ލަންޑަން (ސެޕްޓެމްބަރު 21) - އިނގިރޭސި ޕްރިމިއާ ލީގުގައި ރޭ ފުލަމް އާއި މެންޗެސްޓާ ޔުނައިޓެޑް 1-1 އިން އެއްވަރުވިއިރު، އެ މެޗުގައި ކުރިމަތިވެފައި އޮތީ ރެފްރީން ވެސް ޔުނައިޓެޑް ބަލިވިޔަ ނުދޭން ބޭނުންވާނެ ހާލަތެއް ކަމަށް ފުލަމްގެ ކޯޗު، އަލްވާރޯ އާބެލޯއާ ބުނެފި އެވެ.
ފުލަމްގެ ދަނޑު ކްރޭވަން ކޮޓޭޖްގައި ރޭ ކުޅުނު މެޗުގައި ފުލަމް އިން ލީޑުނެގީ ޔުނައިޓެޑްގެ ލިސަންދްރޯ މާޓިނޭޒް އަތުން ބައިކޮޅަށް ވަން ގޯލަކުންނެވެ. އަދި، މެޗުގެ ފުރިހަަމަ ވަގުތު ހަމަވާން ކުޑަ ވަގުތުކޮޅަކަށް ވެފައި ވަނިކޮށް މަޓެއުސް ކޫންޏާ ވަނީ ފުލަމް ކޮޅަށް ގޯލު ޖަހައި އެއްވަރުކޮށްފަ އެވެ.
ކޫންޏާ، މި ލަނޑު ޖެހުމުގެ 35 ސިކުންތު ކުރިން، ޔުނައިޓެޑްގެ ހެރީ މެގުއާ އަށް ފުލަމްގެ ސެސާ ޕަލާސިއޯސް ކުރި ފައުލަކަށް ރެފްރީ ޕީޓާ ބޭންކްސް ވަނީ ޖެހުމެއް ދީފަ އެެވެ. އާބެލޯއާ ހިތްހަމަނުޖެހުން ފާޅުކުރަން ފެށީ އެ ފައުލު ދިން ގޮތާ މެދު އެވެ.
"ހުރިހާ ފައުލެއް ދިނީ އެ މީހުންނަށް ކަހަލަ. ތި މީހުންނަށް ފެންނާނެ އެ މީހުން (ޔުނައިޓެޑުން) ލަނޑު ޖެހުމުގެ ކުރިން މެގުއާ އަށް ދިން ފައުލު. އޭނަ އަކީ 100 ކިލޯ ހުންނާނެ މީހެއް. އެކަމަކު އެ ފައުލު ވެސް އެ މީހުންނަށް ދިނީ. ދެން، އަހަންނަށް އެނގޭ، ސިޓީ މެޗު (މިދިޔަ ހަފްތާގައި ޔުނައިޓެޑް އަތުން ސިޓީ މޮޅުވުމުން) ދިޔަ ގޮތުން އެ މީހުން (ރެފްރީން) މި ދަނޑުުގައި ޔުނައިޓެޑް ބަލިވިޔަ ނުދޭނެކަން. އަހަރެމެންގެ ނަސީބު ވެސް ދެރައީ މި ފަހަރު ވެސް،" ކުރިން ރެއާލް މެޑްރިޑަށް ކޯޗުކޮށްދިން އާބެލޯއާ، ސްކައި ސްޕޯޓްސް އިންޓަވިއުގައި ބުންޏެވެ.
ވީއޭއާރް އަށް އަދިވެސް އިތުބާރު އެބައޮތް: ކެރިކް
މެންޗެސްޓާ ސިޓީއާ ދެކޮޅަށް ކުޅުނު މެޗުގައި ވީއޭއާރުން ނިންމި ނިންމުމަކާ މެދު ސުވާލު އުފެދުނު ނަމަވެސް، އެ ސިސްޓަމަށް އަދިވެސް އިތުބާރު އެބައޮތް ކަމަށް ޔުނައިޓެޑްގެ ކޯޗު މައިކަލް ކެރިކް ބުނެފި. ކެރިކް ފާހަގަކުރި ގޮތުގައި ވީއޭއާރުގެ ނިންމުންތައް ރަނގަޅު ކުރެވޭނީ ގަވާއިދުތައް މާނަކުރުމުގައި ހުރި ތަފާތުތައް ނައްތާލައިގެން
އޭގެ ފަހުން، ނޫސްވެރިންގެ ބައްދަލުވުމުގައި، އާބެލޯއާ ވަނީ، ކުރިން ދިން އިންޓަވިއުގައި އޭނާ އަށް ދެކެވުނު ވާހަކަތައް އެންމެ ރަނގަޅު ނުވުމަކީ އެކަށީގެންވާ ކަމަށެވެ. ކުރިން ޕްރިމިއާ ލީގުގައި ލިވަޕޫލަށް ކުޅުނު އާބެލޯއާ ވަނީ މެގުއާ އަށް ޕަލާސިއޯސް ކުރީ ފައުލެއް ނޫން ކަމަށް އަދިވެސް ގަބޫލުކުރާ ކަމަށް ބުނެފަ އެވެ. އެކަމަކު، ދެން އެ ވާހަކަ ދެއްކުމުގެ މާނައެއް ނެތް ކަމަށާއި މިހާރު ފޯކަސް ހުރީ ކުރިއަށް އޮތް ތިން ހަފްތާ ތެރޭގައި ފުލަމް ޓީމު ރަނގަޅުކުރަން ކުރަން ޖެހޭ ކަންކަން ކުރުމަށް ކަމަށް އާބެލޯއާ ވަނީ ބުނެފަ އެވެ.
މިއީ، އިނގިރޭސި ޕްރިމިއާ ލީގުގެ ތާރީހަށް ބަލާއިރު، އާ ސީޒަނެއް ފަށައިގެން ފުރަތަމަ ފަސް މެޗު ކުޅެގެން މޮޅެއް ނުލިބި ފުލަމް އިން ކުރިއަށްދާން ޖެހޭ ހަތަރު ވަނަ ފަހަރެވެ. އޭގެ ތެރެއިން ދެ ފަހަރު އެ ޓީމު ވަނީ ރެލިގޭޓްވެފަ އެވެ.
