ލަންޑަން (ސެޕްޓެމްބަރު 20) - ވީޑިއޯ އެސިސްޓަންޓް ރެފްރީ (ވީއޭއާރް) އަށް އަދިވެސް އިތުބާރު އެބައޮތް ކަމަށް މެންޗެސްޓާ ޔުނައިޓެޑްގެ ކޯޗު، މައިކަލް ކެރިކް ބުނެފި އެވެ.
ކެރިކް މިހެން ބުނީ، ޔުނައިޓެޑް ދަނޑުގައި މެންޗެސްޓާ ސިޓީން 1-0 އިން މޮޅުވި މެުޗުގައި ވީއޭއާރުން ހިންގި ކަންތައްތަކުގެ މައްސަލަ އަށް އިޝާރާތްކޮށެވެ.
މެޗުގެ 23 ވަނަ މިނިޓްގައި ސިޓީގެ ފިލް ފޯޑެން އަށް ރަތް ކާޑެއް ދެއްކުމުން، ކުޅުންތެރިއަކު މަދުކޮށް ކުޅެމުން، 60 ވަނަ މިނިޓްގައި ސިޓީން ލީޑުނެގި އެވެ. މި ލަނޑު ޖެހީ، ހާލަންޑް އެވެ. މިއީ، ޖޮސްކޯ ގްވާޑިއޯލް ނެގި ހުރަހަކުން ހާލަންޑް ޖެހި ލަނޑެކެވެ. އެންމެ ފުރަތަމަ އޮފްސަައިޑް ކަމަށް ނިންމި މި ގޯލު ބަލައިގަންނަން ނިންމީ، ވީއޭއާރް އިން ބަލައިފަ އެވެ. ވީއޭއާރް އިން މި ގޮތަށް ނިންމީ، ޔުނައިޓެޑްގެ ޕެޓްރިކް ޑޯގޫ ހުރި ހިސާބުން ބަލާއިރު، ހާލަންޑް އޮފްސައިޑް ކަމަށް ވީއޭއާރަށް ނުފެންނާތީ އެވެ. މި ގޯލު އޮފްސައިޑް ކަމަށް ބެލެވުނު އެންމެ ބޮޑު ސަބަބަކީ، އޮފްސައިޑް މަގާމެއްގައި ހުރެ، ސިޓީގެ އެންޒޯ ފެނާންޑޭސް ބޮލުން ޖަހަން މަސައްކަތް ކުރުމުންނެވެ.
ޔުނައިޓެޑާއި ސިޓީ މެޗުގެ ވީއޭއާރް ޓީމަށް މެޗެއް ނުދޭން ނިންމައިފި
މެންޗެސްޓާ ސިޓީ އާއި ޔުނައިޓެޑް ބައްދަލުކުރި މެޗުގައި ހާލަންޑް ޖެހި ގޯލު ބަލައިގަތުމުގައި ވީއޭއާރް ޓީމުން ހެދި ގޯހަކާ ގުޅިގެން، އެ މެޗުގެ ވީއޭއާރް ރެފްރީންނަށް މި ހަފްތާގެ މެޗުތަކުން ފުރުސަތު ނުދޭން ވަނީ ނިންމައިފައި
ސިޓީން މޮޅުވި މި މެޗުގައި އެ ޓީމުގެ ހަމައެކަނި ލަނޑު ޖެހި، އާލިން ބްރައުޓް ހާލަންޑް ޖެހި ގޯލު ބަލައިގަންނަން ނިންމި ނިންމުން ގޯސް ކަމަށް ޕްރިމިއާ ލީގުގެ ރެފްރީ ޖަމިއްޔާ، ޕްރޯ ރެފް އިން ވަނީ ބުނެފަ އެވެ. ސިޓީ އާއި ޔުނައިޓެޑުން މިދިޔަ ހަފްތާގައި ކުޅުނު މެޗުގައި ތިބި ވީއޭއާރް ޓީމަށް މި ހަފްތާގައި މެޗެއް ނުދޭން ޕްރިމިއާ ލީގުގެ ރެފްރީ ޖަމިއްޔާ، ޕްރޯ ރެފް އިން ނިންމައިފަ އެވެ.
އިނގިރޭސި ޕްރިމިއާ ލީގުގައި މިރޭ ފުލަމް ދަނޑުގައި އެ ޓީމާ ދެކޮޅަށް ކުޅޭ މެޗުގެ ކުރިން ކެރިކް ބުނެފައިވަނީ، ފުޓްބޯޅައިގެ ގަވާއިދު މާނަ ކުރުމުގައި ހުރި ތަފާތުތައް ނައްތާލަންޖެހޭ ކަމަށާއި ވީއޭއާރްް ރަނގަޅަށް ބޭނުންކުރެވޭނީ އޭރުން ކަމަށެވެ.
"ދެން މި ދިމާވި ކަހަލަ ކަންކަން އަންނާނެ. އެ ދެން ވާނެ ކަންކަން. ދެން، އެކަން ހިނގި ވަގުތާއި އެ މެޗަށް ވިސްނާއިރު އެކަން ވަރަށް ބޮޑު. އެކަމަކު، ހަގީގަތަކީ އެންމެން ވެސް ކަންކަން ރަނގަޅުކުރަން މަސައްކަތް ކުރާނެ. އަހަރެންގެ އިތުބާރު ވީއޭއާރް އާއި ރެފްރީންގެ މި ސިސްޓަމަށް އެބައޮތް،" ކެރިކް ބުންޏެވެ.
މިދިޔަ ސީޒަނުގައި ވަގުތީ ކޯޗަކަށް އައިސް ކެރިކް ކުރި މަސައްކަތް ރަނގަޅުވުމުން، އެ ކްލަބުން އޭނާ އަށް ދެ އަަހަރުގެ އެއްބަސްވުމެއް ދިނީ އެ މުއްދަތުގެ ތެރޭގައި ހާސިލްކުރާ ކަންކަމަށް ބަަލައި، އިތުރު އެއް އަހަރު އެ ޓީމުގައި މަޑުކުރެވޭ ގޮތަށެވެ. އެކަމަކު، މި ފަހަރުގެ ލީގުގައި ފުރަތަމަ ހަތަރު މެޗުގެ ތެރެއިން ޔުނައިޓެޑް ދެ މެޗުން ބަލިވެފައިވާއިރު، ލީގު ކަޕުން ވަނީ ކަޓައިފަ އެވެ.
މަގާމުގައި ހުންނަން ކެރިކަށް މިހާރު ވެސް ޕްރެޝަރު ކުރިމަތިވަމުން އަންނައިރު، އޭނާ ވަނީ ކަންކަން ރަނގަޅުވާން ޖެހޭ ކަމަށް ބުނެފަ އެެވެ.
