ބޭންކް އޮފް މޯލްޑިވްސްގައި ހުރި ކަސްޓަމަރުންގެ ޑޮލަރު ޓްރާންސްފާ ކުރުމަށާއި ޓެލެގްރެފިކް ޓްރާންސްފާ ނުވަތަ ޓީޓީ ހިދުމަތަށް ދިމާވެފައިވާ ދަތިތައް އަދިވެސް ހައްލެއް ނުވާ ކަމަށް ވިޔަފާރިވެރިން ބުނެފި އެވެ.
ޑޮލަރު ޓްރާންސްފާ އާއި ޓީޓީގެ ހިދުމަތް ހަފުތާއެއްގެ ތެރޭގައި ހައްލުވާނެ ކަމަށް ބީއެމްއެލް އިން ބުނީ ސެޕްޓެމްބަރު 19، ގަ އެވެ. ނަމަވެސް އޭގެ ފަހުން މިއަދަށް އަށް ދުވަސް ފާއިތުވިއިރު ވެސް އެ ދެ މައްސަލަ ހައްލުނުވާ ކަމަށް ވިޔަފާރިވެރިން ވަނީ ޔަގީންކަންދީފަ އެވެ.
"ޓީޓީ އަދިވެސް ނުހެދޭ. ޑޮލަރު ވެސް ޓްރާންސްފާއެއް ނުކުރެވޭ. މީގެ ސަބަބުން ވިޔަފާރިވެރިންނަށް ބުނަން ވެސް ނޭނގޭހާ ބޮޑެތި ގެއްލުންތަކާ ކުރިމަތިވަމުންދަނީ،" މި ނޫހާ ވާހަކަ ދެއްކި ވިޔަފާރިވެރިއަކު ބުންޏެވެ.
ޑޮލަރުގެ ޓްރާންސްފާގެ މައްސަލަ އާއި ޓީޓީ ހެދުމަށް ދަތިތަކެއް ދިމާވާ ކަމަށް ބީއެމްއެލް އިއުތިރާފުވީ، އެ މައްސަލަތައް ކުރިމަތިވަމުން އަންނަތާ އެތައް މަސްދުވަހެއް ފާއިތުވި ފަހުންނެވެ.
"ބޭންކުން ބޭރުވާ ޑޮލަރުގެ ނިސްބަތް އިތުރުވެފައިވާތީ ވޭތުވެދިޔަ ދެ ހަފުތާގެ ތެރޭގައި ޓެލެގްރެފިކް ޓްރާންސްފާ (ޓީޓީ) އާއި ބޭންކުތަކުގެ މެދުގައި ކުރެވޭ ޓްރާންސްފާތައް ހިމެނޭހެން ޑޮލަރުގެ މުއާމަލާތްތައް ފުރިހަމަ ކުރުމުގައި ލަސްތަކެއް ވަނީ ކުރިމަތިވެފައި،" ބޭންކުން ސެޕްޓެމްބަރު 19، ގައި ބުންޏެވެ.
ޑޮލަރު ތާށިވުމުން ބޭންކުން ވަނީ ޑެޓިބް އަދި ކްރެޑިޓް ކާޑުން ކުރެވޭ މުއާމަލާތްތައް އިތުރަށް ހަނިކޮށްފަ އެވެ. މިހާރު ކޮންމެ ދުވަހަކު ވެސް މުޅި ރާއްޖެއަށް ކުރެވޭނީ އެންމެ 16 މިލިއަން ޑޮލަރުގެ ވިޔަފާރި އެވެ. އެ ފިޔަވަޅުތަކާއެކު ހަފުތާއެއްގެ ތެރޭގައި ޑޮލަރުގެ ހާލަތު ހަމައަކަށް އެޅޭނެ ކަމަށް ބޭންކުން ބުންޏެވެ.
"މި ފިޔަވަޅުތަކުގެ ސަބަބުން ބޭންކުން ބޭރުވާ ޑޮލަރު މިންވަރު، ބޭންކަށް ލިބޭ ޑޮލަރާ އެއް ހަމައެއްގައި ހިފެހެއްޓުމަށް މިހާރު ވަނީ އެހީތެރިވެދީފަ. މިއާއެކު ކުރިއަށް އޮތް ހަފުތާ ނިމެންވާއިރަށް ޑޮލަރުގެ މުއާމަލާތްތައް އާންމު ހާލަތަކަށް ރުޖޫއަވާނެ ކަމަށް ލަފާ ކުރެވޭ،" ބީއެމްއެލް އިން ބުނެފައިވެ އެވެ.
