާފުނުވާނެ ފަދަ ވަސީލަތްތައް ހިމެނުމަށް ބޭންކުން ވަނީ ޝަރުތުކޮށްފަ އެވެ. މި މަޝްރޫއަށް ޝައުގުވެރިވާ ފަރާތްތަކުން އީއޯއައި ހުށަހެޅުމުގެ އެންމެ ފަހު ސުންގަޑިއަކީ އޮކްޓޯބަރު 6، ވާ އަންގާރަ ދުވަހުގެ މެންދުރު 12:00 އެވެ.
