ލަންޑަން (ސެޕްޓެމްބަރު 19) - އިނގިރޭސި ޕްރިމިއާ ލީގުަގައި މިރޭ ބްރައިޓަން ހޯލްވް އެންޑް އަލްބިއަން އިން 3-0 އިން އެންމެ ފަހުގެ ޗެމްޕިއަން، އާސެނަލް ބަލިކުރިއިރު، އެސްޓަން ވިލާ އަތުން 3-2 އިން ބަލިވެ، ޓޮޓެންހަމް ހޮޓްސްޕާސްގެ ހާލަތު ގޯހުން ގޯހަށް ގޮސްފި އެވެ.
އާސެނަލް ކޮޅަށް ބްރައިޓަން އިން ފުރަތަމަ ހާފުގައި ދެ ގޯލުގެ ލީޑެއް ނެގި އެވެ. މި ހަފްތާގައި ފަހަތުން އަރައި ރަށުންބޭރުގައި މެންޗެސްޓާ ޔުނައިޓެޑް ދަނޑުގައި އެ ޓީމު ބަލިކޮށް، ލީގު ކަޕުން ކަޓުވާލި ބްރައިޓަން އިން ވަނީ އާސެނަލް ކޮޅަށް ތަފާތު މޮޅު ކުޅުމެއް ދައްކައިފަ އެވެ.
އެ ގޮތުން، ބްރައިޓަންގެ އެމެކްސް ސްޓޭޑިއަމްގައި ކުޅުނު މި މެޗުގައި. ބްރައިޓަން އިން ލީޑުނެގީ 31 ވަނަ މިނިޓްގައި ޖަރުމަނުގެ މިޑްފީލްޑަރު، ޕަސްކާލް ގްރޮސް ޖެހި ގޯލުންނެވެ. މިއީ، އޭރިއާބޭރުން ގްރޮސް ފޮނުވާލި ޝޮޓެއް ދަނޑީގައި ޖެހީފައި ގޯލަށް ވަދެގެން އެ ޓީމުން ކާމިޔާބުކުރި ގޯލެކެވެ.
ފުރަތަަމަ ހާފުގެ ފަހު މިނިޓްގައި ކައުންޓަ އެޓޭކުގައި ބްރައިޓަން އިން ދެ ވަނަ ލަނޑު ޖެހި އެވެ. މިއީ، 19 އަހަރުގެ ފޯވާޑް، ޗަރަލަމްޕޯސް ކޮސްޓޫލަސް އޭރިއާބޭރުން ފޮނުވާލި ޝޮޓަކުން ޖެހި ގޯލެކެވެ. މި ލަނޑު، ބްރައިޓަން އިން ޖެހުމުގެ ކުރިން، އާސެނަލަށް އެއްވަރުކޮށްދޭން ބުކާޔޯ ސަކާ އަށް ލިބުނު ފުރުސަތެއްގައި ބޭނުމެއް ނުހިފުނެވެ.
ބްރައިޓަން އިން ވަނީ ދެ ވަނަ ހާފުގެ ކުޅުން ފެށިގެން 12 މިނިޓް ތެރޭ ތިން ވަނަ ލަނޑު ޖަހައިފަ އެވެ. މިއީ، ކޯނަރަކުން ގްރޮސް ނެގި ބޯޅައަކުން ހުސްކޮށް އަރައި ޒުވާން މިޑްފީލްޑަރު، ޗެމާ އަންދްރޭސް ބޮލުން ޖެހި ގޯލެކެވެ.
އާސެނަލުން ލީގު މެޗަކުން މި ބަލިވީ، ނުވަ މެޗަށް ފަހު އެވެ. މިއީ، މި ސީޒަނުގައި އެ ޓީމު ބަލިވި ފުރަތަމަ މެޗެެވެ. އަދި، ލީގުގެ މެޗަކުން އާސެނަލް އެންމެ ފަހުން ވެސް ތިން ގޯލުގެ ފަރަގަކުން ބަލިވީ ތިން އަހަރު ކުރިން ބްރައިޓަން އަތުންނެވެ. އެއީ، 2023 ވަނަ އަހަރުގެ މެއި މަހު އެވެ.
ޓޮޓެންހަމް ހޮޓްސްޕާސް ސްޓޭޑިއަމްގައި އެސްޓަން ވިލާ އިން ތިން ގޯލުގެ ލީޑެއް ނެގި އެވެ. ފުރަތަމަ ހާފުގެ އިތުރު ވަގުތުގައި ވިލާ އަށް ލީޑުނަގައިދިނީ ޖޯހަން މަންޒަމްބީ އެވެ. އަދި ދެ ވަަނަ ހާފުގައި ނިކޮލަސް ޖެކްސަން އާއި އެމީ ބުއެންޑީއާ ވަނީ ލަނޑުތައް ޖަހައި، ވިލާ އަށް ހަމަޖެހުމެއް ގެނެސްދީފަ އެވެ.
ޓީމު ވަރުގަދަ ކުރުމަށްޓަކައި، އާ ކުުޅުންތެރިން ގަންނަން 400 މިލިއަން ޑޮލަރަށް ވުރެން އިތުރަށް ހަރަދުކުރި ޓޮޓެންހަމް އިން މި ސީޒަނުގައި މެޗަކުން މޮޅެއް ނުލިބި އޮތްްއިރު، މިރޭ ވިލާ ކޮޅަށް ފަހަތުން އަރައި ދެ ލަނޑު ޖެހި އެެވެ.
މިއީ، މި ސީޒަނުގައި ޓޮޓެންހަމަަށް އެއް މެޗެއްގައި ދެ ގޯލު ޖެހުނު ފުރަތަމަ ފަހަރެވެ. ޓޮޓެންހަމް އިން މި މެޗުގައި ޖެހި ފުރަތަމަ ލަނޑު ކާމިޔާބުކުރީ 86 ވަނަ މިނިޓްގައި ކޮނާ ގަލަގާ އެވެ. އަދި، އިތުރު ވަގުުތުގެ އަށް ވަނަ މިނިޓްގައި ވެން ހެކާ ވަނީ ޓޮޓެންހަމަށް ދެ ވަނަ ލަނޑެއް ޖަހައިދީފަ އެވެ. ބާކީ ވަގުތުގައި އިތުރު ލަނޑެއް ނުޖެހި، މި ފަހަރުގެ ލީގުގައި ކުޅުނު ފަސް މެޗުގެ ތެރެއިން ތިން ވަނަ މެޗުން ބަލިވީ އެވެ.
ޓޮޓެންހަމް، ފަސް މެޗުން ލިބުނު ދެ ޕޮއިންްޓާ އެކު އޮތީ ލީގުގެ 18 ވަނައިގަ އެވެ.
ލީގުގައި މިރޭ އިޕްސްވިޗް ޓައުން އަތުން އެވަޓަން ވަނީ 1-0 އިން މޮޅުވެފަ އެވެ. އަދި، ހަލް ސިޓީ އަތުން ނިއުކާސަލް ޔުނައިޓެޑް ވަނީ 2-1 އިން މޮޅުވެފަ އެވެ. މިއީ، ޕްރިމިއާ ލީގުގަައި ހަތް އަހަރު ފަހުން ވާދަކުރާ ހަލް އިން މިއީ މި ސީޒަނުގައި ބަލިވީ ފުރަތަމަ ފަހަރެވެ.
