މެންޗެސްޓާ (ސެޕްޓެމްބަރު 20) - އިނގިރޭސި ޕްރިމިއާ ލީގުގައި މިރޭ ސަންޑަލެންޑް އަތުން 5-3 އިން މޮޅުވެ، މެންޗެސްޓާ ސިޓީން ލީގުގެ އެއް ވަނަ އަށް ޖެހިލިއިރު، ބޯންމައުތު އަތުން 1-0 އިން މޮޅުވެ، ލިވަޕޫލުން ހަމަޖެހުމެއް ހޯދައިފި އެވެ.
މެންޗެސްޓާ ޔުނައިޓެޑުން ވަނީ ފަހު ވަގުތު ލަނޑު ޖަހައި، 1-1 އިން ފުލަމްއާ އެއްވަރުކޮށްފަ އެވެ.
އެންމެ ފަހުގެ ޗެމްޕިއަން، އާސެނަލް ވަނީ ރޭ ކުޅުނު މެޗުން ބްރައިޓަން އަތުން 3-0 އިން ބަލިވެފަ އެވެ. އޭގެ ފައިދާނަަގައި، ސިޓީން ވަނީ މިރޭގެ މޮޅާ އެކު، ތިން ހަފްތާގެ އިންޓަނޭޝަނަލް ބްރޭކަށްދާއިރު، ލީގުގެ އެއް ވަަނައިގައި ތިން ޕޮއިންޓުގެ ލީޑެއް ނަގައިފަ އެވެ.
އެންޒޯ މަރެސްކާ ހަވާލުވެ، ސިޓީ އަށް ސައްތަ އިން ސައްތަ ރެކޯޑެއް ލީގުގައި މިހާތަނަށް ހޯދައިދީފައިވާއިރު، ސިޓީ އަށް ވަނީ ތިން ފަސް މެޗުން 15 ޕޮއިންޓް ލިބިފަ އެވެ. ދެ ވަނައިގައި އޮތް އާސެނަލްގެ އޮތީ ފަސް މެޗުން 12 ޕޮއިންޓެވެ.
ސިޓީގެ އިއްތިހާދު ސްޓޭޑިއަމްގައި އެ ޓީމުން ލީޑުނެގީ އެންޒޯ ފެނާންްޑޭސް ޖެހި ހިލޭޖެހުމުންނެވެ. ނެދަލެންޑްސްގެ ފޯވާޑް، ބްރަޔަން ބްރޮބީ، ސަންޑަލެންޑަށް އެއްވަރުކޮށްދިންއިރު، ދެ ވަނަ ފަަހަރަށް ސިޓީން ލީޑުނެގީ ރަޔާން ޗާކީ ޖެހި ގޯލުންނެވެ. އެކަމަކު، ދެ ވަނަ ފަހަރަށް ވެސް ސަންޑަލެންޑުން ވަނީ ބްރޮބީގެ ގޯލުން އެއްވަރުކޮށްފަ އެވެ.
ފުރަތަމަ ހާފު ނިމުމުގެ ކުރިން، އަންޓުއާން ސެމެންޔޯ ވަނީ ސިޓީ އަށް ލީޑުނަގައިދީފަ އެވެ. އަދި، ދެ ވަނަ ހާފުގެ ކުރީކޮޅުގައި، ސެމެންޔޯ އިތުރު ލަނޑެއް ޖަހައި، ސިޓީގެ ލީޑުފުޅާކޮށްދިންއިރު، ބްރޮބީ ވަނީ ސަންޑަލެންޑަށް ތިން ވަނަ ލަނޑެއް ޖަހައިދީ އޭނާގެ ހެޓްރިކް ފުރިހަމަކޮށްފަ އެވެ.
ސިޓީ އަށް ތިން ޕޮއިންޓް ޔަގީންވީ ޖޮސްކޯ ގްވާޑިއޯލް ދިން ބޯޅައަކުން އާލިން ބްރައުޓް ހާލަންޑް ޖެހި ގޯލުންނެވެ. މި ލަނޑާ އެކު، ހާލަންޑް ވަނީ ޕްރިމިއާ ލީގުގައި އޭނާ އިދިކޮޅަށް ކުޅުނު 25 ޓީމު ކޮޅަށް ވެސް ލަނޑު ޖަހައިފަ އެވެ.
ލިވަޕޫލްގެ ކޯޗު އަންޑޯނީ އިރައޯލާ ކުރީގެ ކްލަބް ބޯންމައުތު ދަނޑަށް އެނބުރި ދިޔަ މެޗުގައި، ލިވަޕޫލް މޮޅުވި ގޯލު ޖެހީ ދެ ވަނަ ހާފުގައި އަލެކްސަންޑަ އިސާކް އެވެ. މިއީ، ލިވަޕޫލްގެ ކޯޑީ ގަކްޕޯގެ ރަނގަޅު މަސައްކަތަކަށް ފަހު ތަނަވަސްވި ފުރުސަތެއްގައި، ބޯންމައުތު އޭރިއާެތެރެއިން އިސާކް ޖެހި ގޯލެކެވެ. މިދިިޔަ ސީޒަނުގެ ލީގުގައި ޖުމްލަ އެކު، ތިން ލަނޑު ޖެހި އިސާކް މި ސީޒަނުގައި ލީގުގެ ފުރަތަމަ ފަސް މެޗުން މި ވަނީ ހަތަރު ލަނޑު ޖަހައިފަ އެވެ.
ޖެނުއަރީގެ ފަހުން ބޯންމައުތު އަމިއްލަ ދަނޑުގައި ފުރަތަަމަ ފަހަރަށް ބަލިވިއިރު، ލިވަޕޫލުން މި މެޗުން ހޯދި ތިން ޕޮއިންޓާ އެކު ވަނީ، ފަސް މެޗުން ނުވަ ޕޮއިންޓް ހޯދައި، ލީގުގެ ހަ ވަނަ އަށް ޖެހިލައިފަ އެވެ.
ފުލަމްގެ ދަނޑު ކްރޭވަން ކޮޓޭޖްގައި އެ ޓީމުން ދެ ވަނަ ހާފުގައި ލީޑުނެގީ ޔުނައިޓެޑްގެ ޑިފެންޑަރު، ލިސަންދްރޯ މާޓިނޭޒް އަތުން ބައިކޮޅަށް ވަން ގޯލުންނެވެ. މިއީ، ފުލަމްެގެ ޑިފެންޑަރު، ކަލްވިން ބަސީ ޖެހި ޝޮޓެއް ޔުނައިޓެޑްގެ ކީޕަރު، ސެން ލަމެންސް މަތަކުރި ވަގުތު ރީބައުންސުގައި ލިސަންދްރޯ އަތުން ބައިކޮޅަށް ވަން ގޯލެކެވެ.
ޔުނައިޓެޑުން އެއްވަރުކުރީ ފުރިހަމަ ވަގުތު ހަމަވާން ކައިރި ވެފައިވަނިކޮށް ފުލަމްގެ އޭރިއާބޭރުން މަޓެއުސް ކޫންޏާ ޖެހި ގޯލުންނެވެ. ކޫންޏާ، ފޮނުވާލި ބޯޅަ ގޯލަށް ވަނީ ފުލަމް ކުޅުންތެރިއަކު ފައިގައި ޖެހިފަ އެވެ. މި މެޗުން ލިބުނު ޕޮއިންޓާ އެކު، ޔުނައިޓެޑަށް ލީގުގެ ފުރަތަމަ ފަސް މެޗުން ލިބުނު ފަސް ޕޮއިންޓާ އެކު އޮތީ ލީގުގެ 12 ވަނައިގަ އެވެ.
ލީގުގައި މިރޭ ލީޑްސް ޔުނައިޓެޑުން އަމިއްލަ ދަނޑުގައި ކުޅުނު މެޗުގައި ކްރިސްޓަލް ޕެލަސްއާ ވަނީ 0-0 އިން އެއްވަރުވެފަ އެވެ.
